Luca

Jesu ʉ̃rẽbaɗa

Mateo 28:1-10; Marco 16:1-8; Juaʉ̃ 20:1-10

24 Nabema ewari domianebemane wẽrãrãra diapeɗeɗa Jesu tʉɓaripeɗaɗamaa wãsiɗaa. Ãdjia bẽwãrã pʉrʉbada quera opeɗaɗara edesiɗaa. [Ãdji ume dewara wẽrãrã siɗa wãsiɗaa.]* 2 Baribʉrʉ mõgara waiɓʉa dji uria jũãtrʉ ɓaɗara orrocawa coɓʉda unune wãsiɗaa. 3 Dji uriaɗe eɗa wãbʉdaɗe dadjirã Boro Jesu beuɗara ununaẽ́ basía. 4 Maʉ̃ carea ãdjia aɓeɗa cawa crĩchaɗaẽ́ basía. Cawaẽ́ne ãdji caita ẽberãda umé odjasiɗaa. Maʉ̃ ẽberãba cacuaɗe jʉ̃ panʉra dorrodorroa ɓasia. 5 Maʉ̃ carea wẽrãrãra bio dauperabʉdaba eɗaa ɓarrusiɗaa. Maʉ̃ne dji ẽberãrãba ãdjía jarasiɗaa:

–¿Cãrẽ cãrẽã bãrãba zocai ɓʉda beuɗarã tãẽna jʉrʉ panʉ? 6 Idjira nama ɓʉẽ́a ʉ̃rẽbaɗa bẽrã.* Waɗi Galileaɗe panasiɗaɗe idjia bãrãa jaraɗara quĩrãnebaɗadua. 7 Idjia nãwã jarasia: “Ʉ̃cʉrʉba mʉ̃, Naʉ̃ Djara Edaɗara ẽberã cadjiruarãa jida diaɗida panʉa. Mʉ̃ra cruɗe beaɗia, baribʉrʉ ewari ũbeaɗe ʉ̃rẽbaya.”–*

8 Maʉ̃nebʉrʉ ãdjirãba quĩrãnebasiɗaa Jesuba mãwã jaraɗada. 9 Ara maʉ̃da wẽrãrã jẽda wãnapeɗa Jesuba edaɗarã once panʉ́a, waabemarãa biɗa ãdjia unupeɗaɗara nẽbʉrʉsiɗaa. 10 Maria Magdalenaba, Juanaba, Santiago papa Mariaba, dewara wẽrãrã ãdji ume panʉ biɗa Jesuba edaɗarãa mãwã nẽbʉrʉsiɗaa. 11 Baribʉrʉ wẽrãrãba jara panʉra crĩcha neẽ́ ɓʉca ɓaɗa bẽrã ãdjirãba ĩjãnaẽ́ basía. 12 Mãwãmĩna Pedrora ara maʉ̃da Jesu tʉɓaripeɗaɗamaa pira wãsia. Dji uriaɗe eɗa acʉsiɗe aɓabe dji bẽwãrã bʉrá ɓaɗa wuada unusia. Maʉ̃ carea cawa crĩchaẽ́ diguiɗaa wãsia.

Emaú puruɗaa wãbada oɗe nĩbapeɗaɗa

Marco 16:12-13

13 Ara maʉ̃ ewariɗe Jesu ĩjã ɓeaɗada umé Emaú puru zaqueɗaa wãbʉda basía. Maʉ̃ purura Jerusaleʉ̃neba mĩgaẽ́ ɓʉa.* 14 Ãdjia jũma Jesu mãwãnanebemada beɗea nĩbasiɗaa. 15 Mãwã beɗea nĩnane Jesura caita zepeɗa ãdji ume nĩbasia. 16 Baribʉrʉ Jesuda mãwã ɓʉda Ãcõrẽba ãdjía idu cawabiẽ́ basía. 17 Maʉ̃ne Jesuba ãdjía iwiɗisia:

–¿Bãrãba cãrẽda jara nĩna?–

Maʉ̃ ũrĩsiɗaɗe nũpanesiɗaa. Ebuɗa ɓasia bio sopua panʉda.* 18 Aɓa Cleopa abadaba panusia:

–Zocãrã Jerusaleʉ̃ne jũẽpeɗaɗaɗebemaba ¿aɓabe bʉabʉrʉ adua ɓʉca naʉ̃ ewariɗe sãwãnada?–

19 Jesuba ãdjía iwiɗisia:

–¿Cãrẽnebemada jara panʉ?–

Ãdjia panusiɗaa:

–Jesu Nazareɗebemada jara panʉa. Idjia oɗaɗeba idjaɓa jaraɗaɗeba cawabisia idjira Ãcõrẽneba beɗeabarida. Ãcõrẽba, puru biɗa idjira bia unusiɗaa. 20 Baribʉrʉ puru bororãba, sacerdote bororã biɗa idjira cruɗe cachi beabisiɗaa. 21 Daiba crĩchasiɗaa idjiabʉrʉ dadji Israel purura biẽ́ ɓʉɗebemada ẽdrʉ ɓʉida. Mãwãmĩna idji beapeɗaɗara iɗiba ewari ũbea ɓʉa.

22 Baribʉrʉ ʉ̃cʉrʉ wẽrãrã dai tãẽnabemaba jarapeɗaɗa carea daira wetara cawa crĩchaɗaẽ́ panesiɗaa. Ãdjira iɗi diapeɗeɗa idji tʉɓaripeɗaɗamaa wãsiɗaa. 23 Dji bẽwãrãra ununaẽ́ bẽrã daimaa jaraɗe zesiɗaa ãdjia bajãnebema nezocarãda unusiɗada. Maʉ̃gʉrãba ãdjía jarasiɗamanaa Jesura ʉ̃rẽbasida. 24 Maʉ̃ carea ʉ̃cʉrʉ dairãnebemaba acʉɗe wãsiɗaa. Idji tʉɓaripeɗaɗama ara wẽrãrãba jarapeɗaɗa quĩrãca unusiɗaa. Baribʉrʉ idjida ununaẽ́ basía.–

25 Maʉ̃ carea Jesuba ãdjía jarasia:

–¡Jũma Ãcõrẽneba beɗeabadarãba jarapeɗaɗara bãrãba ĩjãna ama panʉa! ¡Bãrãra crĩcha neẽ́ panʉa! 26 ¿Ãcõrẽba ẽdrʉ edabari diai jaraɗara dji Dromada ɓei naẽna bia mĩgaida ɓasiẽ́ca?–*

27 Maʉ̃be Ãcõrẽ cartaɗe idjiɗebema ɓʉpeɗaɗada jũma cawa jarasia. Moiseba ɓʉɗada, Ãcõrẽneba beɗeabadarãba ɓʉpeɗaɗa siɗa jũma cawa jarasia.

28 Mãwã nĩnane ãdji wãbʉda puruɗe jũẽsiɗaa. Maʉ̃ne Jesura nocoɗaa wãbʉrʉ basía. 29 Baribʉrʉ ãdjirã ume ɓemãrẽã nãwã bio beɗea djuburiasiɗaa:

–Ewarira queuboɗo bẽrã wãrãdua. Dai ume ɓedua.–

Maʉ̃ bẽrã ãdji ume ɓesia. 30 Ne cobʉdaɗe Jesuba paʉ̃da edapeɗa Ãcõrẽa bia jarasia. Cõrãcuapeɗa ãdjía diasia. 31 Maʉ̃nebʉrʉ Ãcõrẽba ãdjía idu cawabisia Jesuda mãwã ɓʉda. Baribʉrʉ Jesura ara maʉ̃da nẽbasia. 32 Maʉ̃ne ãdjiduɓa nãwã jarasiɗaa:

–Idjia Ãcõrẽ beɗea cawa jara nĩbasiɗe ¿dadjira bio ɓʉsriɗa pananaẽ́ basica?–

33 Ara maʉ̃da ãdjira jẽda Jerusaleʉ̃naa wãsiɗaa. Maʉ̃ne Jesuba edaɗarã once panʉra dewararã ume ãbaa dji jʉre panʉda unune wãsiɗaa. 34 Maʉ̃gʉrãba nãwã jara panasiɗaa:

–¡Jesura wãrãda ʉ̃rẽbasia! Simoʉ̃a ara idjida unubisia.–

35 Ara maʉ̃da ãdjia biɗa nẽbʉrʉsiɗaa oɗe sãwãpeɗaɗada. Ãdjia jarasiɗaa:

–Jesuba paʉ̃ cõrãcuasiɗe daiba cawasiɗaa idjida mãwã ɓʉda.–

Jesuba edaɗarãa ara idjida unubiɗa

Mateo 28:16-20; Marco 16:14-18; Juaʉ̃ 20:19-23

36 Waɗibiɗa maʉ̃gʉɗebema beɗea duanʉne Jesuda ãdji ẽsi odjasia. [Maʉ̃be ãdjirãa jarasia:

–¡Necai pananadua!–]*

37 Maʉ̃ unusiɗaɗe ãdjirãra bio dauperasiɗaa, bẽwãrãda mãwã ɓʉda crĩchasiɗa bẽrã. 38 Baribʉrʉ Jesuba ãdjía jarasia:

–¿Cãrẽ cãrẽã bãrãra daupera panʉ? ¿Cãrẽ cãrẽã ĩjãnaẽ́ panʉ mʉ̃ra ʉ̃rẽbasida? 39 Mʉ̃ jʉwara, mʉ̃ jĩrũ siɗa acʉɗadua. Mʉ̃da jãwã ɓʉa. Mʉ̃ra tãnadua. Jaurera djara neẽ́ ɓʉa, maʉ̃ne acʉɗadua: mʉ̃ra djara bara ɓʉa.–

40 Mãwã jarapeɗa idji jʉwara, jĩrũ siɗa acʉbisia.* 41 Mãwãmĩna ɓʉsriɗaba ãdjia waɗi poya ĩjãnaẽ́ basía. Ãdjia aɓeɗa cawa crĩchaɗaẽ́ basía. Maʉ̃ carea Jesuba ãdjía nãwã iwiɗisia:

–¿Bãrãba coɗira neẽ́ panʉca?–

42 Maʉ̃ carea ãdjirãba Jesua ɓeda baɗada diasiɗaa. Urrajõ siɗa diasiɗaa.* 43 Ara maʉ̃da ãdji quĩrãpita cosia.

44 Mãwãnacarea ãdjía jarasia:

–Mʉ̃ waɗi bãrã ume ɓasiɗe jara ɓabadjia mʉ̃nebema naẽna ɓʉpeɗaɗara jũma mãwãida ɓʉda. Maʉ̃ra Moiseba ɓʉsia, Ãcõrẽneba beɗeabadarãba ɓʉsiɗaa, idjaɓa Salmo cartaɗe biɗa ɓʉ́ ɓʉa.–

45 Maʉ̃be Jesuba ãdji crĩchara ewasia Ãcõrẽ beɗea cawaɗamãrẽã. 46 Nãwã jarasia:

–Ãcõrẽ cartaɗe nãwã ɓʉ́ ɓʉa: Ãcõrẽba ẽdrʉ edabari diai jaraɗara bia mĩgaida ɓʉa. Beuɗacarea ewari ũbeaɗe ʉ̃rẽbaya. 47 Maʉ̃be idji trʉ̃neba idji ĩjã ɓeaba ẽberãrãa jaraɗia cadjiruada igaraɗapeɗa Ãcõrẽmaa zeɗamãrẽã. Mãwãbʉrʉ Ãcõrẽba ãdji cadjiruara quĩrãdoaya. Maʉ̃gʉra naãrã Jerusaleʉ̃ puruɗe jaraɗapeɗa jũma puru ɓeaza jaraɗe wãnia. 48 Ara bãdji dauba mʉ̃ mãwãnara jũma unusiɗaa. 49 Wãrãda mʉ̃a bãrãmaa mʉ̃ Zezaba diai jaraɗada diabueya. Maʉ̃ra idji Jaurea. Maʉ̃ bẽrã bãrãra nama Jerusaleʉ̃ne pananadua aɓa idji ʉɓʉa bajãneba zeida ɓʉ edabʉdaɗaa.–

Jesu bajãnaa wãna

Marco 16:19-20

50 Mãwãnacarea Jesuba ãdjirãra Jerusaleʉ̃ puru dajadaa Betania caita pe edesia. Maʉ̃be idji jʉwara ʉ̃taa wapeɗa ãdjirãra bia jarasia Ãcõrẽba careba ɓamãrẽã. 51 Mãwã beɗea ɓʉɗe Ãcõrẽba idjira bajãnaa edesia.* 52 Ãdjirãba Jesua bia beɗea pananapeɗa bio ɓʉsriɗaa Jerusaleʉ̃naa jẽda wãsiɗaa. 53 Mamaʉba ʉ̃taa ãdjirãra ewariza Ãcõrẽ de droma dajadaare wãbadjiɗaa Ãcõrẽa bia beɗeaɗi carea.*