Mateo

Caida dji dromaara ɓʉ

Marco 9:33-48; Luca 9:46-48; 17:1-2

18 Maʉ̃ ewariɗe Jesu ume nĩbabadarãra idji caita zeɗapeɗa nãwã iwiɗisiɗaa:

–Bajãne Ɓʉba pe eroɓʉɗebemarãda ¿caida dji dromaara ɓʉ?–

2 Maʉ̃ne Jesuba warra zaqueda trʉ̃peɗa ãdjirã ẽsi nũmʉsia. 3 Nãwã jarasia:

–Wãrã arada mʉ̃a jaraya: bãrãba crĩcha panʉra ãyã ɓʉɗapeɗa warrarã quĩrãca ɓeaɗaẽ́bʉrʉ, Bajãne Ɓʉba pe eroɓaẽ́a. 4 Baribʉrʉ aɓaʉda naʉ̃ warra zaque quĩrãca dewararã cãyãbara eɗaara ɓeibʉrʉ, Bajãne Ɓʉba pe eroɓʉɗebemarãda dji dromaara ɓaya. 5 Bariduaba mʉ̃ ĩjã ɓʉɗeba warrarãda bia edaibʉrʉ, mʉ̃da bia edabʉrʉa.

6 Bariduaba mʉ̃ ĩjã ɓea dji dromaẽ́ queɗeada cadjiruaɗe ɓaebibʉrʉ, Ãcõrẽba maʉ̃ ẽberãra bio cawa oya. Maʉ̃ cawa oira bio zarea ɓai bẽrã biara ɓʉa maʉ̃ ẽberã ochiruɗe yu waiɓʉada jʉ̃napeɗa pusaɗe ɓatabueɗida nãbʉrʉ beumãrẽã.* 7 ¡Mĩã djuburi ɓeaa naʉ̃ ẽjũãnebemarãra! Cadjirua obibarira naʉ̃ ẽjũãne baraa. Maʉ̃ra baraya baribʉrʉ djãrãa ne cadjirua obibari ẽberãda bio mĩã djuburi ɓʉa.

8 Maʉ̃ carea bʉ jʉwaba wa bʉ jĩrũba bʉ́a cadjiruada obibʉrʉ, maʉ̃ cadjirua o amaaba ɓʉá tutapeɗa ãyã ɓatabuedua. Bʉa jʉwa aɓabe wa jĩrũ aɓabe eroɓaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba bʉra jʉwa umé wa jĩrũ umé eroɓʉda tʉbʉ urua quicamaa ɓatabuei cãyãbara. 9 Idjaɓa bʉ dauba bʉ́a cadjiruada obibʉrʉ, maʉ̃ cadjirua o amaaba ẽũtapeɗa ãyã ɓatabuedua. Dau aɓabe eroɓaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba bʉra dau umé eroɓʉda tʉbʉ uruaɗe ɓatabuei cãyãbara.

Oveja aduaɗaɗebema ne jara ɓʉ

Luca 15:3-7

10 Warra zaquerãra igararãnadua. Mʉ̃a jaraya: bajãnebema nezocarã mʉ̃ Zeza quĩrãpita duanʉba ãdjirãra wagabadaa. 11 Wãrãda mʉ̃, Naʉ̃ Djara Edaɗaba dji aduá ɓeada ẽdrʉ edai carea zesia.*

12 Bãrãba ¿sãwã crĩchaɗi? Ẽberãba cien oveja eroɓʉɗebemada aɓa aduaibʉrʉ ¿dji 99 panʉra eyaɗe amepeɗa dji aduaɗada jʉrʉɗe wãẽ́ca? 13 Mʉ̃a wãrã arada jaraya: ẽberãba idji ovejada unusira dji 99 aduaẽ́ ɓea cãyãbara maʉ̃ oveja carea ɓʉsriɗaara ɓaya. 14 Ara maʉ̃ quĩrãca bãrã Zeza bajãne ɓʉba quĩrĩãẽ́a ni aɓaʉ warra zaquera aduaida.

Bʉ djababa cadjiruada osira sãwã oida ɓʉ

Luca 17:3

15 Bʉ djababa bʉda biẽ́ oibʉrʉ, idjimaa wãpeɗa bãduɓa panʉne ibiaɗeba quẽãdua. Idjia bʉ beɗeada ĩjãsira bãrãra ibiaɗia. 16 Baribʉrʉ bʉ beɗeara ĩjãẽ́bʉrʉ, ẽberãda aɓa wa umé idjimaa ededua. Maʉ̃rãba jaraɗia jũma bʉa jara ɓʉra wãrãda.* 17 Ãdjia jarabʉdara idjia ũrĩ quĩrĩãẽ́bʉrʉ, Ãcõrẽ ĩjã ɓeara jũma ãbaa trʉ̃peɗa ãdjirãa maʉ̃nebemada jaradua. Baribʉrʉ Ãcõrẽ ĩjã ɓeaba jarabʉdara ũrĩ quĩrĩãẽ́bʉrʉ, idjira Ãcõrẽ adua ɓʉ quĩrãca wa Romanebema boro itea parata jʉrʉ pebari quĩrãca igaradua. 18 Wãrã arada mʉ̃a jaraya: bãrãba naʉ̃ ẽjũãne iduaribiɗaẽ́ra Ãcõrẽ bajãne ɓʉ biɗa iduaribiẽ́a. Idjaɓa bãrãba naʉ̃ ẽjũãne iduaribi panʉra Ãcõrẽ bajãne ɓʉ biɗa iduaribiya.

19 18:19-20 Naʉ̃da mʉ̃a jaraya: mʉ̃ ĩjã panʉda umé wa ũbea ãbaa dji jʉre panʉne mʉ̃ siɗa mama ɓaya. Maʉ̃ bẽrã bãrãnebemada umé naʉ̃ ẽjũãne mʉ̃ Zezaa iwiɗiɗi carea beɗea auɗibʉrʉ, bãrãba iwiɗibʉdara mʉ̃ Zeza bajãne ɓʉba oya.–

Cadjirua quĩrãdoaẽ́ ɓaɗaɗebema ne jara ɓʉ

21 Maʉ̃be Jesu caita zepeɗa Pedroba iwiɗisia:

–Mʉ̃ Boro, mʉ̃ djababa mʉ̃ biẽ́ obʉrʉɗe ¿ɓarima jũmasãwã quĩrãdoaida ɓʉ? ¿Ɓarima siete bia ɓʉca?–

22 Jesuba panusia:

–Mʉ̃a jaraya: ɓarima sietebe mãwã oiẽ́ ɓʉa ãtebʉrʉ 77 oida ɓʉa.*

23 Bajãne Ɓʉba ẽberãrã pe eroɓʉra naʉ̃ quĩrãca ɓʉa: ẽberãrã boroda ɓasia. Ewari aɓa maʉ̃ boroba quĩrĩã ɓasia idjiare ɓeaba idjia parata diaɗara jẽda diaɗida. 24 Mãwã ɓʉɗe aɓa enesiɗaa. Maʉ̃ ẽberãba dji boroa paratada waiɓʉa jẽda diaida ɓasia. 25 Maʉ̃ne idjia cãrẽba jẽda diaida neẽ́ ɓasia. Maʉ̃ bẽrã dji boroba idji parata edai carea maʉ̃ ẽberãda, dji quimada, dji warrarã siɗa nẽdobuei basía djãrã nezocada ɓeaɗamãrẽã. Jũma maʉ̃ ẽberãba eroɓʉ siɗa nẽdobuei basía. 26 Maʉ̃ne ẽberãra chĩrãboroɗe coɓepeɗa dji boroa nãwã beɗea djuburiasia: “Mʉ̃ boro, mʉ̃ quĩrã djuburia jʉ̃ãdua. Mʉ̃a bʉ́a jũma jẽda diaya.” 27 Maʉ̃ne quĩrã djuburiaɗeba dji boroba jũma dji ẽberãba diaida ɓaɗara quĩrãdoapeɗa idjira ẽdrʉ ɓʉsia.

28 Maʉ̃be ẽberãra wãsia. Wãbʉrʉɗe idji boroare ɓʉda aɓa unusia. Maʉ̃gʉba idjía paratada maãrĩ jẽda diaida ɓasia. Maʉ̃ra osãga jidapeɗa jarasia: “Mʉ̃́a diaida ɓʉra diadua.” 29 Dewarabemaba idji quĩrãpita chĩrãboroɗe coɓepeɗa jarasia: “Mʉ̃ quĩrã djuburia jʉ̃ãdua. Mʉ̃a bʉ́a jũma jẽda diaya.” 30 Baribʉrʉ quĩrã djuburiaẽ́ basía, ãtebʉrʉ preso ɓʉbisia aɓa idjia diaida ɓaɗara jũma diabʉrʉɗaa.

31 Dji boroare ɓeaba maʉ̃ra unusiɗaa. Maʉ̃ carea bio sopuasiɗaa. Wãnapeɗa dji boroa jũma nẽbʉrʉsiɗaa. 32 Dji boroba maʉ̃ ẽberãra idji quĩrãpita trʉ̃peɗa nãwã jarasia: “¡Bʉra nezoca cadjiruaa! Bʉa beɗea djuburiasiɗe bʉa jẽda diaida ɓaɗara ¿mʉ̃a jũma quĩrãdoasiẽ́ca? 33 Maʉ̃da ¿cãrẽ cãrẽã dewarabemara quĩrã djuburiaẽ́ basi?” 34 Dji borora bio quĩrũ ɓʉ bẽrã maʉ̃ ẽberãra preso biẽ́ obadarã jʉwaeɗa ɓʉsia aɓa idjia jẽda diaida ɓaɗara jũma diabʉrʉɗaa.–

35 Maʉ̃be Jesuba jarasia:

–Ara maʉ̃ quĩrãca bãrã djabarãba biẽ́ opeɗaɗada bãrãba soɗeba quĩrãdoaɗaẽ́bʉrʉ, mʉ̃ Zeza bajãne ɓʉba jũma bãrãra biẽ́ ɓʉya.–