Bacuru zaque ʉ̃ta nũmʉ uruga nũmʉda

Moisera ɓasida 40 poa Madiaʉ̃ne. Jãʉ̃ ewariɗe mĩã cãĩsida. Mĩã cãĩnapeɗa warrarã tosiɗaa. Ewari aɓaʉɗe quĩrãcuita acʉ ɓasida idji oveja zaquera eya Sinaiɗe. Jãma unusida ne ununacaa. Aɓa bacuruda ʉ̃ta nũmʉ uruga nũmasida ¡baribʉrʉ bácada! Moisera caita wãsida acʉi carea cãrẽda mãwã nũmʉ. Maʉ̃ne ũrĩsida beɗea jĩguada bacuru tãẽna: “¡Moise! Wãrãdua jãma caita. Bʉ jĩrũne jʉ̃bada wẽãdua. Bʉa tʉa ɓʉda ẽjũã bio ne neẽ́ quiruda”. ¿Caida mãwã beɗeasi? Jãʉ̃ra Jeowada mãwã beɗea ɓasida. Idjia angelɗeba Moisea beɗeasia.

Moisera bio ne wayasida, maʉ̃ bʉrʉ idji quĩrãda ãnẽɓarisida. Jãʉ̃ beɗea bacuruɗebemaba jarasida: “Mʉ̃a unu ɓʉda israelɗebemara bio djuburia panʉda. Mʉ̃a ãyã edeya Egiptoɗeba ẽjũã quĩrãwãrẽãne pananamãrẽã. Mʉ̃a quĩrĩã ɓʉda bʉa ẽdrʉ edaida mʉ̃ puru Egiptoɗeba”. ¿Moiseba sãwã sentisida?

Moiseba idisida: “Ẽberãrãba idibʉdaɗe, ¿caibʉrʉ bʉra diabuesida?¿Cãrẽda poya mʉ̃a jaraida?” Ãcõrẽba panusida: “Jaradua Ãcõrẽ Abrahaʉ̃nebema, Ãcõrẽ Isaɗebema, Ãcõrẽ Jacoboɗebema siɗa idjia mʉ̃́a diabuesida”. Moiseba jarasida: “Dji puruba ĩjãnaẽ́bʉrʉ, ¿mʉ̃a casa jaraida?”. Jeowaba unubisida sãwãbʉrʉ poya carebaida. Ãcõrẽba jarasida: “Ɓʉida ẽjũãne bacurura”. Maʉ̃ne jãʉ̃ bacurura dama ɓesida. Mãwãnacarea, Moiseba jidasida jãʉ̃ damara dji druɗe, wãyã ɓesida bacuruda. Maʉ̃ bʉrʉ Jeowaba jarasida: “Jãʉ̃gʉ ne ununacada ununibʉrʉ, acʉbi ɓʉda jãʉ̃ra mʉ̃a jãwã diabuesida”.

Moiseba jarasida: “Mʉ̃ra jipa beɗeacada ẽberãrãa quĩrãpita”. Jeowaba panusida: “Mʉ̃a bʉ̃ra carebaya cãrẽda jaraida. Mʉ̃a diabueida bʉ djabada Aaroʉ̃ carebamãrẽã”. Ara maʉ̃da Moiseba cawa ɓasida Jeowaba idjira carebaida, maʉ̃ bʉrʉ jĩrũarebema wãsida Egiptoɗaa, edesida dji quima idjaɓa dji warrarã siɗa.