Dji nezoca bajãnebema Ezequiara bio wagasida

Senaquerira dji boro basida Asiriaɗe. Idjia eroɓasida Israel ẽjũãra. Baribʉrʉ ara jãʉ̃gʉɗebemada quĩrĩã ɓasida umé ẽjũãda. Dji puru mãsa quĩrĩã ɓaɗara jarabada Jerusaleʉ̃. Baribʉrʉ jãʉ̃gʉ puruda Jeowaba bio waga ɓasida.

Ezequiaba Senaqueria parata diaɗamĩna, Senaqueriba poya eda quĩrĩã ɓasida Jerusaleʉ̃nebemarãa. Mãʉ̃ bʉrʉ ẽberãrã Jerusaleʉ̃nebemarã bio daupera panasiɗaa. Mãʉ̃ careabʉrʉ Ezequiaba jarasida: “Dauperaɗaẽ́da. Jeowara bio zareara ɓʉda Asiriaɗebema cãyãbara”.

Senaqueriba diabuesida aɓaʉ dji quĩrũda jaramãrẽã ẽberãra Jerusaleʉ̃nebema jãʉ̃ ẽjũãra jũma idjia edaida. Jãʉ̃ purura dajadaa nũmepeɗa rabsaquera jĩgua ɓiasida: “Jeowaba bãrãra carebaẽ́da. Idu cũrũgabiɗaẽ́da Ezequiaɗera. Ni aɓaʉ Ãcõrẽba poya carebaẽ́da”.

Ezequiaba idisida Jeowaa: “¿Cãrẽda oida bara?”. Jeowaba jarasida: “Necai baida mʉ̃a carebaya jãma”. Senaqueriba diabuesida cartada Ezequia. Jarasida: “Idu ɓʉɗida naʉ ẽjũãra. Jeowaba waa carebaẽ́da bãrãra”. Maʉ̃ bʉrʉ Ezequiaba wãya jarasida Jeowaa: “Carebadua jũmarãba cawaɗamãrẽã bʉdrʉ Ãcõrẽ wãrã arada”. Jeowaba jarasida: “Necai pananadua. Dji boro Asiriaɗebemada poyaẽ́da. Mʉ̃a carebaida mʉ̃ purura”.

Senaqueriba cawa ɓasida idjia poyaida Jerusaleʉ̃ra. Baribʉrʉ dimisi wãsida angel Jeowaɗe. Jãʉ̃gʉ angelba quenasida 185.000 sordaorãra. Maʉ̃ bʉrʉ Senaquerira idji ẽjũãnaa wãya jĩrũabera wãsida. Cawasida idjia Jeowaba jaraɗara wãrada osida. Bʉda Jerusaleʉ̃ne ɓaɗabara, ¿bʉa ĩjãi ɓasida Jeowaɗeda?