Mateo

Juda beuɗa

Hecho 1:18-19

27 Ãsaboɗoɗe jũma sacerdote bororãda judiorã dji dromarã ume ãbaa beɗea ausiɗaa Jesu beabiɗi carea. 2 Maʉ̃be idjira ẽberã Poncio Pilato abadamaa jʉwa jʉ̃ edesiɗaa. Maʉ̃ Pilatora Romanebema boroba Judea druaɗebema boroda ɓʉsia.*

3 Maʉ̃ne Judaba cawasia Jesura beaɗida. Idjiabʉrʉ jidabiɗa bẽrã bio sopuasia. Ara maʉ̃da idjia treinta parata edaɗara sacerdote bororãmaa, judiorã dji dromarãmaa biɗa jẽda diaɗe wãsia. 4 Ãdjirãa jarasia:

–Mʉ̃a ẽberã beɗea neẽ́ ɓʉda jidabiɗa bẽrã cadjiruada osia.–

Maʉ̃ne ãdjirãba jarasiɗaa:

–¿Dairãmaarã maʉ̃da sãwãi? Maʉ̃gʉra bʉɗe ɓʉa.–

5 Maʉ̃be Judaba dji paratara Ãcõrẽ de dromane eɗa cuabuesia. Puru dajadaa wãpeɗa iduɓa ojʉ̃ beusia. 6 Juda wãnacarea sacerdote bororãba maʉ̃ paratara jʉrʉ peɗapeɗa jarasiɗaa:

–Naʉ̃ paratara Ãcõrẽa diapeɗaɗa parata ume ɓʉcara panʉa, maʉ̃ba ẽberã beabiɗa bẽrã.–

7 Maʉ̃ carea beɗea auɗapeɗa maʉ̃ parataba ẽjũãda nẽdosiɗaa drua ãĩbemarã joubadada eropanani carea. Maʉ̃ ẽjũãra Zoco Cabari Ẽjũã abadjiɗaa. 8 Baribʉrʉ mamaʉba ʉ̃taa Oa Ẽjũã abadaa. 9 Maʉ̃ra mãwãsia Ãcõrẽneba beɗeabari Jeremiaba jaraɗa quĩrãca. Nãwã jarasia: “Ãdjirãba treinta paratara edasiɗaa. Maʉ̃ nẽbʉara israelerãba idji carea ɓʉsiɗaa. 10 Maʉ̃ parataba ãdjirãba zoco cabari ẽjũãda nẽdosiɗaa Ãcõrẽba mʉ̃́a jaraɗa quĩrãca.”*

Jesu Pilato quĩrãpita ɓaɗa

Marco 15:1-5; Luca 23:1-5; Juaʉ̃ 18:28-38

11 Maʉ̃ne Jesura Pilato quĩrãpita nũmasia. Pilatoba idjía iwiɗisia:

–¿Bʉda wãrãda judiorã boroca?–

Jesuba panusia:

–Mãẽ, bʉa mãwã jara ɓʉa.–

12 Maʉ̃ne sacerdote bororãba, judiorã dji dromarã biɗa Jesura biẽ́ jarasiɗaa baribʉrʉ idjia panuẽ́ basía. 13 Maʉ̃ bẽrã Pilatoba Jesua iwiɗisia:

–Ãdjirãba bʉra ne jũmaneba biẽ́ jara duanʉa. ¿Maʉ̃ra ũrĩẽ́ ɓʉca?–

14 Baribʉrʉ Jesuba ni beɗea aɓa biɗa panuẽ́ basía.* Maʉ̃ carea Pilatoba cawa crĩchaẽ́ ɓesia.

Jesu beaɗi carea jarapeɗaɗa

Marco 15:6-20; Luca 23:13-25; Juaʉ̃ 18:38 –19:16

15 Poaza judiorãba maʉ̃ ewari droma o panʉne Pilatoba preso ɓeada aɓa ẽdrʉ ɓʉbadjia. Puruba jarabʉrʉda idjia ẽdrʉ ɓʉbadjia. 16 Maʉ̃ ewariɗe romanorãba aɓa preso eropanasiɗaa Barrabá abadada. Maʉ̃ Barrabára trʉ̃ ɓʉga ɓasia. 17 27:17-18 Pilatoba cawa ɓasia judiorã dji dromarãda Jesu ume biẽ́ duanʉ bẽrã idjira jida diasiɗada. Maʉ̃ carea dji ẽberãrã powua nũmʉ́a iwiɗisia:

–¿Caida bãrãba quĩrĩã panʉ mʉ̃a ẽdrʉ ɓʉida: Barrabáda wa Jesu, Ãcõrẽba ẽdrʉ edabari diai jaraɗamanada?–*

19 Pilatora ẽberãrã cawa obari bugueɗe chũmʉne dji quimaba naʉ̃ beɗeada idjimaa diabuesia: “Jãʉ̃ ẽberã jipa ɓʉra ẽdrʉ ɓʉdua. Iɗi idjiɗebema cãĩmocaraɗa bẽrã mʉ̃ra bio ne waya ɓʉa.”

20 Maʉ̃ne sacerdote bororãba, judiorã dji dromarã biɗa dji powua nũmʉ ẽberãrãa nãwã jarasiɗaa: “Pilatoa jaraɗadua Barrabáda ẽdrʉ ɓʉpeɗa Jesuda beamãrẽã.” 21 Mãwã panʉne Pilatoba dji powua nũmʉ́a iwiɗisia:

–Naʉ̃ umébemada ¿sãʉ̃gʉda mʉ̃a ẽdrʉ ɓʉida quĩrĩã panʉ?–

Ãdjirãba Barrabáda ẽdrʉ ɓʉduaɗa asiɗaa.

22 Pilatoba iwiɗisia:

–Mãwã baibʉrʉ mʉ̃a ¿sãwã oi Jesu, Ãcõrẽba ẽdrʉ edabari diai jaraɗamanada?–

Jũmarãba jarasiɗaa:

–¡Cruɗe cachi beabidua!–

23 Pilatoba iwiɗisia:

–¿Cãrẽ cãrẽã mãwã oi? Idjia ¿cãrẽ cadjiruada osi?–

Mãwã beɗea ɓʉɗe ãdjirãba wetara ɓʉga jara duanasiɗaa:

–¡Cruɗe cachi beabidua!–

24 Mãwã panʉne Pilatoba cawasia ẽberãrãba idji beɗeara ĩjãnaẽ́da. Maʉ̃ awara unusia ẽberãrãra wetara quĩrũbucabʉdada. Maʉ̃be baidoba idji jʉwara jũmarã quĩrãpita sʉgʉbʉrʉɗe jarasia:

–Naʉ̃ ẽberã jipa ɓʉ beabʉda carea mʉ̃ra beɗeaɗe ɓʉẽ́a.* Maʉ̃gʉra ara bãdjiɗe ɓʉa.–

25 Maʉ̃ne jũmarãba panusiɗaa:

–¡Mãẽteara daida, dai warrarã siɗa idji beabʉda carea beɗeaɗe panania!–

26 Maʉ̃be Pilatoba Barrabáda ẽdrʉ ɓʉsia. Baribʉrʉ idji sordaorãa jarasia Jesuda soaba uɗapeɗa cruɗe cachi beaɗamãrẽã.

27 Ara maʉ̃da Pilato sordaorãba Jesura de droma Pretorio abadaɗaa edesiɗaa. Mama waabema sordaorã trʉ̃napeɗa idjira jũrã edasiɗaa. 28 Maʉ̃be Jesuba cacuaɗe jʉ̃ ɓʉra ẽrãnapeɗa cacua ʉ̃rʉ̃ jʉ̃bada purea ɓʉda jʉ̃bisiɗaa. 29 Boroɓari ʉrʉ caɗada idji boroɗe wẽãju ɓʉsiɗaa idjaɓa idji jʉwa araare bacuruda diasiɗaa. Maʉ̃be idji quĩrãpita chĩrãboroɗe copanenapeɗa ipiɗa jarasiɗaa:

–¡Bio bia ɓʉa, judiorã boro!–

30 Maʉ̃be dau iɗobadjiɗaa idjaɓa bacuru idji jʉwaɗe ɓʉda jãrĩnapeɗa boroɗe ubadjiɗaa.* 31 Idjira ipiɗa biẽ́ jaraɗapeɗa ãdjia jʉ̃bipeɗaɗara wẽãsiɗaa. Maʉ̃be idjia jʉ̃ ɓaɗada wayacusa jʉ̃biɗapeɗa cruɗe cachi beaɗi carea edesiɗaa.

Jesu cruɗe cachi ɓʉpeɗaɗa

Marco 15:21-32; Luca 23:26-43; Juaʉ̃ 19:17-27

32 Mamaʉba wãsiɗaɗe sordaorãba ẽberã Simoʉ̃ abadada unusiɗaa. Idjira Cirene puruɗebema basía. Ãdjirãba maʉ̃ Simoʉ̃a Jesu cruda ataubisiɗaa. 33 Wãbʉdada ẽjũã Golgota abadama jũẽsiɗaa. Golgota trʉ̃ba jara ɓʉa Boro Ɓʉwʉrʉ. 34 Mama ãdjirãba uva ɓa asea hiel abadaɗaa pueraɗada Jesua diasiɗaa pua droamãrẽã, baribʉrʉ do zapeɗa quĩrĩãẽ́ basía.*

35 Maʉ̃be sordaorãba Jesura cruɗe cachi ɓʉsiɗaa. Mãwãnacarea ne jemenesiɗaa Jesuba cacuaɗe jʉ̃ ɓaɗara sãwã jeɗecaɗi cawaya. [Mãwã osiɗaa Ãcõrẽneba beɗeabariba jaraɗara mãwãmãrẽã. Nãwã jarasia: “Mʉ̃a cacuaɗe jʉ̃ ɓaɗara ãdjiza jeɗecasiɗaa. Mʉ̃a cacuaɗe jʉ̃ ɓaɗa carea ãdjirãra ne jemenesiɗaa sãwã jeɗecaɗi cawaya.”]* 36 Maʉ̃be chũpanenapeɗa jʉ̃ã panesiɗaa ni aɓaʉba Jesu carebaɗe zerãnamãrẽã.

37 Jesu boro nocoare beɗeada cachi jira ɓʉsiɗaa cawabiɗi carea idjira cãrẽ carea beabʉdada. Nãwã ɓʉ́ ɓasia: “Naʉ̃gʉra Jesua, judiorã boroa.” 38 Idjaɓa ne drʉabadada umé Jesu caita cruɗe cachi jira ɓʉsiɗaa, aɓa idji jʉwa araare, aɓa idji jʉwa acʉare. 39 Maʉ̃ne ʉ̃cʉrʉ ẽberãrãda caita wãnapeɗa boro ʉ̃rãtʉ ʉ̃rãtʉɗapeɗa Jesua nãwã biẽ́ beɗeabadjiɗaa:*

Bʉa Ãcõrẽ de dromara ãrĩpeɗa ewari ũbeaɗe wayacusa poya oibʉrʉ, ¡ara bʉduɓa ẽdrʉdua! Bʉda Ãcõrẽ Warrabʉrʉ, jãʉ̃ cruɗeba uɗaa zedua.–

41 Ara maʉ̃ quĩrãca sacerdote bororãba, judiorã ley jaradiabadarãba, judiorã dji dromarã biɗa Jesura ipiɗa biẽ́ jarabadjiɗaa:

Idjia dewararãda carebasia, baribʉrʉ ara iduɓa poya ẽdrʉẽ́a.* Idjida Israelɗebema Borobʉrʉ, nawena jãʉ̃ cruɗeba uɗaa zeida ɓʉa. Mãwãbʉrʉ ĩjãnia. 43 Idjia crĩcha ɓʉa Ãcõrẽra idji ume ɓʉda. ¿Idjira Ãcõrẽ Warraaɗa aẽ́ basica? Mãẽteara Ãcõrẽba idjira wãrãda quĩrĩã ɓʉbʉrʉ, ara nawena ẽdrʉ ɓʉida ɓʉa.–*

44 Idjaɓa ne drʉabada idji caita cruɗe cachipeɗaɗa biɗa ara maʉ̃ quĩrãca biẽ́ jarasiɗaa.

Jesu cruɗe beuɗa

Marco 15:33-41; Luca 23:44-49; Juaʉ̃ 19:28-30

45 Umatipa ʉ̃mãdaura quisia.* Maʉ̃ba naʉ̃ ẽjũãra hora ũbea jũma pãĩma nũmasia. 46 Hora ũbea baɗacarea Jesuba jĩgua jarasia:

–¿Eli, Eli, lama sabactani?–

Maʉ̃ arameo beɗeaba jara ɓʉa: “Mʉ̃ Ãcõrẽ, mʉ̃ Ãcõrẽ ¿cãrẽ cãrẽã mʉ̃duɓa ɓeesi?”*

47 Maʉ̃ beɗea ũrĩbʉdaɗe ʉ̃cʉrʉ mama caita duanʉba jarasiɗaa:

–Idjia Elíada trʉ̃ ɓʉa.–

48 Ara maʉ̃da aɓa isabe pira wãpeɗa uva ɓa oregueada mõda quiruɗe dodoba edasia. Bacuruɗe jʉ̃peɗa Jesua diasia domãrẽã.* 49 Baribʉrʉ dewararãba jarasiɗaa:

–Jʉ̃ãdua, acʉɗia Elíaba ẽdrʉ edaɗe zei cawaya.–

50 Mãwã ɓʉɗe Jesura wayacusa jĩgua ɓiasia. Maʉ̃bebʉrʉ jaiɗasia. 51 Ara mãwãbʉrʉɗe Ãcõrẽ de dromane eɗa wua eatʉ jira ɓʉda ẽsidra ʉ̃tʉba eɗaa cõã dogosia. Idjaɓa de uremiada wãsia.* Maʉ̃ba mõgarara dracuasia. 52 Bẽwãrã uriara ewacuasia. Maʉ̃ne Ãcõrẽ ĩjã ɓea beupeɗaɗada zocãrã ʉ̃rẽbacuasiɗaa. 53 Ãdji ɓeaɗa uriaɗeba ẽdrʉcuasiɗaa. Jesu ʉ̃rẽbaɗacarea Ãcõrẽ itea ɓʉ puru Jerusaleʉ̃naa wãsiɗaa. Mama zocãrãba ãdjirãra unusiɗaa.

54 Romanebema sordaorã boroba, idji sordaorã biɗa Jesura jʉ̃ã panasiɗaa ni aɓaʉba carebarãnamãrẽã. Baribʉrʉ de uremiaba mãwãcuabʉrʉ unusiɗaɗe bio dauperaɗapeɗa jarasiɗaa:

–Wãrãda naʉ̃ ẽberãra Ãcõrẽ Warra basía.–

55 Maʉ̃ne zocãrã wẽrãrãba tʉmʉba acʉ duanasiɗaa. Jesu Galileaɗeba zesiɗe idji careba nĩbasiɗaa. 56 Ãdjirã tãẽna Maria Magdalenada, Zebedeo quima siɗa panasiɗaa. Dewarabema Maria siɗa ɓasia. Maʉ̃gʉ Mariara Santiagoba, Jose biɗa ãdji papa basía.

Jesu tʉɓaripeɗaɗa

Marco 15:42-47; Luca 23:50-56; Juaʉ̃ 19:38-42

57 Queuboɗoɗe ẽberã parata bara ɓʉ Jose abadada zesia. Maʉ̃ Josera Arimatea puruɗebema basía.* Idji siɗa Jesu ume nĩbabadjia. 58 Idjira Pilatomaa wãpeɗa Jesu cacuada iwiɗisia tʉɓari carea. Maʉ̃be Pilatoba diabisia. 59 Ara maʉ̃da Joseba Jesura edapeɗa boroɓa mititiaẽ́ ɓʉba bʉrá ɓʉsia. 60 Maʉ̃be mõjẽ uria djiwiɗi coroɗaɗe eɗa ɓʉsia. Dji uriara maʉ̃ Joseɗe basía. Maʉ̃be mõgara waiɓʉaba uriara jũãtrʉ ɓʉpeɗa wãsia. 61 Jesu tʉɓarisiɗaɗe Maria Magdalenara, dewarabema Maria siɗa arima chũpanasiɗaa.

Pilatoba sordaorãa Jesu tʉɓariɗa jʉ̃ãbiɗa

62 Nurẽma ʉ̃nãũbada ewari basía. Maʉ̃ne sacerdote bororãda, pariseorã siɗa ãbaa Pilatomaa wãnapeɗa jarasiɗaa:

Dai boro, daiba quĩrãneba panʉa jãʉ̃ ẽberã sewaiɗa ɓʉ waɗi zocai ɓasiɗe nãwã jarasida: “Mʉ̃ra ewari ũbeaɗe ʉ̃rẽbaya.” 64 Maʉ̃ carea idji tʉɓariɗara ewari ũbea bio jʉ̃ãbidua idji ume nĩbabadarãba diamasi zeɗapeɗa idjira ederãnamãrẽã. Mãwãbʉrʉ ãdjirãba purua poya jaraɗaẽ́a idjira beu ɓaɗada ʉ̃rẽbasida. Ãdjia ʉ̃rẽbasiaɗa aɗibʉrʉ, idjia naãrã sewa oɗa cãyãbara maʉ̃gʉ sewaɗeba purura biara cũrũga eropanania.–

65 Pilatoba ãdjirãa jarasia:

–Za duanʉ sordaorãda idji tʉɓariɗamaa edeɗapeɗa bio jʉ̃ãbiɗadua.–

66 Ara maʉ̃da sordaorãba dji uria jũãtrʉ ɓʉ mõgara ʉ̃rʉ̃ sẽyãda ɓʉsiɗaa aɓaʉba ewasira cawaɗi carea. Maʉ̃be jʉ̃ã panesiɗaa.