12 umaquĩrãrãba awara drua acʉɗe wãsiɗaa

Israelitarã wãsiɗada eya Sinai idjaɓa wãsiɗada jeweɗa Paraʉ̃da. Jãma jũẽne wãsiɗada trʉ̃ jarabada Cade. Jãma Jeowaba jarasida Moisea: “Diabuedua 12 umaquĩrãrã yõnaɗebemada aɓa aɓa, acʉɗe wãnamãrẽã Canaaʉ̃ ẽjũãda, jãʉ̃gʉ ẽjũãra diaida israelitarã”. Maʉ̃ bʉrʉ Moiseba jʉrʉ edasida 12 umaquĩrãrãda wãnamãrẽã acʉɗe ẽjũã Canaaʉ̃. ¿Jãʉ̃ ẽjũãra bia ɓʉda ne uɗi carea? ¿Sãwã ɓeada ẽberãrãra? ¿Zarea ɓeada o zareaẽ́ ɓeada? Idjaɓa, ¿sãwã ɓeada ãdji dera? ¿Bia ɓeada o biẽ́ ɓeada? 12 umaquĩrãrã wãsiɗada puru Canaaʉ̃ne. Eɗa jãʉ̃gʉɗe wãsiɗada Josue idjaɓa Cale.

Jãʉ̃gʉra ẽberãrãra wãyã jĩrũabẽrã zesiɗada 40 ewarira ɓaɗacarea. Ãdjirãba edesiɗada neta cobadada. Jĩrũabẽrã zeɗacarea, ãdjia jarasiɗada Moisea: “Jãʉ̃ ẽjũãra bio bia ɓʉda baribʉrʉ bio ẽberãrãra barada idjaɓa ẽberãrã bio mezra ɓeada”. Maʉ̃ bʉrʉ Caleba jarasida: “¡Wãnida! Dadjirãba poyaɗida”. ¿Bʉmaarã cãrẽã Caleba jãʉ̃ra jãwã jarasida? Josue, Caleba, ãdjia bio ĩjã panasiɗada. Die umaquĩrãrãba ĩjãnaẽ́ ɓaɗa bẽrã, maʉ̃ bʉrʉ ãdjia jarasiɗada: “Ay, wãnaẽ́da. Jãma jũma ẽberãrãra bio waiɓʉa ɓeada. Maʉ̃ bʉrʉ, ¿dadjirã biɗa aɓari quĩrãca oɗe wãnida? Dadjirãra bio mococoa queɗeada”.

Jãʉ̃ ũrĩnapeɗa, israelitarãba jarasiɗada: “Ay, waa wãnaẽ́da jãma. Maʉ̃ cãyãbara, jʉrʉɗida dewara boroda jẽda wãni carea Egiptoɗaa”. Maʉ̃ carea Josue, Caleba jarasiɗada: “Maʉ̃ cãyãbara biara ɓʉda ĩjãnida Jeowaɗeda. Jeowaba carebaida”. Baribʉrʉ israelitarãba ĩjãnaẽ́ basida. Ãtebʉrʉ ãdjia beaɗa quĩrĩã panasiɗada Josuera, Cale siɗa.

¿Cãrẽda jarasida Jeowaba Moisea?: “Ne zocãrã oɗamĩna waɗi ĩjãnaẽ́da israelitarãba. Maʉ̃ carea, ameida naʉ̃ jewedaɗe 40 poa quininamãrẽã”. ¿Cãrẽã? Aɓabe dji warrarãda idjaɓa Josue, Cale siɗa, ãdjia pananamãrẽã naʉ̃ ẽjũãne.