BEƊEA 25

Wua de oɗi carea Ãcõrẽra bia beɗeaɗi carea

Moisera basiɗe eya Sinaiɗe, Jeowaba jarasida Ãcõrẽ deda oɗi carea. Jãʉ̃ Ãcõrẽ dera bio biara ɓʉda israelitarã carea. Jãma dji idiɗi carea Ãcõrẽra. Jãʉ̃ Ãcõrẽ dera poya edeɗida bariduama.

Jeowaba Moisea jarasida: “Dji purua idiɗadua carebaɗi carea Ãcõrẽ dera oɗamãrẽã”. Israelitarã oroda, paratada, cobre, mõgara bio biara quiruda idjaɓa ne bio biara ɓʉda diasiɗada. Idjaɓa diasiɗada oveja cara nayãnada, dji e bio biara ɓʉda. Ne zocãrã diaɗa bẽrã Moiseba ãdjirãra jarasida: “Ara jãmabe, ne biara mãsa enerãdua”.

Israelitarãba ne biada enesiɗada carebaɗi carea Ãcõrẽ wua de oɗamãrẽã

Wẽrãra, umaquĩrãra bio zarea trajasiɗada. Jãʉ̃ ne cawa ɓeara Jeowaba ãdjirãra diasida. Ʉ̃cʉrʉba trajabadjiɗada wua bio mera cajusiɗada, Dewara umaquĩrãrã trajabadjiɗada oroda, mõgarada idjaɓa bacuruda.

Ẽberãrãba Ãcõrẽ de osiɗada Jeowaba jaraɗa quĩrãca. Jãma Jeowa deɗe ɓasida umé cuartoda. Aɓabema cuarto bio biara basida. Baude pactoɗebema jãma basida. Jãʉ̃ baude bacuru oɗaɗe oroda basida. Dewarabema cuartoɗe basida: Ĩbĩrã nedragada coa ɓaɗada, mesada idjaɓa quera bá ɓaɗada. Jãma duɗa ɓasida bio epeɗeco waiɓʉada cobreɗebema idjaɓa animarã bá ɓaɗadada bio waiɓʉada. Maʉ̃ bʉrʉ israelitarãba quĩchasiɗada jãʉ̃ baude quĩrãnebasiɗada Jeowaba jaraɗada ãdjirãba ĩjãni carea. ¿Bʉa cawa ɓʉca cãrẽda maʉ̃ pacto? Jãʉ̃ra bio biara ɓʉda ĩjãni carea Ãcõrẽ Beɗeaɗebemada.

Jeowaba jʉrʉ edasida Aaroʉ̃da idjaɓa dji warrarã siɗa panana mãrẽã ãdjirã sacerdote quĩrãca. Bio zarea trajasiɗada animarã bá wãsiɗada idjaɓa ne bia edesiɗada Jeowa carea. Maʉ̃ bʉrʉ quĩrãcuita acʉbadjiɗada Ãcõrẽ dera. Aɓabe Aaroʉ̃drʉ eɗa wãida basida jãʉ̃gʉ cuartoɗe. Aɓabemane poagaza aɓabebʉrʉ eɗa wãbadjida jãma. ¿Cãrẽã? Idji carea idji ne cadjirua oɗa, dji cuariara ne cadjirua oɗa idjaɓa jũma enterora ne cadjirua oɗa carea.

Israelitarãba osiɗada Ãcõrẽ dera poa aɓa baɗacare, ẽdrʉsiɗada Egiptoɗebema. Ʉ̃rãbʉrʉ wãrã de eropanasiɗada dji idiɗi carea Jeowa.

Jeowaba idji de ʉ̃rʉ̃ ɓʉsida jʉ̃rãrãda. Jãʉ̃gʉba acʉbisida idjira bio ɓʉsriɗa ɓʉda. Jãʉ̃gʉ jʉ̃rãrãda Ãcõrẽ dera piqui nũmesida, ara maʉ̃ quĩrãca israelitarãra arimae panebadjiɗada. Jãʉ̃gʉ jʉ̃rãrãda ãyã wãibʉrʉ ara maʉ̃ quĩrãca israelitarãra ãyã wãbadjiɗada. Maʉ̃ bʉrʉ, israelitarãba ẽpẽbadjiɗada jʉ̃rãrãda, Ãcõrẽ deda edebadjiɗada.

“Maʉ̃be mʉ̃a ũrĩsia aɓaʉda Ãcõrẽ bugue biya quirumaʉba nãwã jĩgua beɗeabʉrʉda: “¡Ũrĩnadua! Iɗira Ãcõrẽra ẽberãrã tãẽna ɓʉa. Idjira ãdjirã ume ɓaya. Maʉ̃ne ãdjirãra idji ẽberãrãda ɓeaɗia. Wãrãda idjidrʉ ãdjirã ume ɓaya idjaɓa ãdjirã Ãcõrẽ baya” (Apocalipsi 21:3).