Mateo
Jesuba mĩã amaira biẽ́ ɓʉaɗa aɗa
19 Mãwã jaraɗacarea Jesura Galilea druaɗeba Judea druaɗaa wãsia Jordaʉ̃ do quĩrãare. 2 Zocãrã ẽberãrãba idjira ẽpẽsiɗaa. Mama dji cacua biẽ́ queɗeara jũma biabisia. 3 Mãwã ɓʉɗe ʉ̃cʉrʉ pariseorãda zesiɗaa idjira biẽ́ beɗeabiɗi cawaya. Maʉ̃gʉrãba iwiɗisiɗaa:
–¿Umaquĩrãba dji quimada baridua carea amaida ɓʉca?–
4 Jesuba panusia:
–¿Bãrãba Ãcõrẽ Beɗeaɗe acʉɗacaca? Naʉ̃ ẽjũã osiɗe Ãcõrẽba umaquĩrãda, wẽrã siɗa osia.* 5 Idjaɓa jarasia: “Maʉ̃ carea umaquĩrãba dji zezara, dji papa siɗa amepeɗa idji quima ume ãbaa ɓeya. Mãwã cacua aɓa ɓʉ quĩrãca panania.”* 6 Ãdjira umé panʉẽ́a, ãtebʉrʉ cacua aɓa ɓʉ quĩrãca panʉa. Maʉ̃ bẽrã Ãcõrẽba ãbaa ɓʉɗara dji amanacara panʉa.–
7 Maʉ̃ carea ãdjirãba iwiɗisiɗaa:
–Mãwãra Moiseba ¿cãrẽ cãrẽã ɓʉsi aɓaʉba idji wẽrãa carta mĩã amainebemada diaibʉrʉ amaida ɓʉda?–*
8 Jesuba panusia:
–Bãrãra cʉwʉrʉ zarea ɓea bẽrã Moiseba mãwã iduaribisia. Baribʉrʉ Ãcõrẽba naʉ̃ ẽjũã osiɗe mãwã quĩrĩãẽ́ ɓasia. 9 Mʉ̃a jaraya: bariduaba idji wẽrã daunemaẽ́ ɓʉda amapeɗa dewara wẽrãda edaibʉrʉ, maʉ̃ umaquĩrãra daunema ɓʉa. [Idjia amana wẽrãda dewara umaquĩrãba edaibʉrʉ maʉ̃ umaquĩrã siɗa daunema ɓʉa.]–*
10 Maʉ̃ne Jesu ume nĩbabadarãba idjía jarasiɗaa:
–Mãwã baibʉrʉ, biara ɓʉa quima edaẽ́da.–
11 Maʉ̃ carea Jesuba jarasia:
–Jũmarãba quima edaẽ́ crĩchara poya droaɗaẽ́a. Aɓabe Ãcõrẽba maʉ̃ crĩchada diaibʉrʉ poya deu ɓaya. 12 Ʉ̃cʉrʉba poya warra oɗacaa mãwã topeɗaɗa bẽrã. Ʉ̃cʉrʉ mãwã ɓeaa warra orãnamãrẽã õgo opeɗaɗa bẽrã. Idjaɓa ʉ̃cʉrʉba quima edaira crĩchaɗacaa biara ãdji Boro Bajãne Ɓʉ itea ne oɗi carea.* Bãrãda poya deu ɓeaɗibʉrʉ, mãwã ɓeaɗadua.–
Jesuba warra zaquerã bia jara ɓʉɗa
13 Maʉ̃be ẽberãrãba warra zaquerãda Jesumaa enesiɗaa idji jʉwara ãdjirã ʉ̃rʉ̃ ɓʉpeɗa Ãcõrẽa iwiɗimãrẽã. Baribʉrʉ Jesu ume nĩbabadarãba djibarirãda quẽãsiɗaa. 14 Maʉ̃ carea Jesuba jarasia:
–Idu warra zaquerãra mʉ̃maa zebiɗadua, Bajãne Ɓʉba pe eroɓʉɗebemara ãdjirã quĩrãca panʉ bẽrã.–
15 Maʉ̃be idji jʉwara warra zaquerã ʉ̃rʉ̃ ɓʉpeɗa wãsia.
Parata bara ɓʉ Jesu ume beɗeaɗa
16 Ewari aɓa cũdrada Jesumaa zesia. Maʉ̃ cũdraba iwiɗisia:
–Jaradiabari, Ãcõrẽ ume ewariza zocai ɓai carea ¿mʉ̃a cãrẽ biada oida ɓʉ?–*
17 Jesuba panusia:
–¿Cãrẽ cãrẽã mʉ̃́a biaɗebemada iwiɗi ɓʉ?* Ni aɓaʉda dji biaẽ́a, aɓabe Ãcõrẽdrʉ dji biaa. Bʉda Ãcõrẽ ume ewariza zocai ɓa quĩrĩã ɓʉbʉrʉ, idjia obi ɓʉ beɗeada ĩjã odua.–
18 19:18-19 Idjia iwiɗisia:
–¿Sãʉ̃gʉda?–
Jesuba jarasia:
–Mĩã bearãdua, daunemarãdua, ne drʉarãdua, sewaɗeba djãrãra biẽ́ jararãdua, bʉ zezara, bʉ papa siɗa wayadua,* idjaɓa djãrãra quĩrĩãdua ara bʉdji quĩrĩã ɓʉ quĩrãca.–*
20 Cũdraba jarasia:
–Jũma maʉ̃gʉra ĩjã o ɓʉa.* Mʉ̃a ¿waɗi cãrẽda oẽ́ ɓʉ?–
21 Maʉ̃ne Jesuba idjía jarasia:
–Bʉda wãrãda jipa ɓa quĩrĩã ɓʉbʉrʉ, bʉa eroɓʉra jũma nẽdobueɗe wãpeɗa dji paratara ne neẽ́ queɗeaa diadua. Mãwã nebiada bajãne eroɓaya. Maʉ̃be mʉ̃ ume nĩbaɗe zedua.–
22 Cũdraba maʉ̃ ũrĩpeɗa sopua ɓesia bio bara ɓʉ bẽrã. Ara maʉ̃da wãsia. 23 Maʉ̃ne Jesuba idji ume nĩbabadarãa jarasia:
–Wãrãda bio zarea ɓʉa ẽberã ne bara ɓʉba Ãcõrẽra idji Boroda ɓʉi carea. 24 Wayacusa mʉ̃a jaraya: parata bara ɓʉba Ãcõrẽra idji Boroda ɓʉi cãyãbara cameyoda ãguja uriaɗe eɗa wãichaara ɓʉa.–
25 Maʉ̃ne idji ume nĩbabadarãba cawa crĩchaɗaẽ́ basía. Ãcõrẽba ne bara ɓeara bia pe eroɓʉda crĩcha panasiɗaa. Ãdjirãba iwiɗisiɗaa:
–Mãwãra Ãcõrẽba ¿caidrʉ ẽdrʉ edai?–
26 Jesuba ãdjirã acʉpeɗa jarasia:
–Ẽberãba mãwã poya ocaa baribʉrʉ Ãcõrẽmaarã oicha ɓʉa.–
27 Maʉ̃ne Pedroba Jesua jarasia:
–Bʉ ẽpẽni carea daiba ne jũmada amesiɗaa. ¿Mãẽteara cãrẽda edaɗi?–
28 Jesuba panusia:
–Wãrã arada mʉ̃a jaraya: Ãcõrẽba ne jũma djiwiɗi oi ewariɗe mʉ̃, Naʉ̃ Djara Edaɗara mʉ̃ bugue biya quiruɗe chũmeya. Maʉ̃ne bãrã mʉ̃ ume nĩnara doce bugueɗe chũpanenia Israelɗeba yõpeɗaɗa doce puruɗebema bororãda ɓeaɗi bẽrã. 29 Mʉ̃ carea bariduaba idji deda, djabarãda, djabawẽrãrãda, zezada, papada, quimada, warrarãda, ẽjũãda ameibʉrʉ, idjia amena cãyãbara cien edaya idjaɓa Ãcõrẽ ume ewariza zocai ɓaya.* 30 Mãwã dji jĩrũarebemada dji nabemarãda ɓeaɗia, dji nabemarãda dji jĩrũarebemada ɓeaɗia.