Marco

Borocuebari Juaʉ̃nebema

Mateo 3:1-12; Luca 3:1-9, 15-17; Juaʉ̃ 1:19-28

1 1-2 Mʉ̃a beɗea bia Ãcõrẽ Warra Jesucritoɗebemada ɓʉya. Naãrã Ãcõrẽneba beɗeabari Isaíaba nãwã ɓʉsia:

Beɗea jarabarida mʉ̃a bʉ na diabueya bʉ o jarimãrẽã.* 2 –

3 Ẽberãda ẽjũã põãsa ewaraga ɓʉɗe jĩgua beɗea ɓʉa:

Ora jariɗadua dadjirã Boro bia edaɗamãrẽã.

Ora idji itea jipa jariɗadua.*

4 Ara maʉ̃ quĩrãca Borocuebari Juaʉ̃da ẽjũã põãsa ewaraga ɓʉɗe ẽberãrãa jaradia ɓesia ãdji cadjiruara igaraɗapeɗa Ãcõrẽmaa zeɗamãrẽã. Idjia jarasia mãwã osiɗara Ãcõrẽba ãdji cadjiruara quĩrãdoaida. Maʉ̃be borocueɗida panʉana abadjia. 5 Maʉ̃ne ẽberãrã Jerusaleʉ̃nebemarãda, jũma Judea druaɗebemarã siɗa Juaʉ̃maa wãbadjiɗaa. Ãdjia cadjirua opeɗaɗada idji quĩrãpita ebuɗa jarabadjiɗaa. Maʉ̃be Juaʉ̃ba ãdjirãra Jordaʉ̃ doɗe borocuebadjia.

6 Juaʉ̃ba jʉ̃barira cameyo cara oɗa basía. Idjia jʉ̃ ɓʉ trãjʉ̃barira animarã e oɗa basía. Idjia aɗichichida cobadjia idjaɓa urrajõda jõbadjia. 7 Maʉ̃ne nãwã jaradiabadjia:

–Mʉ̃ caiɗu aɓa zeya. Idjira mʉ̃ cãyãbara dji dromaara ɓʉa. Maʉ̃ bẽrã idjia jĩrũne jʉ̃ ɓʉ ẽrãi carea mʉ̃ra bia ɓʉẽ́a. 8 Wãrãda mʉ̃a bãrãra baidoba borocuesia baribʉrʉ idjiabʉrʉ Ãcõrẽ Jaureda diaya.–*

Juaʉ̃ba Jesu borocueɗa

Mateo 3:13-17; Luca 3:21-22

9 Maʉ̃ ewariɗe Jesura Nazare puruɗeba Juaʉ̃ ɓʉmaa wãsia. Nazare purura Galilea druaɗe ɓʉa. Jesu wãsiɗe Juaʉ̃ba idjira Jordaʉ̃ doɗe borocuesia. 10 Jesura doeɗaʉba drua wãbʉrʉɗe unusia bajãda ewabʉrʉda. Maʉ̃ne Ãcõrẽ Jaurera puchirã quĩrãca idji ʉ̃rʉ̃ zebʉrʉda unusia. 11 Ãcõrẽba bajãneba eɗaa nãwã beɗeasia:

–Bʉra mʉ̃ Warra quĩrĩã ɓʉ́a. Bʉ carea mʉ̃ra bio ɓʉsriɗa ɓʉa.–*

Diauruba Jesu mĩã sẽna

Mateo 4:1-11; Luca 4:1-13

12 Mamaʉba Ãcõrẽ Jaureba Jesura ẽjũã põãsa ewaraga ɓʉɗaa edesia. 13 Mama Jesura animarã cadjirua ɓea tãẽna cuarenta ewari ɓasia. Satanaba idjira mĩã sẽsia Ãcõrẽda igarabi carea. Idjaɓa Ãcõrẽ bajãnebema nezocarãba idjira ne cobisiɗaa.

Jesuba jaradia ɓeɗa

Mateo 4:12-17; Luca 4:14-15

14 Borocuebari Juaʉ̃ preso ɓeɗacarea Jesura Galilea druaɗaa wãpeɗa beɗea bia Ãcõrẽnebemada jaradiabadjia.* 15 Nãwã jarabadjia:

–Ewarira jũẽsia. Ãcõrẽra bãrã Boro bai carea zebʉrʉa.* Bãrãba cadjirua obadara igaraɗapeɗa maʉ̃ beɗea biada ĩjãnadua.–

Jesuba ɓeda ɓaribadarã trʉ̃na

Mateo 4:18-22; Luca 5:1-11

16 Jesura Galilea amene droma icawa nĩne Simoʉ̃da, dji djaba Andre siɗa unusia. Maʉ̃ ẽberãrãra ɓeda beabadarã basía. Ãdjira doeɗa ɓeda ɓari panasiɗaa. 17 Mãwã panʉne Jesuba ãdjía jarasia:

–Mʉ̃ ume zeɗadua. Bãrãba ɓeda ɓaribada quĩrãca mʉ̃a bãrãa jaradiaya ẽberãrãda mʉ̃maa enenamãrẽã.–

18 Ara maʉ̃da ãdji ɓeda ɓaribadara amenapeɗa Jesu ume wãsiɗaa.

19 Nocoɗaa wãbʉrʉɗe Jesuba Santiagoda, dji djaba Juaʉ̃ siɗa unusia. Ãdjira Zebedeo warrarã basía. Ãdjia jãbaɗe ɓeda ɓaribada cõã ɓeada ca panasiɗaa. 20 Maʉ̃ne Jesuba ãdji siɗa trʉ̃sia idji ume wãnamãrẽã. Ara maʉ̃da Santiagoba, Juaʉ̃ biɗa ãdji zeza Zebedeora idji nezocarã ume jãbaɗe amenapeɗa Jesu ume wãsiɗaa.

Jesuba jai ãyã jʉretaɗa

Luca 4:31-37

21 Ãdjirãra Capernauʉ̃ puruɗaa wãsiɗaa. Maʉ̃be ʉ̃nãũbada ewariɗe Jesura judiorã dji jʉrebada deɗaa wãpeɗa Ãcõrẽ beɗeada jaradia ɓesia. 22 Jaradia ɓʉɗe jũmarãba cawa crĩchaɗaẽ́ basía. Judiorã ley jaradiabadarã quĩrãca jaradiaẽ́ basía. Ãtebʉrʉ bio cawa ɓʉɗeba ebuɗa jaradia ɓasia. 23 Mãwã panʉne jai bara ɓʉ ẽberãda cawaẽ́ne nãwã jĩgua beɗeasia:

¡Jesu Nazareɗebema! ¿Cãrẽ cãrẽã daira mĩã sẽ ɓʉ? ¿Dai biẽ́ ɓʉi carea zesica? Mʉ̃a cawa ɓʉa bʉra caida: ¡Bʉra Ãcõrẽba diabueɗaa!–

25 Jesuba dji jaia nãwã jarasia:

–Chupeadua. Idji cacuaɗebemada ẽdrʉdua.–

26 Ara maʉ̃da jaiba dji ẽberãra wawabipeɗa, dji cãbãyã ɓiapeɗa ãyã wãsia. 27 Maʉ̃ bẽrã jũma dji arima duanʉrãba cawa crĩchaɗaẽ́ basía. Ãduɓa beɗeadrua duanesiɗaa:

–¡Ache! Jesuba jaradia ɓʉra awara ɓʉa. Bio cawa ɓʉɗeba ebuɗa jaradiabaria. Idjia jarabʉrʉra jairã biɗa ĩjã obadaa.–

28 Maʉ̃ carea jũma Galilea druaɗe dãrãẽ́ne Jesura trʉ̃ ɓʉga ɓesia.

Jesuba Simoʉ̃ Pedro pãcõrẽ biabiɗa

Mateo 8:14-17; Luca 4:38-41

29 Judiorã dji jʉrebada deɗeba ẽdrʉɗapeɗa Jesura, Santiagora, Juaʉ̃ siɗa Simoʉ̃ deɗaa wãsiɗaa. Simoʉ̃ djaba Andre siɗa mama ɓabadjia. 30 Maʉ̃ne ãdjia Jesua jarasiɗaa Simoʉ̃ pãcõrẽda cʉwamiaba cʉɗaɗe ɓʉda. 31 Jesura idji ɓʉmaa wãsia. Idji jʉwaɗe jidapeɗa piradrʉ ɓʉsia. Ara maʉ̃da cʉwamiara dugusia. Maʉ̃be Simoʉ̃ pãcõrẽba ãdjira ne cobisia.

32 Queuɗacarea ẽberãrãba cacua biẽ́ ɓeada, jai bara ɓea siɗa Jesumaa enesiɗaa. 33 Purura dji deɗe eɗa wãbadama powua nũmesia. 34 Maʉ̃ne Jesuba cacua biẽ́ ɓeara zocãrã biabisia idjaɓa jairã siɗa zocãrã ãyã jʉrecuasia. Jairãba idjida cawa panana bẽrã Jesuba chupeabibadjia.

Galileaɗe jaradia nĩbaɗa

Luca 4:42-44

35 Jesura ãsaboɗoɗe piradrʉsia. Waɗi pãĩmaena ẽberã neẽ́maa Ãcõrẽa iwiɗiɗe wãsia. 36 Maʉ̃ carea Simoʉ̃ba, idji ume panʉ biɗa Jesura jʉrʉ panasiɗaa. 37 Idji unusiɗaɗe jarasiɗaa:

–Jũmarãba bʉra jʉrʉ duanʉa.–

38 Maʉ̃ne Jesuba jarasia:

–Dewara puru ɓeaɗaa wãnia mʉ̃a jãma biɗa jaradiaida ɓʉ bẽrã. Mʉ̃ra maʉ̃ carea zesia.–

39 Mãwã jũma Galilea druaɗe pʉrrʉa wãsia. Judiorã dji jʉrebada deza jaradiabadjia. Idji wãbʉrʉma jaira ãyã jʉrecuabadjia.

Jesuba aiɗa bara ɓʉ biabiɗa

Mateo 8:1-4; Luca 5:12-16

40 Mãwã ɓʉɗe ẽberã aiɗa bara ɓʉda Jesumaa zesia.* Maʉ̃ ẽberãra chĩrãboroɗe coɓepeɗa nãwã beɗea djuburiasia:

–Bʉa quĩrĩã ɓʉbʉrʉ, mʉ̃ra poya biabida ɓʉa.–

41 Jesuba mĩã djuburi ununa bẽrã idji jʉwada ʉ̃rʉ̃ ɓʉbʉrʉɗe jarasia:

–Mãwã o quĩrĩã ɓʉa. ¡Biadua!–

42 Jesu ara mãwã beɗeabʉrʉɗe ẽberãra biasia. Dji aiɗara aɓeɗa nẽbasia. 43 1:43-44 Maʉ̃ne Jesuba idjía bio jarasia:

–Bʉ biaɗara ni aɓaʉa jararãdua. Ãtebʉrʉ sacerdotemaa wãdua bʉra biasida unumãrẽã. Jãʉ̃be Ãcõrẽ quĩrãpita bia ɓei carea Moiseba jaraɗa quĩrãca ne diacuadua.* Mãwã ẽberãrãba cawaɗia bʉra wãrãda biasida.–

Mãwã jarapeɗa Jesuba idjira wãbisia. 45 Baribʉrʉ dji ẽberãba Jesuba idji biabiɗaɗebemada jũmarãa nẽbʉrʉ wãsia. Maʉ̃ carea Jesura ni aɓaʉ puruɗe ebuɗa nĩbaca basía. Ãtebʉrʉ jĩga nĩbabadjia ẽberãrã ɓeaɗacamaa. Baribʉrʉ ẽberãrã puruzabemada idjimaa wãbadjiɗaa.