Luca

Pẽdra wẽrãba mĩã sẽna

18 Jesuba ne jara ɓʉɗeba jaradiasia Ãcõrẽa sẽnaẽ́ iwiɗiɗida panʉda. 2 Nãwã jarasia:

–Puruɗe cawa obarida ɓasia. Idjia Ãcõrẽda, ẽberã siɗa wayaca basía. 3 Ara maʉ̃ puruɗe pẽdra wẽrãda ɓasia. Maʉ̃gʉra dewara ume nẽbʉra bara ɓasia. Maʉ̃ bẽrã ewariza wãbadjia cawa obariba carebamãrẽã. 4 18:4-5 Baribʉrʉ wãbʉrʉza cawa obariba idjia jara ɓʉra ũrĩ quĩrĩãca basía. Mãwãmĩna jũmawãyã mĩã sẽ ɓʉ bẽrã ara idjiduɓa jarasia: “Mʉ̃a Ãcõrẽda, ẽberã siɗa wayacaa. Baribʉrʉ naʉ̃ wẽrãra baridua ze ɓʉ bẽrã mʉ̃ sẽbi naẽna idjia iwiɗi ɓʉra oya.”– 5 –

6 Maʉ̃be Jesuba jarasia:

–Bãrãba dji cawa obari jipaẽ́ ɓʉba jaraɗara ũrĩsiɗaa. 7 Ãcõrẽba edaɗarãba diamasi ãsa biɗa quĩrã djuburia iwiɗi panʉne ¿idjia jipa o ɓʉɗeba carebaẽ́ca? ¿Dãrãica panui carea? 8 Mʉ̃a jaraya: wãrãda dãrãẽ́ne Ãcõrẽba carebaya. Baribʉrʉ mʉ̃, Naʉ̃ Djara Edaɗa zebʉrʉɗe ¿naʉ̃ ẽjũãne waɗi mʉ̃ beɗea ĩjã panʉda unune zeica?–

Pariseo idjaɓa Romanebema boro itea parata jʉrʉ pebari

9 Ʉ̃cʉrʉba ara ãdjidrʉ jipaara ɓeada crĩcha panasiɗaa. Maʉ̃ carea dewararãda igarabadjiɗaa. Jesuba ãdjirãa ne jara ɓʉɗeba nãwã jarasia:

Ẽberãda umé Ãcõrẽ de dromanaa ewari iwiɗiɗe wãsiɗaa. Aɓa pariseo basía. Dewarabemara Romanebema boro itea parata jʉrʉ pebari basía. 11 Pariseo ʉ̃ta nũmʉba ara idjiɗebemada nãwã jarasia: “Ãcõrẽ, mʉ̃a bʉ́a bia jaraya mʉ̃ra dewararã quĩrãca ɓaca bẽrã. Ãdjira ne drʉabadaa, cadjirua obadaa, daunemabadaa. Idjaɓa mʉ̃ra jari ɓʉ Romanebema boro itea parata jʉrʉ pebari quĩrãca ɓʉẽ́a. 12 Domiaza ɓarima umé ne coɗaca ewarida obaria, idjaɓa die edabʉrʉza mʉ̃a bʉ́a aɓa diabaria.”

13 Maʉ̃ne Romanebema boro itea parata jʉrʉ pebarira jĩga nũmasia. Baribʉrʉ bajãnaa acʉẽ́ basía. Ãtebʉrʉ sopuaɗeba idji so ʉ̃rʉ̃ upeɗa jarasia: “Ãcõrẽ, mʉ̃ra quĩrã djuburiadua. Mʉ̃a jũmawãyã cadjiruada obaria.”

14 Mʉ̃a bãrãa jaraya: pariseo cãyãbara maʉ̃ ẽberãra diguiɗaa wãsiɗe Ãcõrẽ quĩrãpita jipa ɓasia. Bariduada dji dromaara ɓa quĩrĩã ɓʉbʉrʉ Ãcõrẽba eɗaara ɓʉya. Aɓaʉba ara idjida eɗaara ɓʉibʉrʉ Ãcõrẽba dji dromaara ɓʉya.–

Jesuba warra zaquerã bia jara ɓʉɗa

Mateo 19:13-15; Marco 10:13-16

15 Maʉ̃ne ʉ̃cʉrʉba ãdji warra zaquerãda Jesuma enesiɗaa idji jʉwada ʉ̃rʉ̃ ɓʉpeɗa bia jara ɓʉmãrẽã. Jesu ume nĩbabadarãba maʉ̃ unusiɗaɗe djibarirãda quẽãsiɗaa. 16 Baribʉrʉ Jesuba warrarãra trʉ̃cuapeɗa idji ume nĩbabadarãa jarasia:

–Idu warra zaquerãra mʉ̃maa zebiɗadua, Ãcõrẽba pe eroɓʉɗebemara ãdjirã quĩrãca panʉ bẽrã. 17 Mʉ̃a wãrãda jaraya: warra zaqueba idji zeza ẽpẽbari quĩrãca aɓaʉba Ãcõrẽda ẽpẽẽ́bʉrʉ, maʉ̃ ẽberãra Ãcõrẽba pe eroɓaẽ́a.–

Parata bara ɓʉ Jesu ume beɗeaɗa

Mateo 19:16-30; Marco 10:17-31

18 Ẽberã dji droma ɓʉba Jesua iwiɗisia:

–Jaradiabari bia, Ãcõrẽ ume ewariza zocai ɓai carea ¿mʉ̃a cãrẽda oida ɓʉ?–

19 Jesuba idjía jarasia:

–¿Cãrẽ cãrẽã mʉ̃ra dji biaaɗa a ɓʉ? Ni aɓaʉda dji biaẽ́a, aɓabe Ãcõrẽdrʉ dji biaa. 20 Bʉa cawa ɓʉa Ãcõrẽba obi ɓʉ beɗeara. Nãwã jara ɓʉa: daunemarãdua, mĩã bearãdua, ne drʉarãdua, sewaɗeba djãrãra biẽ́ jararãdua, bʉ zezara bʉ papa siɗa wayadua.–*

21 Dji ẽberãba panusia:

–Cũdra eɗaʉba mʉ̃a jũma maʉ̃gʉra o ɓʉa.–

22 Maʉ̃ ũrĩpeɗa Jesuba idjía jarasia:

–Waɗi bʉa ne aɓa oida ɓʉa: bʉa ne eroɓʉra jũma nẽdobuepeɗa dji paratara ne neẽ́ queɗeaa diadua. Mãwã nebiada bajãne eroɓaya. Maʉ̃be mʉ̃ ume nĩbaɗe zedua.–

23 Maʉ̃ ũrĩsiɗe dji ẽberãra bio sopuasia bio bara ɓʉ bẽrã. 24 Jesuba idjira mãwã ɓʉda unusiɗe nãwã jarasia:*

–Wãrãda bio zarea ɓʉa ẽberã ne bara ɓʉba Ãcõrẽra idji Boroda ɓʉi carea. 25 Ne bara ɓʉba Ãcõrẽra idji Boroda ɓʉi cãyãbara cameyoda ãguja uriaɗe eɗa wãichaara ɓʉa.–

26 Maʉ̃ ũrĩpeɗaɗaba iwiɗisiɗaa:

–Mãwãra Ãcõrẽba ¿caidrʉ ẽdrʉ edai?–

27 Jesuba panusia:

–Ẽberãba poya ocara Ãcõrẽmaarã oicha ɓʉa.–

28 Maʉ̃ne Pedroba jarasia:

–Bʉ ẽpẽni carea daiba ne jũmada amesiɗaa.–

29 18:29-30 Jesuba ãdjía jarasia:

–Mʉ̃a wãrãda jaraya: aɓaʉba Ãcõrẽda idji Boro ɓʉi carea idji deda, djibarirãda, djabarãda, quimada, warrarã siɗa ameibʉrʉ, idjia amena cãyãbara naʉ̃ ewariɗe bio auɗuara edaya. Idjaɓa jĩrũarebema ewariɗe Ãcõrẽ ume ewariza zocai ɓaya.–

Jesuba idji beaɗiɗebema waya jaraɗa

Mateo 20:17-19; Marco 10:32-34

31 Jesuba doce edaɗarãra awara edepeɗa jarasia:

–Ãcõrẽneba beɗeabadarãba mʉ̃, Naʉ̃ Djara Edaɗaɗebemada cartaɗe ɓʉsiɗaa. Dadjirã Jerusaleʉ̃ne jũẽbʉdaɗe ãdjia ɓʉpeɗaɗara jũma mãwãya. 32 Ʉ̃cʉrʉba mʉ̃ra judiorãẽ́a jida diaɗia. Mʉ̃ra ipiɗa biẽ́ jaraɗia idjaɓa mʉ̃ quĩrãdarrara iɗoɗia.* 33 Maʉ̃be mʉ̃ra uɗapeɗa beaɗia. Baribʉrʉ ewari ũbeaɗe mʉ̃ra ʉ̃rẽbaya.–

34 Maʉ̃gʉɗebemada ãdjirãba ni maãrĩ biɗa cawaɗaẽ́ basía. Ãdjia cawa crĩchaɗaẽ́ bẽrã adua panasiɗaa idjia cãrẽda jara ɓʉda.

Jesuba dauɓerrea ɓʉ biabiɗa

Mateo 20:29-34; Marco 10:46-52

35 Jesu Jerico puru caita jũẽbʉrʉɗe ẽberã dauɓerrea ɓʉda o icawa parata iwiɗi ɓʉda chũmasia. 36 Idjia ẽberãrã ɓʉga zebʉdada ũrĩsiɗe iwiɗisia cãrẽ cãrẽã mãwã duanʉda. 37 Maʉ̃ne ʉ̃cʉrʉba jarasiɗaa:

–Jesu Nazareɗebemada zebʉrʉ bẽrã ɓʉga duanʉa.–

38 Maʉ̃ carea dauɓerrea ɓʉra jĩgua ɓiasia:

–¡Jesu, Daviɗeba zeɗa, mʉ̃ra quĩrã djuburiadua!–

39 Idjira Jesu nocoare wãbʉdarãba quẽãsiɗaa chupeamãrẽã. Baribʉrʉ jĩguaara ɓiasia:

–¡Daviɗeba zeɗa, mʉ̃da quĩrã djuburiadua!–

40 Maʉ̃ ũrĩsiɗe Jesura nũmesia. Maʉ̃be dauɓerrea ɓʉra caita enebipeɗa iwiɗisia:

¿Cãrẽda quĩrĩã ɓʉ mʉ̃a oida?–

Dauɓerrea ɓʉba panusia:

–Mʉ̃ Boro, mʉ̃ dauba unuida quĩrĩã ɓʉa.–

42 Jesuba jarasia:

–Unu ɓedua. Bʉa ĩjãna bẽrã biasia.–

43 Ara maʉ̃da unu ɓepeɗa Jesu caiɗu nĩbaɗe wãsia. Idjia Ãcõrẽra bio bia jara nĩbasia. Maʉ̃ unupeɗaɗarã biɗa Ãcõrẽra bia jara panesiɗaa.