Luca

Ɓeda quenapeɗaɗa

Mateo 4:18-22; Marco 1:16-20

5 Ewari aɓa Jesura amene droma Genesare abada icawa ɓasia.* Maʉ̃ne Ãcõrẽ beɗea jaradia ɓʉ ũrĩni carea ẽberãrãra zocãrã idjima powua duanasiɗaa. 2 Arima do icawa jãbada umé ũ panasiɗaa. Maʉ̃ jãba djibarirãba ãdji ɓeda jidabadada caita sʉgʉ panasiɗaa. 3 Maʉ̃ne Jesura Simoʉ̃ Pedro jãbaɗe ɓadopeɗa jarasia quẽsaarabe edemãrẽã. Maʉ̃be jãbaɗe chũmepeɗa jũma arima duanʉrãa jaradia ɓesia. 4 Jaradiaɗacarea Jesuba Simoʉ̃a jarasia:

–Jãʉ̃be bʉ jãbara do quẽsaara edepeɗa ɓeda ɓariɗadua.–

5 Baribʉrʉ Simoʉ̃ba panusia:

–Jaradiabari, daira diamasi ɓeda ɓari panʉda ʉ̃nadrʉsiɗaa. Mãwãmĩna ni cãrẽ siɗa jidaɗaẽ́ basía. Baribʉrʉ bʉa mãwã jara ɓʉ bẽrã ĩjãya.–

6 Ara maʉ̃da ãdjira ɓeda ɓarisiɗaa. Bio zocãrã jidabʉda bẽrã dji ɓeda jidabadara cõãbʉrʉ basía. 7 Maʉ̃ carea dewara jãbaɗe ɓeada jʉwaba trʉ̃siɗaa carebaɗe zeɗamãrẽã. Zeɗapeɗa jãbara umena ɓedaba birasiɗaa. Maʉ̃ba biru ɓaeboɗoɗa basía. 8 5:8-10 Simoʉ̃ Pedroba idji ume panʉ biɗa ɓeda zocãrã jidapeɗaɗa unusiɗaɗe cawa crĩchaɗaẽ́ basía. Idji ume panʉra Santiago idjaɓa Juaʉ̃ basía. Ãdjira Zebedeo warrarã basía. Maʉ̃ne Simoʉ̃ra Jesu caita wãpeɗa chĩrãboroɗe coɓepeɗa jarasia:

–Mʉ̃ Boro, biara ɓʉa bʉra mʉ̃ caitabemada ãyã wãida, mʉ̃ra cadjirua obari bẽrã.–

Jesuba Simoʉ̃a jarasia:

–Dauperarãdua, iɗiba ʉ̃taa bʉra mʉ̃ itea ẽberã enebarida ɓeya.– 9 –

11 Ãdjirãba jãbara doyaa enenapeɗa jũma amesiɗaa. Maʉ̃be Jesu ume wãsiɗaa.

Jesuba aiɗa bara ɓʉ biabiɗa

Mateo 8:1-4; Marco 1:40-44

12 Ewari aɓa Jesura puruɗe ɓasia. Maʉ̃ne ẽberã aiɗaba jũma bira ɓʉda jũẽsia.* Maʉ̃ ẽberãba Jesu unusiɗe idji quĩrãpita chĩrãboroɗe ɓarru coɓepeɗa nãwã quĩrã djuburiada iwiɗisia:

–Mʉ̃ Boro, bʉa quĩrĩã ɓʉbʉrʉ, mʉ̃ra poya biabida ɓʉa.–

13 Maʉ̃ne Jesuba jʉwa ʉ̃rʉ̃ ɓʉbʉrʉɗe jarasia:

–Mãwã o quĩrĩã ɓʉa. ¡Biadua!–

Ara maʉ̃da aiɗara anisia. 14 Maʉ̃ne Jesuba idjía jarasia:

–Bʉ biaɗara ni aɓaʉa jararãdua. Ãtebʉrʉ sacerdotemaa wãdua bʉra biasida unumãrẽã. Jãʉ̃be Ãcõrẽ quĩrãpita bia ɓei carea Moiseba jaraɗa quĩrãca ne diacuadua.* Mãwã ẽberãrãba cawaɗia bʉra wãrãda biasida.–

15 Baribʉrʉ Jesura trʉ̃ ɓʉgaara wãsia. Maʉ̃ bẽrã ẽberãrãra zocãrã zebadjiɗaa idjia jaradia ɓʉ ũrĩni carea. Cacua biẽ́ ɓeara zebadjiɗaa biabicuamãrẽã. 16 Baribʉrʉ Jesura eɗauɗe ẽberã neẽ́maa wãbadjia Ãcõrẽa beɗeai carea.

Jesuba ẽberã cacua beu ɓʉ biabiɗa

Mateo 9:1-8; Marco 2:1-12

17 Ewari aɓa Jesuba jaradia ɓʉɗe pariseorãda, judiorã ley jaradiabadarã siɗa arima duanasiɗaa. Ãdjirãra Galilea druaɗeba, Judea druaɗeba idjaɓa Jerusaleʉ̃ puruɗeba zepeɗaɗa basía. Maʉ̃ne Ãcõrẽ ʉɓʉaɗeba Jesuba cacua biẽ́ ɓeara biabibadjia. 18 Mãwã ɓʉɗe ʉ̃cʉrʉba ẽberã cacua beu ɓʉda idji cʉɗaɗe enenapeɗa eɗa ede quĩrĩã panasiɗaa Jesu quĩrãpita ɓʉɗi carea. 19 Baribʉrʉ ẽberãrã cãbana nũmʉ bẽrã poya Jesuma jũẽbiɗaẽ́ basía. Maʉ̃ carea ãdjirãba dji cacua beu ɓʉra de ʉ̃rʉ̃ edesiɗaa. Maʉ̃be de ʉ̃rʉ̃bemada ogaɗapeɗa dji cacua beu ɓʉra dji cʉɗaɗeba eɗaa ɓʉsiɗaa. Ẽberãrã ẽsi Jesu quĩrãpita ɓʉsiɗaa. 20 Jesuba unusia ãdjia wãrãda ĩjã panʉda idjia cacua beu ɓʉra poya biabida. Maʉ̃ carea dji cacua beu ɓʉ́a nãwã jarasia:

–Ache, bʉa cadjirua oɗara mʉ̃a quĩrãdoasia.–

21 Maʉ̃ ũrĩsiɗaɗe arima duanʉ pariseorãba, judiorã ley jaradiabadarã biɗa nãwã crĩchasiɗaa:

“Idjira ¿caida crĩcha ɓʉ? ¿Cãrẽ cãrẽã mãwã Ãcõrẽ quĩrãpita biẽ́ beɗea ɓʉ? Aɓa Ãcõrẽbʉrʉ ẽberãba cadjirua oɗara poya quĩrãdoaya.”

22 Baribʉrʉ Jesuba ãdjia crĩcha panʉra cawaɗa bẽrã nãwã iwiɗisia:

–¿Cãrẽ cãrẽã bãrã soɗe jãwã crĩcha panʉ? 23 Bãrãmaarã ¿sãʉ̃gʉda zareaara ɓʉ? ¿Cadjirua oɗara quĩrãdoayaɗa aida wa naʉ̃ ẽberã cacua beu ɓʉra piradrʉbipeɗa nĩbabida? 24 Ãcõrẽba mʉ̃, Naʉ̃ Djara Edaɗara ɓʉsia naʉ̃ ẽjũãne duanʉba cadjirua obadara quĩrãdoamãrẽã. Maʉ̃ra bãrãa unubiya.–

Ara maʉ̃da dji cacua beu ɓʉ́a nãwã jarasia:

–Piradrʉdua. Bʉ cʉɗara edapeɗa diguiɗaa wãdua.–

25 Ara mãwã jarabʉrʉɗe cacua beu ɓaɗara piraɓaripeɗa idji cʉɗara edapeɗa jũmarã quĩrãpita nĩbaɗe wãsia. Maʉ̃be Ãcõrẽra bio bia jara ɓʉda diguiɗaa wãsia. 26 Maʉ̃ unusiɗaɗe jũmarãba cawa crĩchaɗaẽ́ basía. Maʉ̃ bẽrã Ãcõrẽra bio bia jarasiɗaa. Ãcõrẽ wayaaɗeba jarasiɗaa:

–¡Iɗi wãrãda ne ununaca waiɓʉada unusiɗaa!–

Jesuba Levi trʉ̃na

Mateo 9:9-13; Marco 2:13-17

27 Mãwãnacarea Jesu wãbʉrʉɗe parata Romanebema boro itea jʉrʉ pebarida unusia. Idji trʉ̃ra Levi abadjiɗaa. Maʉ̃ ẽberãra parata diabada deɗe chũmasia. Jesuba unupeɗa jarasia:

–Mʉ̃ ume zedua.–

28 Ara maʉ̃da Levira piradrʉpeɗa idjia o ɓaɗara amepeɗa Jesu ume wãsia.

29 Maʉ̃be Jesu carea Leviba idji deɗe ne coɗi waiɓʉada osia. Zocãrã Romanebema boro itea parata jʉrʉ pebadarãda, dewara ẽberãrã siɗa ãdji ume ne co panasiɗaa. 30 Maʉ̃ unusiɗaɗe judiorã ley jaradiabadarãba, pariseorã biɗa Jesu ume nĩbabadarãa nãwã biẽ́ jarasiɗaa:

–¿Cãrẽ cãrẽã parata jʉrʉ pebadarã ume idjaɓa dewara cadjirua obadarã ume biɗa ãbaa ne co panʉ?–

31 Jesuba ãdjía jarasia:

–Cacua bia ɓeaba nẽãrã diabarira jʉrʉɗacaa. Aɓabe cacua biẽ́ ɓeabʉrʉ jʉrʉbadaa. 32 Mʉ̃ra jipa ɓea trʉ̃i carea zeẽ́ ɓʉa, ãtebʉrʉ cadjirua obadarãda trʉ̃ ɓʉa Ãcõrẽmaa zeɗamãrẽã.–

Ne coɗaca ewariɗebema

Mateo 9:14-17; Marco 2:18-22

33 Ʉ̃cʉrʉba Jesua jarasiɗaa:

–Borocuebari Juaʉ̃ ume nĩbabadarãba Ãcõrẽa iwiɗibʉdaɗe ara cadrʉa ne coɗaca ewarira obadaa. Ara maʉ̃ quĩrãca pariseorã ẽpẽbadarã biɗa obadaa. Baribʉrʉ bʉ ume nĩbabadarãba ¿sãwãẽrã oɗaca?–

34 Jesuba ãdjía jarasia:

–Mãwãra wẽrã edabʉrʉba ɓʉsriɗa ewari o ɓʉɗe ¿idjia eɗoɗarãa ne coɗaca ewarida obica? 35 Baribʉrʉ ewari aɓa dewara ẽberãrãba idjira ãyã edeɗia. Maʉ̃ ewariɗebʉrʉ idjia eɗoɗarãba ne coɗaca ewarira oɗia.–

36 Maʉ̃ awara Jesuba ãdjía ne jara ɓʉɗeba nãwã jarasia:

–Ni aɓaʉba wua djiwiɗida tʉɗapeɗa wua soreɗe capiruɗacaa. Mãwã oɗibʉrʉ wua djiwiɗira ãrĩya. Maʉ̃ awara dji wua djiwiɗi tʉɗara dji sore ume bia ɓeẽ́a. 37 Idjaɓa ni aɓaʉba uva ɓa djiwiɗira animarã e oɗa dji soreɗe tʉɗacaa. Mãwã oɗibʉrʉ aseabʉrʉɗe animarã e oɗa dji sorera cõãya. Maʉ̃be uva ɓara, animarã e oɗa siɗa aduaya. 38 Maʉ̃ carea uva ɓa djiwiɗira animarã e oɗa djiwiɗiɗe tʉɗida panʉa. Mãwã umena dãrã droaɗia. 39 Idjaɓa uva ɓa asea dji drõã dobʉrʉba djiwiɗira do quĩrĩãcaa. Ãtebʉrʉ jarabaria: “Uva ɓa dji drõãra djiwiɗi cãyãbara biara ɓʉa.”–