Hecho

Pedro preso ɓaɗada cawaẽ́ne ẽdrʉɗa

12 Maʉ̃ ewariɗe dewara Herodeda jũma judiorã druaɗebema boroda ɓesia.* Maʉ̃ Herodeba djabarãda ʉ̃cʉrʉ jidabipeɗa biẽ́ obisia. 2 Juaʉ̃ djaba Santiagoda necoba beabisia.* 3 Herodeba unusia judiorãra maʉ̃ carea ɓʉsriɗasiɗada. Maʉ̃ bẽrã Pedro siɗa jidabisia. Mãwã osia paʉ̃ ẽsãbari neẽ́ ɓʉ cobada ewariɗe.* 4 Pedrora jidabipeɗa preso ɓʉbisia. Maʉ̃be sordaorãda diecisei edapeɗa quĩmãrẽ quĩmãrẽ Pedrora bio wagabisia. Herodeba crĩcha ɓasia Pedrora jũmarã quĩrãpita cawa oida judiorã Egiptoɗeba ẽdrʉpeɗaɗa quĩrãnebabada ewari jõnacarea. 5 Pedrora preso ɓʉbada deɗe jida eropanʉmisa djabarãba Ãcõrẽa bio iwiɗi panasiɗaa idji carebamãrẽã.

6 Herodeba cawa oi ewari jũẽboɗo diamasi Pedrora sordaorã umé panʉ ẽsi cãĩ ɓasia. Carena uméba jʉ̃ ɓasia. Preso ɓʉbada deɗe eɗa wãbadama dewara sordaorãda nũpanasiɗaa. 7 Mãwã ɓʉɗe cawaẽ́ne dadjirã Boro nezoca bajãnebemada Pedromaa zesia. Maʉ̃ba preso ɓʉbada dera eɗa ʉ̃na nũmesia. Bajãnebema nezocaba Pedro orroɗe tãpeɗa ʉ̃rʉ̃matasia. Maʉ̃ne jarasia:

–Isabe piradrʉdua.–

Cawaẽ́ne Pedro jʉwaɗe carena jʉ̃ ɓʉra ẽrã ɓaesiɗaa. 8 Maʉ̃be bajãnebema nezocaba jarasia:

–Bʉa cacuaɗe jʉ̃ ɓʉra bio trãjʉ̃dua. Jĩrũne jʉ̃bari siɗa jʉ̃dua.–

Pedroba mãwã oɗacarea bajãnebema nezocaba jarasia:

–Bʉa ʉ̃rʉ̃ jʉ̃bari siɗa jʉ̃peɗa mʉ̃ caiɗu zedua.–

9 Ara maʉ̃da Pedrora bajãnebema nezoca caiɗu wãsia, baribʉrʉ idjia adua ɓasia bajãnebema nezocaba o ɓʉra wãrãda mãwã ɓʉda. Cãĩmocarada crĩcha ɓasia. 10 Mãwã ɓʉɗe sordaorã dji eɗaare panʉ caita wãyã wãsiɗaa. Maʉ̃are dewararã caita wãyã wãnapeɗa dji dajada wãbada jiorro oɗama jũẽsiɗaa. Jũẽbʉdaɗe maʉ̃ jiorro oɗara iduɓa ewa dogosia. Ara maʉ̃da ẽdrʉsiɗaa. Mĩgaẽ́ wãbʉdaɗe bajãnebema nezocara Pedro ume ɓaɗada nẽbasia.

11 Maʉ̃bebʉrʉ Pedroba cawasia wãrãda ẽdrʉsida. Idjiduɓa jarasia: “Ʉ̃rãbʉrʉ mʉ̃a cawasia dadji Boroba wãrãda bajãnebema nezocada diabuepeɗa mʉ̃ra Herode jʉwaeɗabemada ẽdrʉ ɓʉsida. Judiorãba biẽ́ o quĩrĩã panananebemada wãrãda ẽdrʉ ɓʉsia.”

12 Pedroba wãrãda ẽdrʉsida cawasiɗe Juaʉ̃ Marco papa Maria deɗaa wãsia. Maria deɗe zocãrã djabarãba Ãcõrẽa iwiɗi panʉda ãbaa dji jʉre panasiɗaa. 13 Maʉ̃ne Pedroba dajadaareba trʉ̃ ɓʉɗe nezocawẽrã Rode abadaba acʉɗe wãsia caiba trʉ̃ ɓʉ cawaya. 14 Rodeba Pedro beɗeara cawasia. Maʉ̃ bẽrã ɓʉsriɗasia baribʉrʉ eɗa wãbadara ewaẽ́ basía. Ãtebʉrʉ eɗa pira wãpeɗa djabarãa jarasia Pedrora dajada ɓʉda. 15 Maʉ̃ne jũmarãba Rodea jarasiɗaa:

–Bʉra quĩrãẽ́ nũmʉa.–

Baribʉrʉ idjia wãrãana asia. Maʉ̃ne ãdjirãba jarasiɗaa:

–Mãẽteara idji bajãnebema nezocada mãwã ɓʉa.–*

16 Mãwã panʉne Pedroba dajadaareba mĩã sẽ trʉ̃ ɓasia. Ewasiɗaɗe ãdjirãba unusiɗaa wãrãda Pedroda mãwã ɓʉda. Aɓeɗa cawa crĩchaɗaẽ́ basía. 17 Baribʉrʉ Pedroba jʉwaba jarasia chupeaɗamãrẽã. Maʉ̃be jũma nẽbʉrʉsia sãwãbʉrʉ dadji Boroba idjira preso ɓaɗada ẽdrʉ edasida. Jũma nẽbʉrʉpeɗa jarasia:

–Jũma maʉ̃gʉra Santiagoa, waabema djabarãa biɗa jaraɗadua.–*

Maʉ̃be Pedrora mamaʉba ãyã wãsia.

18 Ʉ̃nadrʉsiɗe sordaorãba cawaɗaẽ́ basía Pedrora sãmaa wãsida. Aɓeɗa cawa crĩchaɗaẽ́ basía idjaɓa ne wayasiɗaa. 19 Herodeba idjira jʉrʉbisia, baribʉrʉ sordaorãba ununaẽ́ basía. Herodeba ãdjirãa maʉ̃gʉɗebemada bio iwiɗipeɗa jũma quenabisia. Mãwãnacarea Herodera judiorã druaɗeba Cesarea puruɗaa wãpeɗa mama dãrãsia.

Herode beuɗa

20 Maʉ̃ ewariɗe Herodera Tiroɗebemarã ume, Sidoʉ̃nebemarã ume biɗa quĩrũ ɓasia. Baribʉrʉ maʉ̃gʉrãba cobadara Herode druaɗe edabadjiɗaa. Maʉ̃ carea ãdjirãra beɗea auɗapeɗa ãbaa wãsiɗaa idji ume ibiaɗi carea. Naãrã Blasto abadamaa wãsiɗaa. Maʉ̃ Blastora Herodeare dji droma basía. Maʉ̃ne ãdjia jara panʉra Blastoa ĩjãbiɗapeɗa idjiɗeba Herodea beɗea djuburiasiɗaa ibiaɗi carea.

21 Herodeba ɓʉɗa ewariɗe djio bia quiruda jʉ̃peɗa idji bugueɗe chũmesia. Maʉ̃be ãdjirã quĩrãpita beɗeasia. 22 Mãwã ɓʉɗe ãdjirãba jĩgua jarabadjiɗaa:

–¡Za beɗea ɓʉra ẽberãẽ́a, ãtebʉrʉ Ãcõrẽa!–

23 Baribʉrʉ Herodeba Ãcõrẽa bia beɗeaɗaduaɗa aẽ́ basía. Ara maʉ̃ne dadjirã Boro nezoca bajãnebemaba idjira cacua biẽ́ ɓʉsia. Maʉ̃be idjira quiba co beasia.

24 Maʉ̃misa djabarãba beɗea dadji Boro Jesuɗebemada tʉmʉara jaradia wãsiɗaa.* Maʉ̃ne zocãrãba ĩjãbʉda bẽrã yõ wãsiɗaa.

25 Bernabeba, Saulo biɗa Jerusaleʉ̃ne parata djabarã itea diapeɗaɗacarea jẽda wãsiɗaa. Juaʉ̃ Marco abadada edesiɗaa.