Marco
Jesu ʉ̃rẽbaɗa Ãcõrẽ nezocaba jaraɗa
Mateo 28:1-10; Luca 24:1-12; Juaʉ̃ 20:1-10
16 Ʉ̃nãũbada ewari jõnacarea Maria Magdalenaba, Santiago papa Mariaba, Salomé biɗa querada nẽdosiɗaa Jesu cacuara pʉrʉɗi carea. 2 Nabema ewari domianebemane diapeɗa ara ʉ̃mãdau odjabʉrʉɗe ãdjira Jesu tʉɓaripeɗaɗamaa wãsiɗaa. 3 Maʉ̃ne nãwã jara nĩbasiɗaa:
–Dadjira eɗa wãni carea ¿jãʉ̃ mõgara waiɓʉa uria jũãtrʉ ɓʉra caiba ãyã ɓʉi?–
4 Baribʉrʉ araa acʉbʉdaɗe unusiɗaa mõgara waiɓʉara orrocawa coɓʉda. 5 Ara maʉ̃da uriaɗe eɗa wãsiɗaa. Eɗa wãbʉdaɗe cũdrada unusiɗaa. Idjia drasoa jʉ̃ ɓʉra totroa querasia. Ãdji jʉwa araare chũmasia. Idji carea wẽrãrãra dauperasiɗaa. 6 Maʉ̃ cũdraba ãdjía jarasia:
–Dauperarãnadua. Bãrãba Jesu Nazareɗebemada cruɗe cachipeɗaɗada jʉrʉ panʉa. Idjira ʉ̃rẽbasia. Idji ɓʉpeɗaɗamaa acʉɗadua. Nama ɓʉẽ́a. 7 Jãʉ̃be idji ume nĩbapeɗaɗarãmaa wãnadua. Pedroa, waabemarãa biɗa jaraɗadua Jesura ãdji na Galilea druaɗaa wãbʉrʉda. Jãma idjira ununia idjia naẽna jaraɗa quĩrãca.–*
8 Maʉ̃ne daupera panʉba cacua ure nũpanasiɗaa. Ara maʉ̃da wẽrãrãra Jesu cacua tʉɓaripeɗaɗa uriaɗeba pira wãsiɗaa. Ne waya panʉ bẽrã ni aɓaʉa beɗeaɗaẽ́ basía.*
Jesuba Maria Magdalenaa ara idjida unubiɗa
9 Jesura diapeɗeɗa nabema ewari domianebemane ʉ̃rẽbapeɗa naãrã Maria Magdalenaa unubisia. Maʉ̃ wẽrãnebemada Jesuba naẽna jairãda siete ãyã jʉrecuasia. 10 16:10-11 Maʉ̃be Mariara Jesu ume nĩbapeɗaɗarãmaa wãsia. Idji jũẽsiɗe ãdjirãra waɗi sopuaba jĩã panasiɗaa. Mãwã panʉne Mariaba ãdjirãa jarasia Jesura zocai ɓʉda unusida. Mãwã ũrĩbʉdamĩna ĩjãnaẽ́ basía.
Jesuba dewara umé panʉ́a ara idjida unubiɗa
12 Mãwãnacarea Jesu ume nĩbapeɗaɗarãda umé puru dajada nĩbasiɗaa. Maʉ̃gʉrãa Jesuba ara idjida quĩrã awara unubisia. 13 Ãdjira jẽda wãnapeɗa waabemarãa jarasiɗaa. Mãwãmĩna waɗibiɗa ĩjãnaẽ́ basía.
Jesuba edaɗarãa ara idjida unubiɗa
Mateo 28:16-20; Luca 24:36-44; Juaʉ̃ 20:19-23
14 Mãwãnacarea Jesuba edaɗarã once panʉ ne co chũpanasiɗaɗe ara idjida unubisia. Ãdji cʉwʉrʉ zareaɗeba ĩjãnaẽ́ panana carea quẽãsia. Idji ʉ̃rẽbaɗa unupeɗaɗaba ãdjirãa jarasiɗamĩna ĩjãnaẽ́ panasiɗaa.
15 Maʉ̃be Jesuba ãdjirãa jarasia:
–Drua ɓeaza wãnapeɗa beɗea bia mʉ̃nebemada jũmarãa jaraɗadua. 16 Maʉ̃ beɗeada ĩjãsiɗara idjaɓa borocuesiɗara Ãcõrẽba ẽdrʉ edaya. Baribʉrʉ maʉ̃ beɗea ĩjãẽ́ra idjia cawa oya. 17 Mʉ̃ ĩjã ɓeaba naʉ̃gʉda oɗia Ãcõrẽ ʉɓʉa eropanʉda unubiɗi carea: mʉ̃ trʉ̃neba jairãda ãyã jʉretaɗia idjaɓa adua panʉ beɗeaɗe beɗeaɗia. 18 Dama arada ãdji jʉwaba jidaɗia. Nẽãrã dadji beabarida doɗibʉrʉ maʉ̃ba biẽ́ oẽ́a. Idjaɓa cacua biẽ́ ɓeara ãdji jʉwa ʉ̃rʉ̃ ɓʉbʉdaɗe biacuaɗia.–
Jesu bajãnaa wãna
19 Mãwã jaraɗacarea dadjirã Boro Jesura Ãcõrẽba ʉ̃taa bajãnaa edesia. Mama Ãcõrẽ jʉwa araare chũmesia. 20 Maʉ̃be Jesuba edaɗarãba idji beɗeara ãdji wãbʉdaza jarasiɗaa. Dadjirã Boroba ãdjirãra carebasia. Ne ununaca obi ɓʉɗeba cawabisia ãdjia jara panʉra wãrã arada.