Mateo
Dadji bia ɓeaɗi Jesuba jaraɗa
5 Ẽberãrã zocãrã unusiɗe Jesura eyaɗe ʉ̃taa wãpeɗa chũmesia. Maʉ̃ne idji ume nĩbabadarãda idjimaa zesiɗaa. 2 Maʉ̃be Jesuba nãwã jaradiasia:
3 Bãrãba ara bãduɓa dji biaẽ́da cawa panʉbʉrʉ, bio bia panʉa Bajãne Ɓʉba pe eroɓʉ bẽrã.
4 Bãrãda sopua ɓeabʉrʉ, bio bia panʉa Ãcõrẽba maʉ̃ sopuara jõbi bẽrã.
5 Bãrãba dji dromada ɓeaɗi carea jʉrʉɗaẽ́bʉrʉ, bio bia panʉa Ãcõrẽba bãrãa jũma naʉ̃ ẽjũãra diai bẽrã.
6 Wãrãda soɗeba jipa o quĩrĩã ɓeaɗibʉrʉ, bio bia panʉa bãrãba quĩrĩã ɓeara Ãcõrẽba diai bẽrã.
7 Bãrãda quĩrã djuburiaya ɓeaɗibʉrʉ, bio bia panʉa Ãcõrẽba quĩrã djuburiai bẽrã.
8 Bãrãra soɗeba aɓabe Ãcõrẽ itea ɓeabʉrʉ bio bia panʉa Ãcõrẽra ununi bẽrã.
9 Bãrãba jũmarãda ãbaa necai ɓeaɗamãrẽã o ɓeabʉrʉ, bio bia panʉa Ãcõrẽ warrarãana aɗi bẽrã.
10 Bãrã jipa ɓea carea dewararãba biẽ́ oɗibʉrʉ, bãrãra bio bia panʉa Bajãne Ɓʉba pe eroɓʉ bẽrã.
11 Bãrãda mʉ̃ carea biẽ́ jaraɗibʉrʉ, biẽ́ oɗibʉrʉ, idjaɓa quĩrãtanoa sewaɗeba biẽ́ jaraɗibʉrʉ, bio bia panʉa.
12 Bio capipia ɓeaɗadua, bãrãba nebia waiɓʉada bajãne eropanʉ bẽrã.
Drõãenabema ewariɗe biɗa Ãcõrẽneba beɗeabadarãda ara maʉ̃ quĩrãca biẽ́ oɗi carea ẽpẽsiɗaa.
Tã idjaɓa ʉ̃naa
13 Bãrãra naʉ̃ ẽjũãne tã quĩrãca panʉa.* Baribʉrʉ tã cʉyada jõibʉrʉ ¿sãwã wayacusa cʉya ɓei? Aɓeɗa biẽ́ ɓeya. Biara ɓʉa dajadaa ɓatabueɗida ʉ̃rʉ̃ tʉgaɗamãrẽã. 14 Bãrãra ʉ̃naa quĩrãca ɓeaa, naʉ̃ ẽjũãne ɓeaba bãrãneba Ãcõrẽnebemada unu panʉ bẽrã. Puru eyaɗe ɓʉda ¿sãwã mẽrãni? 15 Ni aɓaʉba ĩbĩrãda coaɗapeɗa epeɗeco droma edre ɓʉɗacaa. Ãtebʉrʉ ʉ̃tʉ dji ɓʉbadaɗe nũmʉbadaa jũma dji dejãne ɓeara ʉ̃naane ɓeaɗamãrẽã. 16 Ara maʉ̃ quĩrãca ẽberãrã quĩrãpita biada o pananadua ãdjirãba dadji Zeza bajãne ɓʉ́a bia beɗeaɗamãrẽã.
Ãcõrẽba Moisea diaɗa ley jũma oɗiɗebema
17 Crĩcharãnadua mʉ̃ra zesida Ãcõrẽba Moisea diaɗa leyda, Ãcõrẽneba beɗeabadarãba ɓʉpeɗaɗa siɗa ãyã ɓʉi carea. Mʉ̃ra maʉ̃ carea zeẽ́ basía, ãtebʉrʉ zesia ãdjia jara panʉda jũma ariɗe oi carea. 18 Wãrã arada mʉ̃a jaraya: naʉ̃ ẽjũã, bajã siɗa waɗi ɓʉmisa maʉ̃ leyɗebemara ni maãrĩ biɗa jõẽ́a aɓa leyba jara ɓʉra jũma mãwãbʉrʉɗaa.* 19 Maʉ̃ bẽrã bariduaba maʉ̃ leyɗebema dji eɗaara ɓʉ siɗa ĩjã oẽ́bʉrʉ, idjaɓa dewararãa aɓarica ĩjã orãnamãrẽã jaradiaibʉrʉ, idjira Ãcõrẽ puruɗe dji eɗaara quiruda ɓaya. Baribʉrʉ leyra ĩjã o ɓaibʉrʉ, idjaɓa mãwã oɗamãrẽã dewararãa jaradiaibʉrʉ, maʉ̃gʉra Ãcõrẽ puruɗe dji dromada ɓaya. 20 Wãrã arada mʉ̃a jaraya: judiorã ley jaradiabadaba o panʉ cãyãbara idjaɓa pariseorãba o panʉ cãyãbara bãrãba jipaara oɗaẽ́bʉrʉ, Bajãne Ɓʉba pe eroɓaẽ́a.
Jesuba quĩrũbiɗebema jaradiaɗa
21 Bãrãba cawa panʉa dadji drõãenaʉba nãwã jarabadada: “Mĩã bearãdua.”* Idjaɓa “mĩã beaibʉrʉ bãrã bororãba cawa oɗia.”* 22 Baribʉrʉ mʉ̃a jaraya: bariduada djãrã ume quĩrũibʉrʉ Ãcõrẽba cawa oya. Bariduaba djãrãda crĩcha neẽ́ taɓʉaɗa aibʉrʉ bãrã bororãba cawa oɗia.* Idjaɓa bariduaba djãrãda biẽ́ jaraibʉrʉ, Ãcõrẽba tʉbʉ uruaɗaa wãbiya.
23 Maʉ̃ bẽrã bʉ djabada bʉ ume quĩrũ ɓʉda quĩrãnebaibʉrʉ, bʉa animarã Ãcõrẽa babue diaɗe wãnamĩna babue diarãdua. 24 Ãtebʉrʉ dji babue diabada caita amepeɗa bʉ djaba ume ibiaɗe wãdua. Maʉ̃bebʉrʉ jẽda zepeɗa bʉ animarãra Ãcõrẽa babue diadua.
25 Bʉa oɗa carea bʉ dji quĩrũba bʉra dji cawa obarimaa edeibʉrʉ, waɗi oɗe wãbʉdaɗe jũma odua ibiaɗi carea. Mãwã oẽ́bʉrʉ, idjia bʉra dji cawa obari jʉwaɗe ɓʉya. Maʉ̃be dji cawa obariba bʉra dji zarraa jidabiya preso ɓʉmãrẽã. 26 Wãrã arada mʉ̃a jaraya: bʉra jãmabemada ẽdrʉẽ́a aɓa bʉa diaida ɓʉ parata jũma diabʉrʉɗaa.
Daunemabadaɗebema
27 Bãrãba cawa panʉa nãwã jarabadada: “Daunemarãdua.”* 28 Baribʉrʉ mʉ̃a bãrãa jaraya: bariduaba wẽrãda acʉpeɗa awuaibʉrʉ aɓeɗa maʉ̃ wẽrã ume idji soɗeba daunemasia.
29 Maʉ̃ bẽrã bʉ jʉwa araarebema dauba bʉ́a cadjiruada obibʉrʉ, maʉ̃ cadjirua o amaaba bʉ daura ẽũtapeɗa ɓatabuedua. Bʉ cacuaɗebema aɓa aduaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba jũma bʉ cacuada tʉbʉ uruaɗe ɓatabuei cãyãbara. 30 Idjaɓa bʉ jʉwa araarebemaba bʉ́a cadjiruada obibʉrʉ, maʉ̃ cadjirua o amaaba bʉ jʉwara ɓʉá tutapeɗa ɓatabuedua. Bʉ cacuaɗebema aɓa aduaimĩna ewariza Ãcõrẽ ume ɓaya. Maʉ̃da biara ɓʉa Ãcõrẽba jũma bʉ cacuada tʉbʉ uruaɗe ɓatabuei cãyãbara.
Mĩã amabadaɗebema
Mateo 19:9; Marco 10:11-12; Luca 16:18
31 Idjaɓa nãwã jarabadaa: “Bariduaba idji wẽrãda amaibʉrʉ, dji wẽrãa carta mĩã amainebemada diaida ɓʉa.”* 32 Baribʉrʉ mʉ̃a jaraya bariduaba idji wẽrãda dewara ume ɓʉẽ́da amaibʉrʉ, maʉ̃gʉra dji wẽrã daunemabibʉrʉ carea beɗeaɗe ɓaya. Idjaɓa idji wẽrã amanada dewaraba edaibʉrʉ, dji edabʉrʉ umaquĩrã siɗa daunema ɓʉa.
Ãcõrẽ quĩrãpita wãrãda ne oi jaraiɗebema
33 Bãrãba cawa panʉa dadji drõãenaʉba nãwã jarabadada: “Bʉa Ãcõrẽ quĩrãpita wãrãda ne oya aibʉrʉ jũma oida ɓʉa.”* 34 Baribʉrʉ mʉ̃a jaraya: ni aɓaʉ trʉ̃neba wãrãda ne oyaɗa arãnadua. Bajã trʉ̃neba wãrãda ne oyaɗa arãnadua, bajãra Ãcõrẽ bugue quĩrãca ɓʉ bẽrã. 35 Naʉ̃ ẽjũã trʉ̃neba wãrãda ne oyaɗa arãnadua, naʉ̃ ẽjũãra Ãcõrẽ jĩrũ ɓʉbari quĩrãca ɓʉ bẽrã. Idjaɓa Jerusaleʉ̃ trʉ̃neba wãrãda ne oyaɗa arãnadua, Jerusaleʉ̃ra dadjirã Boro Ãcõrẽ puru bẽrã. 36 Idjaɓa ara bʉdji trʉ̃neba wãrãda ne oyaɗa arãdua, bʉ buɗara aɓa biɗa poya torroa oẽ́ bẽrã idjaɓa poya pãĩma oẽ́ bẽrã. 37 Bãrãba ne oɗiaɗa aɗibʉrʉ, oɗadua. Idjaɓa oɗaẽ́ana aɗibʉrʉ, orãnadua. Maʉ̃ auɗu baridua trʉ̃neba wãrãda ne oida jarabʉrʉra cadjiruaɗeba ze ɓʉa.
Bʉ biẽ́ oɗa droaiɗebema
38 Bãrãba cawa panʉa nãwã jarabadada: “Aɓaʉba djãrã dauda ãrĩsira dji mãwã oɗara aɓarica dau ãrĩnida panʉa.* Quiɗada ɓʉasira dji mãwã oɗara aɓarica quiɗa ɓʉaɗida panʉa.” 39 Baribʉrʉ mʉ̃a jaraya: bʉda biẽ́ osiɗara chupea droadua. Bariduaba bʉra uridarra dji jʉwa araarebemane uibʉrʉ, dewarabemaare biɗa idu ubidua. 40 Bʉa jʉ̃bari jãrĩ carea bariduaba bʉda dji cawa obarimaa edeibʉrʉ, idjia jãrĩ quĩrĩã ɓʉra, dewarabema siɗa idu jãrĩbidua. 41 Zarraba bʉ́a ne zʉgʉada tʉmʉa ariɗe edebibʉrʉ, idjia jaraɗa auɗu ededua. 42 Bariduaba bʉ́a ne iwiɗibʉrʉ diadua. Bariduaba bʉ́a ne iwiɗibʉrʉɗe jẽda diayaɗa aibʉrʉ, idjia iwiɗi ɓʉra wãgarãdua.
Dadji dji quĩrũ quĩrĩãida ɓʉɗebema
43 Bãrãba cawa panʉa nãwã jarabadada: “Bʉ dji biara quĩrĩãdua, baribʉrʉ bʉ ume dji quĩrũra quĩrãmadua.”* 44 Baribʉrʉ mʉ̃a jaraya: bãrã dji quĩrũra quĩrĩãnadua. Bãrã biẽ́ jarabʉdara bia jaraɗadua; bãrã quĩrãma panʉra bia oɗadua.* Ãcõrẽa iwiɗiɗadua ãdjirãra carebamãrẽã. 45 Mãwã ebuɗa ɓaya bãrã Zeza bajãne ɓʉ warrarãda. Dadji Zezaba ʉ̃mãdaura ẽberã cadjiruarã carea, dji biarã carea biɗa odjabibaria. Ẽberã jipa ɓeaẽ́ carea, dji jipa ɓea carea biɗa cuera zebibaria. 46 Baribʉrʉ bãrãba aɓabe bãrã dji biarãdrʉ quĩrĩã pananibʉrʉ, ¿cãrẽ nebiada Ãcõrẽba diai? Romanebema boro itea parata jʉrʉ pebadarã biɗa maʉ̃ quĩrãca obadaa. 47 Bãrãba aɓabe djabarãa “mẽrã” aɗibʉrʉ, ¿cãrẽ biada o panʉ? Dji Ãcõrẽ adua ɓea biɗa mãwã obadaa. 48 Maʉ̃ bẽrã jũmarãda quĩrĩã ɓeaɗadua bãrã Zeza bajãne ɓʉba jũmarã quĩrĩã ɓʉ quĩrãca.