Bajãnebema nezocarãba beɗeasiɗada Jesu toɗa

Boro Roma puruda, Cesar Augustoba jarasida judiorãra wãnamãrẽã ãdji topeɗaɗamae trʉ̃ ɓʉɗamãrẽã. Maʉ̃ bʉrʉ Josera idjaɓa Mariara wãsiɗada Beleʉ̃ puruɗea, Jose cuariara jãmabema basida. Jãʉ̃ osiɗaɗe, Mariara dãrãẽ́ ɓasida warra toi carea.

Ãdjirãra jũẽsiɗaɗe Beleʉ̃ puruɗe, aɓabebʉrʉ unusiɗada jãʉ̃ cãĩni careara animarã ne cobadamaebʉrʉ. Baribʉrʉ Mariara ɓi puasida warra toi carea. Dji warra iwina toɗara wuaba bʉrapeɗa animarã ne cobadamae coquirusia.

Beleʉ̃ caita, ẽberãrã oveja wagabadarãda, ãdjirãba oveja wagabadara duanasiɗaa. Aɓa angelba jarasida: “Perarãnadua. Mʉ̃a beɗea biada enebʉrʉa. Iɗi tosida Mesia Beleʉ̃ puruɗe”. Ara mãwã jarabʉrʉɗe, angelerãda odjasiɗada. Ãdjirãba Ãcõrẽneda bia beɗeasiɗaa: “Ãcõrẽ ʉ̃tʉ bajãne ɓʉra bio biya quirua. Ẽberãrãra Ãcõrẽba bio unubʉrʉa ẽjũãne necai ɓeaɗia”. Tẽãbe, ¿cãrẽda osiɗada oveja wagabadarãba?

Ara maʉ̃da oveja wagabadarãba wãsiɗada Beleʉ̃ puruɗea. Jãma unusiɗada dji warra zaque toɗa, animarã ne cobadamae ʉ̃rʉ̃ co ɓʉda.

Jũmarã ẽberã maʉ̃ beɗea ũrĩbʉdaɗe, ãdjirãrãbara cawa quĩchaɗaẽ́ basida. Mariaba quĩrãnebasida jãʉ̃ angelba jaraɗara. Oveja wagabadarãba bio bia ɓʉaɗa asiɗada Jeowaa, jãʉ̃ beɗea bia jaraɗa carea idjaɓa jãʉ̃ beɗea ũrĩpeɗaɗa bẽrã.