Hecho

Paulo Epesoɗe ɓaɗa

19 Apolo Corintoɗe ɓʉmisa Paulora ẽjũã eyaiɗa ɓʉɗe wãyã wãpeɗa Epeso puruɗe jũẽsia. Mama Jesu ĩjã ɓeada ʉ̃cʉrʉ unusia. 2 Idjia maʉ̃ djabarãa iwiɗisia:

–Bãrãba Jesu ĩjãsiɗaɗe ¿Ãcõrẽ Jaurera edasiɗaca?

Ãdjirãba panusiɗaa:

–Dairãba waɗibiɗa Ãcõrẽ Jaureɗebemada ũrĩnacaa.–

3 Maʉ̃ne Pauloba iwiɗisia:

–Mãẽteara ¿sãwã borocuesiɗa?–

Ãdjirãba panusiɗaa:

–Juaʉ̃ba jaraɗa quĩrãca borocuesiɗaa.–

4 Maʉ̃ne Pauloba jarasia:

–Juaʉ̃ba jarabadjia ẽberãrãba cadjirua obadara igaraɗapeɗa Ãcõrẽmaa zeɗamãrẽã. Mãwã osiɗara idjia borocuebadjia. Maʉ̃ awara jarabadjia aɓa idji caiɗu zebʉrʉda ĩjãnamãrẽã. Maʉ̃gʉra Jesu basía.*

5 Maʉ̃ ũrĩsiɗaɗe dadji Boro Jesu trʉ̃neba borocuesiɗaa. 6 Maʉ̃be Pauloba idji jʉwa ãdji ʉ̃rʉ̃ ɓʉsiɗe Ãcõrẽ Jaurera ãdjirãmaa zesia. Maʉ̃ne dewara beɗeaɗe beɗeasiɗaa idjaɓa Ãcõrẽneba beɗeasiɗaa. 7 Jũma ãbaa ãdjira doce panasiɗaca ɓʉa.

8 Jeɗeco ũbea Paulora judiorã dji jʉrebada deɗaa wã ɓabadjia. Mama ne wayaa neẽ́ judiorã ume beɗea ɓabadjia Ãcõrẽra ãdji Boroda ɓʉɗamãrẽã. 9 Baribʉrʉ ʉ̃cʉrʉra cʉwʉrʉ zareacuaɗapeɗa ĩjãnaẽ́ basía. Ẽberãrã quĩrãpita Jesu Oɗebemada biẽ́ beɗeabadjiɗaa. Maʉ̃ carea Paulora ãdji ume ɓaɗada ãyã wãsia. Idjia Jesu ĩjã ɓeara jaradiabada deɗaa edesia. Maʉ̃ dera Tiranone basía. Mama ewariza Pauloba jaradia ɓesia. 10 Poa umé mãwã osia. Mãwã jũma Asia druaɗebema judiorãba, judiorãẽ́ biɗa dadji Boro Jesuɗebemada ũrĩsiɗaa.

Esceva warrarã sãwãpeɗaɗa

11 Ãcõrẽba zocãrã ne ununaca waiɓʉada Pauloɗeba obadjia. 12 Pauloba baridua wua tãnada ẽberãrãba cacua biẽ́ ɓeamaa edebadjiɗaa. Maʉ̃ba dji cacua biẽ́ ɓeara biabibadjiɗaa idjaɓa jairã siɗa ẽberãrã cacuaɗebemada ãyã jʉretabadjiɗaa.

13 Maʉ̃ ewariɗe ʉ̃cʉrʉ judiorãba jai ãyã jʉrecua panʉda pʉrrʉa nĩbabadjiɗaa. Maʉ̃ne dadji Boro Jesu trʉ̃neba jaira ẽberãrã cacuaɗebemada ãyã jʉreta quĩrĩãsiɗaa. Nãwã jarasiɗaa: “Pauloba jaradia ɓʉ Jesu trʉ̃neba mʉ̃a jaraya: ãyã wãdua.”

14 Mãwã o panʉra judio Esceva warrarã basía. Ãdjira siete panasiɗaa. Escevara sacerdote bororãnebema basía.* 15 Ewari aɓa jai ãyã jʉreta panʉne jaiba maʉ̃gʉrã siete ẽberãrãa jarasia:

–Jesura mʉ̃a cawa ɓʉa. Paulo siɗa mʉ̃a cawa ɓʉa. Baribʉrʉ bãrãra ¿cai?–

16 Maʉ̃be ẽberã jai bara ɓʉba ãdjira orra edapeɗa jũma poyacuasia. Bio puocuaɗa bẽrã ãdjirã cacuara jũma cõãcuasia. Maʉ̃be dji jai bara ɓʉ deɗeba ãcaɗa pira wãsiɗaa. 17 Jũma Epesoɗe ɓea judiorãba, griegorã biɗa maʉ̃ cawasiɗaɗe ne wayasiɗaa. Maʉ̃ne dadji Boro Jesu trʉ̃nebemada bia beɗeasiɗaa.

18 Maʉ̃ ewariɗe zocãrãba Jesura ĩjãsiɗaa. Maʉ̃be zeɗapeɗa ebuɗa jarasiɗaa ãdjia jaiɗeba o pananada. 19 Ʉ̃cʉrʉba ãdji carta jaiɗebemada enenapeɗa jũmarã quĩrãpita babuesiɗaa. Jũma maʉ̃gʉrã carta nẽbʉa cawasiɗaɗe cincuenta mil parata torro nẽbʉaɗe ɓasia.* 20 Mãwã Ãcõrẽba idji ʉɓʉaɗeba oɗa carea dadji Boro Jesuɗebema beɗeara tʉmʉara trʉ̃ ɓʉgasia. Maʉ̃ne Jesu ĩjã ɓeara yõ wãsiɗaa.

21 Mãwãnacarea Pauloba idji soɗeba crĩchasia Macedonia druaɗe, Acaya druaɗe biɗa pʉrrʉapeɗa Jerusaleʉ̃ puruɗaa wãida. Idjaɓa jarasia: “Jerusaleʉ̃ne ɓapeɗa mʉ̃ra Roma puruɗaa wãida ɓʉa.” 22 Maʉ̃ bẽrã idji carebabadarã Timoteoda, Erasto siɗa Macedonia druaɗaa na diabuesia baribʉrʉ idjira Asia druaɗe ɓesia.

Epesoɗe quĩrũbucapeɗaɗa

23 Ara maʉ̃ ewariɗe Jesu O carea ẽberãrãda cãbana quĩrũbucasiɗaa. 24 Maʉ̃gʉra nãwã basía: ẽberã Demetrio abadada ɓasia. Maʉ̃ ẽberãra parataɗebema ne obari basía. Deda ãdji ãcõrẽwẽrã Artemisa de droma quĩrãca djuburi ocuabadjia.* Maʉ̃ o ɓʉɗeba Demetrioba, idji ume ne obadarã biɗa parata waiɓʉa edabadjiɗaa. 25 Demetrioba maʉ̃ ẽberãrãra, dewarabema ne obadarã siɗa ãbaa dji jʉresia. Maʉ̃be nãwã jarasia:

–Achirã, bãrãba cawa panʉa dadjirãba naʉ̃ de zaque o panʉneba parata waiɓʉa edabadada. 26 Baribʉrʉ bãrãba unu panʉa idjaɓa ũrĩ panʉa jãʉ̃ Pauloba jʉwaba oɗa ãcõrẽra dji wãrãẽ́ana abarida. Idjia naʉ̃ Epesoɗe idjaɓa berara jũma Asia druaɗe biɗa mãwã jara nĩa. Maʉ̃ bẽrã zocãrã ẽberãrãba Artemisara igarabʉdaa. 27 Maʉ̃ba dadjirãba nẽdobue panʉra ẽberãrãba biẽ́ ununisicada. Artemisa de droma siɗa waa trʉ̃ ɓʉga ɓaẽ́sicada. Mãwãra Asia druaɗe, jũma naʉ̃ ẽjũãne biɗa Artemisa ẽpẽ panʉba waa dji dromada crĩchaɗaẽ́a.–

28 Maʉ̃ beɗea ũrĩsiɗaɗe bio quĩrũnapeɗa ɓia jara duanesiɗaa:

–¡Bio bia ɓʉa Artemisa Epesoɗebemara!–

29 Mãwã duanʉne jũma puruɗebemarãra cawa crĩchaɗaẽ́ piraposiɗaa. Maʉ̃ne ʉ̃cʉrʉba Paulo ume nĩbabadada umé jidaɗapeɗa puru dji jʉrebadaɗaa edesiɗaa: aɓa Gayo basía, aɓabemara Aristarco basía. Ãdjira Macedonia druaɗebema basía. 30 Paulora mama ẽberãrã ume beɗeaɗe wã quĩrĩã ɓasia, baribʉrʉ Jesu ĩjã ɓeaba iduaribiɗaẽ́ basía. 31 Maʉ̃ awara ʉ̃cʉrʉ Asiaɗebema bororãba Pauloa beɗeada diabuesiɗaa. Idji ume dji biarã bẽrã beɗea djuburiasiɗaa dji jʉrebadaɗaa wãrãmãrẽã. 32 Maʉ̃misa ãbaa dji jʉre panʉma jũmarãba cawa crĩchaɗaẽ́ bẽrã ɓʉga nũmesia. Jũmarãda quĩrã awara ɓia duanasiɗaa. Zocãrãba adua panasiɗaa cãrẽ cãrẽã ãbaa dji jʉre duanʉda.

33 Mãwã duanʉne ʉ̃cʉrʉba judio Alejandroda edasiɗaa puru quĩrãpita beɗeamãrẽã. Mãwã osiɗaa dewara judiorãba idjira nocoɗaa chãɓari edepeɗaɗa bẽrã. Maʉ̃ne Alejandroba jũmarãda jʉwaba chupeabisia. Idjia jara quĩrĩã ɓasia judiorãra beɗeaɗe panʉẽ́da.* 34 Baribʉrʉ idjira judioda cawasiɗaɗe jũmarãba nãwã dãrã ɓia jarasiɗaa:*

–¡Bio bia ɓʉa Artemisa Epesoɗebemara!–

35 Maʉ̃be Epesoɗebema carta ɓʉbariba ẽberãrã powua nũmʉra chupeabipeɗa jarasia:

–Achirã Epesoɗebema, jũmarãba cawa panʉa ãcõrẽwẽrã Artemisa de dromara, idji zaca ɓʉ bajãneba ɓaeɗa siɗa dadji puruɗe wagabadada. 36 Ni aɓaʉba maʉ̃gʉra poya sewaaɗa aɗaẽ́a. Maʉ̃ bẽrã biara ɓʉa chupeaɗida. Bio crĩchaɗaẽ́ne ni cãrẽ siɗa orãnadua. 37 Naʉ̃ ẽberãrãba dadjirã ãcõrẽwẽrã de dromane ne drʉaɗaẽ́ panʉmĩna wa idjiɗebemada biẽ́ beɗeaɗaẽ́ panʉmĩna bãrãba namaa enesiɗaa. 38 Demetrioba idji ume ne obadarã biɗa djãrãda jara quĩrĩã panʉbʉrʉ, nẽbʉra cawa obadarã quĩrãpita wãnida panʉa. 39 Bãrãba dewara nẽbʉrada jara quĩrĩã panʉbʉrʉ, dji bororãba puru ãbaa jʉre panʉne jaraɗadua. Ãdjiabʉrʉ cawa jaraɗia. 40 Iɗi quĩrũbucapeɗaɗa carea romanorãba jaraɗisicada dadjirãba ãdji leyra igara panʉda. Ãdjia cãrẽ cãrẽã mãwã osiɗaaɗa aɗibʉrʉ, ni cãrẽ siɗa poya panunaẽ́a.–

41 Mãwã jarapeɗa dji carta ɓʉbariba jũmarãda wãbigasia.*