Mateo

Jesuba aiɗa bara ɓʉ biabiɗa

Marco 1:40-45; Luca 5:12-16

8 Jesu eyaɗeba eɗaa zesiɗe ẽberãrãra zocãrã idji caiɗu wãsiɗaa. 2 Mãwã ɓʉɗe ẽberã aiɗa bara ɓʉda Jesumaa zesia.* Chĩrãboroɗe coɓepeɗa nãwã beɗea djuburiasia:

–Mʉ̃ Boro, bʉa quĩrĩã ɓʉbʉrʉ, mʉ̃ra poya biabida ɓʉa.–

3 Maʉ̃ne Jesuba jʉwa ʉ̃rʉ̃ ɓʉbʉrʉɗe jarasia:

–Mãwã o quĩrĩã ɓʉa. ¡Biadua!–

Ara maʉ̃da aiɗa bara ɓaɗara biasia. 4 Jesuba idjía jarasia:

–Bʉ biaɗara ni aɓaʉa jararãdua. Ãtebʉrʉ sacerdotemaa wãdua bʉra biasida unumãrẽã. Jãʉ̃be Moiseba jaraɗa quĩrãca ne diacuadua.* Mãwã ẽberãrãba cawaɗia bʉra wãrãda biasida.–

Jesuba sordaorã boro nezoca biabiɗa

Luca 7:1-10

5 Maʉ̃be Jesura Capernauʉ̃ puruɗaa wãsia. Jũẽsiɗe Romanebema sordaorã boroda idjimaa zesia. Maʉ̃gʉba nãwã beɗea djuburiasia:

6 –Mʉ̃ Boro, mʉ̃ nezocada diguiɗa bio cacua pua ɓʉ bẽrã cʉɗaɗe ɓʉradrʉ ɓʉa.–

7 Maʉ̃ne Jesuba jarasia:

–Idji biabi carea wãya.–

8 Baribʉrʉ sordaorã boroba jarasia:

–Mʉ̃ Boro, mʉ̃ra ẽberã biaẽ́a bʉra mʉ̃ deɗe eɗa wãmãrẽã. Baribʉrʉ mʉ̃ nezoca biamãrẽã bʉa namaʉba jaraibʉrʉ, idjira biaya. 9 Ara maʉ̃ quĩrãca mʉ̃ boroba jara ɓʉra mʉ̃a ĩjãida ɓʉa. Idjaɓa mʉ̃a jara ɓʉra sordaorã mʉ̃ jʉwaeɗa ɓeaba ĩjãnida panʉa; mʉ̃a aɓaʉa zeduaɗa aibʉrʉ zebaria; wãduaɗa aibʉrʉ, wãbaria; idjaɓa mʉ̃ nezocaa nãwã oduaɗa aibʉrʉ ara maʉ̃da idjia obaria.–

10 Maʉ̃ ũrĩsiɗe Jesuba bia crĩchasia. Maʉ̃ne idji ẽpẽ panʉrãa jarasia:

–Wãrã arada bãrãa jaraya: naʉ̃ ẽberãba bio ĩjã ɓʉ quĩrãca israelerã tãẽna ni aɓa biɗa unucaa. 11 Mʉ̃a bãrãa jaraya: ʉ̃mãdau odjabariareba idjaɓa ʉ̃mãdau ɓaebariareba drua ãĩbemarãda zocãrã zeɗia. Maʉ̃gʉrãra dadji drõãenabemarã Abrahaʉ̃ ume, Isa ume, Jacobo ume biɗa Ãcõrẽ puruɗe ne co chũpanenia. 12 Baribʉrʉ Ãcõrẽba ẽberãrã naãrã pe eroɓa quĩrĩã ɓaɗada pãĩmanaa ãyã jʉrecuaya. Mama aujĩã panania idjaɓa puaba quiɗa ĩchia panania.–

13 Maʉ̃be Jesuba sordaorã boroa jarasia:

–Diguiɗaa wãdua. Bʉa ĩjã ɓʉ quĩrãca mʉ̃a oya.–

Sordaorã boro nezocara ara maʉ̃da biasia.

Jesuba Simoʉ̃ Pedro pãcõrẽ biabiɗa

Marco 1:29-34; Luca 4:38-41

14 Maʉ̃be Jesura Pedro deɗaa wãsia. Eɗa wãsiɗe unusia Pedro pãcõrẽda cʉwamiaba cʉɗaɗe ɓʉda. 15 Maʉ̃ wẽrã jʉwara Jesuba tãsia. Ara maʉ̃da cʉwamiara dugusia. Piradrʉpeɗa ãdjira ne cobisia.

16 Queuɗacarea ẽberãrãba zocãrã jai bara ɓeada Jesumaa enesiɗaa. Maʉ̃ne Jesuba ara jarabʉrʉba dji jaira jũma ãyã jʉrecuasia. Idjaɓa cacua biẽ́ ɓeara jũma biabicuasia. 17 Mãwãsia Ãcõrẽneba beɗeabari Isaíaba jaraɗa quĩrãca. Nãwã jarasia: “Dadjirãra cacua biẽ́ ɓeasiɗe idjia biabisia, idjaɓa pua ɓeasiɗe idjia jõbisia.”*

Jesu ẽpẽ quĩrĩã panana

Luca 9:57-62

18 Jesuba ẽberãrãda zocãrã idji caita powua nũmʉda unusia. Maʉ̃ carea idji ume nĩbabadarãa amene wa quĩrãrẽ chãniana asia. 19 Baribʉrʉ wãni naẽna judiorã ley jaradiabarida Jesumaa zesia. Maʉ̃ ẽberãba jarasia:

–Jaradiabari, bʉ wãbʉrʉza mʉ̃ra bʉ ume wãya.–

20 Jesuba idjía jarasia:

–Usa pãra de bara ɓʉa, ĩbana siɗa de bara ɓʉa, baribʉrʉ mʉ̃, Naʉ̃ Djara Edaɗara sãma cãĩ siɗa neẽ́ ɓʉa.–

21 Maʉ̃ne aɓa idji ume nĩba jarasia:

–Mʉ̃ Boro, bʉ ume wãi naẽna idu mʉ̃ zezada tʉɓaribidua.–*

22 Jesuba idjía jarasia:

–Mʉ̃ ume zedua. Beu ɓearãba beuɗarãra tʉɓariɗida panʉa.–*

Jesuba amene bogozoa tumabiɗa

Marco 4:35-41; Luca 8:22-25

23 Maʉ̃be Jesura jãbaɗe ɓadopeɗa idji ume nĩbabadarã siɗa wãsiɗaa. 24 Mãwã panʉne nãũrãda dji cãbãyã puá nũmepeɗa baido bogozoara jãbaɗe eɗa wã nũmesia. Maʉ̃ne Jesura cãĩ ɓasia. 25 Maʉ̃ carea idji ume nĩbabadarãba ʉ̃rʉ̃manapeɗa nãwã jarasiɗaa:

–¡Dai Boro, carebadua! ¡Dadjirãra ɓarruboɗoɗaa!–

26 Maʉ̃ne Jesuba jarasia:

–Bãrãra ¿sãwãẽrã ne waya panʉ? Bãrãba Ãcõrẽra ĩjãnaẽ́ca ɓʉa.–

Piradrʉpeɗa Jesuba nãũrãra, baido bogozoa siɗa quẽãsia.* Ara maʉ̃da jũma tuma nũmesia. 27 Maʉ̃ne ãdjirãba cawa crĩchaɗaẽ́ basía. Nãwã jarasiɗaa:

–Naʉ̃gʉra ¿caida jãwã ɓʉ? Nãũrãba, baido bogozoa biɗa idji beɗeara ĩjãbadaa.–

Jesuba jai zocãrã ãyã jʉretaɗa

Marco 5:1-20; Luca 8:26-39

28 Maʉ̃be amene droma quĩrãrẽ chãnapeɗa Gadara druaɗe jũẽsiɗaa. Maʉ̃ne ẽberã umé jai bara panʉda beuɗarã tʉɓaribada uriaɗeba Jesumaa zesiɗaa. Maʉ̃ ẽberãra bio minijĩchia panʉ bẽrã ni aɓaʉda mamaare wãnaca basía. 29 Maʉ̃ne Jesua jĩgua ɓia jarasiɗaa:

–¡Ãcõrẽ Warra!* ¿Cãrẽ cãrẽã daira mĩã sẽ ɓʉ? ¿Dai ewari jũẽi naẽna bʉa cawa oɗe ze ɓʉca?–

30 Tʉmʉ ariɗe chinada ne co duanasiɗaa. 31 Maʉ̃ bẽrã dji jairãba Jesua nãwã beɗea djuburiasiɗaa:

–Bʉa dairãda ãyã jʉretaibʉrʉ, jari duanʉ china cacuaɗe idu eɗa wãbidua.–

32 Maʉ̃ne Jesuba jarasia:

–Wãbʉrʉɗadua.–

Ara maʉ̃da jairãra maʉ̃ ẽberãrã cacuaɗebemada ẽdrʉɗapeɗa china cacuaɗe eɗa wãbʉrʉsiɗaa. Maʉ̃ba chinara pirapoɗapeɗa perawaɗeba daiɗu tẽũcuasiɗaa. Mãwã jũma nãbʉrʉ quinisiɗaa. 33 Maʉ̃ china waga pananara daupera pira wãsiɗaa. Ãdji puruɗe jũẽnapeɗa ẽberãrã jai bara ɓeaɗa sãwãpeɗaɗada jũma nẽbʉrʉsiɗaa. 34 Maʉ̃ carea jũma dji puruɗebemarãra Jesu ɓʉmaa zesiɗaa. Ununapeɗa Jesua beɗea djuburiasiɗaa ãdji druaɗebemada ãyã wãmãrẽã.