Luca

Jesu Pilato quĩrãpita ɓaɗa

Mateo 27:1-2, 11-14; Marco 15:1-5; Juaʉ̃ 18:28-38

23 Ara maʉ̃da jũma dji dromarã ãbaa dji jʉre panʉra piradrʉɗapeɗa Jesura Pilatomaa edesiɗaa.* 2 Maʉ̃be Jesura Pilato quĩrãpita nãwã biẽ́ jara duanesiɗaa:

–Dairãba ũrĩsiɗaa naʉ̃ ẽberãba dai purura quĩrũbiga ɓʉda. Romanebema boro itea parata jʉrʉ pebʉdaɗe idjia diabi ama ɓʉa. Maʉ̃ awara jara ɓʉa idjira Ãcõrẽba ẽdrʉ edabari diai jaraɗada. Maʉ̃ba idjira jũmarã boroaɗa a ɓʉa.–

3 Maʉ̃ carea Pilatoba Jesua iwiɗisia:

–¿Bʉda wãrãda judiorã boroca?–

Jesuba panusia:

–Mãẽ, bʉa mãwã jara ɓʉa.–

4 Maʉ̃be Pilatoba sacerdote bororãa, ẽberãrã arima duanʉ́a biɗa jarasia:

–Mʉ̃a unuẽ́ ɓʉa naʉ̃ ẽberãra beɗeaɗe ɓʉda.–

5 Baribʉrʉ wetara jara duanesiɗaa:

–Idjia jaradia ɓʉɗeba dai judiorãra quĩrũbiga ɓʉa. Naãrã Galilea druaɗe mãwã osia idjaɓa naʉ̃ puruɗe biɗa mãwã o ɓʉa.–

Jesu Herodemaa edepeɗaɗa

6 Maʉ̃ ũrĩsiɗe Pilatoba ãdjía iwiɗisia Jesura Galileaɗebema cawaya. 7 Mamabemada cawasiɗe Jesura Herodemaa diabuesia cawa omãrẽã.* Herodera Galileaɗe dji boro basía baribʉrʉ maʉ̃ ewariɗe Jerusaleʉ̃ puruɗe ɓasia.

8 Jesura trʉ̃ ɓʉga ɓʉ bẽrã dãrãbʉrʉ basía Herodeba idjira unu quĩrĩã ɓʉda. Maʉ̃ bẽrã Jesu unusiɗe bio ɓʉsriɗasia. Idjia unu quĩrĩã ɓasia Jesuba ne ununacada obʉrʉda. 9 Herodeba Jesua quĩrãtanoa iwiɗisia, baribʉrʉ Jesuba ni cãrẽ siɗa panuẽ́ basía. 10 Sacerdote bororãda, judiorã ley jaradiabadarã siɗa arima panasiɗaa. Ãdjia Jesura bio biẽ́ jara panasiɗaa. 11 Mãwã panʉne Herodeba idji sordaorã biɗa Jesuda ipiɗa biẽ́ jara duanasiɗaa. Djio biya quiruda Jesua jʉ̃biɗapeɗa idji carea ipiɗa duanasiɗaa. Mãwãnacarea Herodeba idjira Pilatomaa jẽda diabuesia. 12 Maʉ̃ ewariɗeba ʉ̃taa Pilatora Herode ume dji quĩrũ baɗada dji biada panesiɗaa.

Jesu beaɗi carea jarapeɗaɗa

Mateo 27:15-26; Marco 15:6-15; Juaʉ̃ 18:39 –19:16

13 Maʉ̃be Pilatoba puru bororãda, sacerdote bororãda, puru siɗa ãbaa trʉ̃cuasia. 14 Ãdjirãa nãwã jarasia:

–Bãrãba mʉ̃maa naʉ̃ ẽberãra enesiɗaa jaraɗi carea idjia purura quĩrũbiga ɓʉda; baribʉrʉ bãrã quĩrãpita bio iwiɗiɗamĩna beɗeaɗe ɓʉda unuẽ́a. 15 Herode biɗa idjira beɗeaɗe ɓʉẽ́da ununa bẽrã mʉ̃maa jẽda diabuesia. Maʉ̃ bẽrã ebuɗa ɓʉa idjira beaɗiẽ́ panʉda. 16 Aɓabe soaba ubipeɗa ẽdrʉ ɓʉya.–

17 Poaza maʉ̃ ewariɗe Pilatoba preso ɓeada aɓa ẽdrʉ ɓʉbadjia.* 18 Baribʉrʉ jũma dji powua nũmʉ ẽberãrãba nãwã ɓia jarasiɗaa:

–¡Jãʉ̃gʉra beabidua! ¡Barrabádrʉ ẽdrʉ ɓʉdua!–

19 Maʉ̃ Barrabára preso ɓasia puru quĩrũbigaɗa carea idjaɓa mĩã beaɗa carea. 20 Pilatoba Jesuda ẽdrʉ ɓʉ quĩrĩã ɓʉ bẽrã purua waya beɗeasia. 21 Mãwãmĩna waya jĩgua ɓia jarasiɗaa:

–¡Cruɗe cachi beabidua, cruɗe cachi beabidua!–

22 Maʉ̃ne Pilatoba waya ãdjía jarasia:

–¿Baribʉrʉ naʉ̃ ẽberãba cãrẽ cadjiruada osi? Idjia cadjiruara oẽ́ ɓʉa beaɗi carea. Maʉ̃ bẽrã soaba ubipeɗa ẽdrʉ ɓʉya.–

23 Baribʉrʉ ãdjirãra waɗibiɗa jĩgua ɓia duanasiɗaa Jesu cruɗe cachi beabimãrẽã. Maʉ̃ awara sacerdote bororãba ara maʉ̃ quĩrãca jĩgua jara duanesiɗaa aɓa Pilatoba ĩjãbʉrʉɗaa.* 24 Maʉ̃ bẽrã Pilatoba ãdjirãba jara panʉ quĩrãca osia. 25 Barrabába purura quĩrũbigaɗamĩna idjaɓa mĩã beaɗamĩna Pilatoba idjira ẽdrʉ ɓʉsia ẽberãrãbʉrʉ iwiɗipeɗaɗa bẽrã. Maʉ̃be ãdjia quĩrĩã panʉ quĩrãca Jesura obisia.

Jesu cruɗe cachi ɓʉpeɗaɗa

Mateo 27:32-44; Marco 15:21-32; Juaʉ̃ 19:17-27

26 Jesu cruɗe cachiɗi carea edesiɗaɗe Cirenenebema Simoʉ̃da puruɗaa zebʉrʉ basía. Jesuba cru eronĩbaɗara maʉ̃ Simoʉ̃a ataubiɗapeɗa idji caiɗu edebisiɗaa.

27 Ãdji caiɗu ẽberãrãda bio cãbana wãbʉda basía. Maʉ̃ne ʉ̃cʉrʉ wẽrãrãda Jesu carea jĩã panasiɗaa. 28 Jesuba ãdjimaa acʉpeɗa jarasia:

–Jerusaleʉ̃nebema wẽrãrã, mʉ̃ carea jĩãrãnadua; ãtebʉrʉ ara bãdji carea, bãrã warrarã carea biɗa jĩãnadua. 29 Ewari aɓa ẽberãrãba jaraɗia: “Bio bia ɓeaa wẽrãrã warra toɗacara idjaɓa ju dawaɗacara.” 30 Maʉ̃ne eyaa nãwã jaraɗia: “Dai ʉ̃rʉ̃ ɓaedua.” Dewara eyaa jaraɗia: “Daira ãnã nũmʉdua.”* 31 Ẽberãrãba mʉ̃, bacuru onoa quĩrãca ɓʉda beaɗibʉrʉ,* bacuru põ quĩrãca ɓeara ¿sãwãni?–*

32 Jesu ume cruɗe beaɗi carea ẽberã cadjiruarãda umé edesiɗaa. 33 Ẽjũã Boro Ɓʉwʉrʉ abadama jũẽsiɗaɗe Jesura cruɗe cachi jira ɓʉsiɗaa. Dji ẽberã cadjiruarã siɗa cruɗe cachi jira ɓʉsiɗaa, aɓa Jesu jʉwa araare, aɓa idji jʉwa acʉare. 34 [Maʉ̃ne Jesuba jarasia:

–Zeza, ãdjia o panʉra quĩrãdoadua. Ãdjia adua panʉa cãrẽda o panʉda.–]*

Maʉ̃ awara sordaorãra ne jemenesiɗaa Jesuba cacuaɗe jʉ̃ ɓaɗara sãwã jeɗecaɗi cawaya.*

35 Jũma maʉ̃gʉra ẽberãrãba acʉ duanasiɗaa. Maʉ̃ne dji bororãba idjira ipiɗa biẽ́ jara duanesiɗaa:

–Dewararãda carebasia.* Ãcõrẽba idjida dadjirã ẽdrʉ edamãrẽã ɓʉsibʉrʉ, ¿ara iduɓa poya ẽdrʉẽ́ca?–

36 23:36-37 Maʉ̃ awara sordaorã arima duanʉba Jesura ipiɗa biẽ́ jarabadjiɗaa. Ãdjia Jesua uva ɓa oregueada diaɗe wãnapeɗa jarabadjiɗaa:

–Bʉda wãrãda judiorã borobʉrʉ, ara bʉduɓa ẽdrʉdua.–

38 Jesu boro nocoare beɗeada cachi jira ɓʉsiɗaa cawabiɗi carea idjira cãrẽ carea beabʉdada. [Griego beɗeaɗe, latiʉ̃ beɗeaɗe, hebreoɗe biɗa] nãwã ɓʉ́ ɓasia: “Naʉ̃gʉra judiorã boroa.”*

39 Maʉ̃ne ẽberã aɓa cadjirua oɗa carea cruɗe cachipeɗaɗaba Jesura nãwã biẽ́ jarabadjia:

–Bʉda wãrãda Ãcõrẽba ẽdrʉ edabari diai jaraɗabʉrʉ, bʉduɓa ẽdrʉpeɗa dai siɗa ẽdrʉ ɓʉdua.–

40 Baribʉrʉ dewarabemaba idjira nãwã quẽãsia:

–¿Bʉ siɗa cawa o panʉmĩna waɗibiɗa Ãcõrẽra wayaẽ́ca? 41 Wãrãda dadjira nama jira pananida panʉa cadjiruada opeɗaɗa bẽrã. Baribʉrʉ za ɓʉ ẽberãba ¿cãrẽ cadjiruada osi?–

42 Maʉ̃be idjia Jesua nãwã jarasia:

–Bʉ jũmarã boroda ɓebʉrʉɗe mʉ̃ra quĩrãnebadua.–

43 Maʉ̃ carea Jesuba idjía jarasia:

–Mʉ̃a wãrãda jaraya: bʉra nane mʉ̃ ume bajãne ɓaya.–*

Jesu cruɗe beuɗa

Mateo 27:45-56; Marco 15:33-41; Juaʉ̃ 19:28-30

44 23:44-45 Umatipa ʉ̃mãdaura quisia. Maʉ̃ba naʉ̃ ẽjũãra hora ũbea jũma pãĩma nũmasia. Ãcõrẽ de dromane eɗa wua eatʉ jira ɓʉra ẽsidra cõã dogosia.* 46 Ara maʉ̃ne Jesuba jĩgua jarasia:

–Zeza, mʉ̃ jaurera bʉ jʉwaɗe ɓʉbʉrʉa.–*

Mãwã jarapeɗa ĩyãdrʉsia.

47 Maʉ̃ unusiɗe sordaorã boro arima ɓʉba Ãcõrẽra nãwã bia jarasia:

–Wãrãda naʉ̃ ẽberãra jipa ɓasia.–

48 Jesu cruɗe beabʉda acʉɗe wãpeɗaɗaba jũma mãwãnara ununapeɗa sopuaɗeba ãdji so ʉ̃rʉ̃ u duanʉda jẽda wãsiɗaa. 49 Mãwã duanʉne jũma Jesu unubadarãba, wẽrãrã Galileaɗeba idji caiɗu nĩbapeɗaɗarã biɗa tʉmʉba acʉ panasiɗaa.

Jesu tʉɓaripeɗaɗa

Mateo 27:57-61; Marco 15:42-47; Juaʉ̃ 19:38-42

50 23:50-51 Ẽberã Jose abadada ɓasia. Idjira Arimatea puru Judea druaɗebema basía. Ẽberã bia basía idjaɓa jipa ɓasia. Ãcõrẽra jũmarã Boroda ɓemãrẽã jʉ̃ã ɓasia. Idjira judiorã dji bororãnebema basía baribʉrʉ beɗea ausiɗaɗe bia ɓʉaɗa aẽ́ basía. Ãdjia opeɗaɗara biẽ́ unusia. 52 Maʉ̃ Josera Pilatomaa wãpeɗa Jesu cacuada iwiɗisia tʉɓari carea. 53 Maʉ̃be Jesura eɗaa edapeɗa boroɓaba bʉrapeɗa mõjẽ uria coroɗaɗe eɗa ɓʉsia. Maʉ̃ uria coroɗaɗe ni aɓaʉ bẽwãrãda waɗi ɓʉɗaca basía.

54 Ʉ̃nãũbada ewarira ʉ̃rʉ̃ ɓʉ bẽrã judiorãba maʉ̃ ewari carea ne jũmada o eropananida panasiɗaa.

55 Ʉ̃cʉrʉ wẽrãrã Jesu ume Galileaɗeba zepeɗaɗada Jose caiɗu wãsiɗaa. Jũẽnapeɗa mõjẽ coroɗara unusiɗaa. Idjaɓa unusiɗaa Jesura eɗa ɓʉbʉdada. 56 Mamaʉba jẽda wãnapeɗa ãdjirãba bẽwãrã pʉrʉbada querada osiɗaa. Nurẽma ʉ̃nãũsiɗaa Ãcõrẽ leyba jara ɓʉ quĩrãca.*