“Bʉra jũmarã Boro ɓai carea isabe zeida”

Jeowaba jarasida: “Waa neẽ́ ɓaida jĩãnira, pua siɗa, enfermanira, beuɗira. Mʉ̃a jareya dauɓara mãdji dauza. Waa quĩrãnebaɗaẽ́da ne cadjirua naẽna mãwãnara”.

Jeowaba ɓʉsida Adaʉ̃, Eva jãʉ̃ ẽjũã quĩrãwãrẽã trʉ̃ jarabada Edeʉ̃. Jãma pananamãrẽã bio ɓʉrsiɗa idjaɓa necai pananamãrẽã. Maʉ̃ carea aɓabe dji idiɗida zeze bio biara ɓʉ idjaɓa biraɗida warrarãba naʉ̃ ẽjũãra. Adaʉ̃, Eva ĩjãnaẽ́ basida Jeowaɗera. Baribʉrʉ idjia quĩrĩã ɓʉra, jãʉ̃ra awara ɓʉẽ́da. Naʉ̃gʉ cartaɗe, ɓʉbʉra cawasiɗada Ãcõrẽba wãrãda ara oida idjia jaraɗara. Dji boroba bio biara ɓʉda idjaɓa ne biada naʉ̃ ẽjũãne. Jãwã jaraɗara wãrãda ara oida idjaɓa jãʉ̃ jaraɗara Abrahaʉ̃.

Cawaẽ́ɗe ya waa ɓaẽ́da Diaurura idjaɓa dji ẽpẽbadarã siɗa, ẽberãrã cadjirua siɗa. Jũmarãba dji idiɗida aɓabe Jeowaa. Waa enfermanaẽ́da idjaɓa beuɗaẽ́da. Maʉ̃ cãyãbara piradrʉɗida ewariza bio zarea idjaɓa ɓʉsriɗa. Idjaɓa nama zocai panani carea. Naʉ̃ ẽjũãra ɓeida ẽjũã quĩrãwãrẽãne. Jũmarãba eropananida coɗira warra idjaɓa de biada. Neẽ́ ɓaida ẽberã cadjiruara. Jũmarãda ẽberã biada ɓeadida. Animarã cadjirua siɗa wayaɗaẽ́da dadjirãra ni ãdjirã siɗa.

Bio biara ɓʉda Jeowaba wãya ʉ̃rẽbabida beuɗara. Bia zesiɗada aɗida ãdjirãra drõãẽnabemara, sãwã quĩrãca Abel, Noé, Abrahaʉ̃, Sara, Moise, Rut, Ester idjaɓa Davi, ãdjirãba poya carebaɗida naʉ̃ ẽjũãra ẽjũã quĩrãwãrẽãnebema. Maʉ̃ bʉrʉ aɓeɗa eropananida ne zocãrã idjaɓa biara ɓʉda jãʉ̃gʉra.

Jeowaba quĩrĩã ɓʉda bʉra ɓaida ẽjũã quĩrãwãrẽãne. Jãma cawaɗida zocãrã ne Jeowaɗeda bʉa naẽna quĩcha ɓaɗaẽ́da. Maʉ̃ careabʉrʉ caida wãnida ewariza Jeowame ara naʉ̃da o aɓeɗa.