Ãcõrẽba bajãda idjaɓa naʉ̃ ẽjũãda osia

Dadji zeze Ãcõrẽba osida naʉ̃ ẽjũãda, bajã siɗa. Bajãne osida angelerãda. Ẽjũãne osida ne quĩrãtanoa: animarã, animarã waiɓʉa, caibe queɗea. ¿Bʉa cawa ɓʉca cairãda angelerãda? Ãdjirãrãa ununacaa, Jeowa quĩrãca. Jeowara ununacada. Dji angel nabema Jeowaba osida idjía carebamãrẽã, omãrẽã cucuyoda, idjaɓa naʉ̃ ẽjũãnebema.

Mãwãnacarea Jeowaba osida naʉ̃ ẽjũãra animarãra pananamãrẽã, idjaɓa dadji ẽberãra pananamãrẽã. Osida ʉ̃mãdauda, eya siɗa, pusada, doda ne jũmada quĩrãtanoa osia naʉ̃ ẽjũãne.

¿Cãrẽda mãsa osida Ãcõrẽba? Ãcõrẽba osida ne quĩrãtanoa: chiruada, bacuruda, neta cobada, nejõda, nepõnoda. Idjaɓa osida animarã doeɗabema, animarã druabema, animarã wãmarĩbari siɗa. Jeowaba osida animarã waiɓʉada, imama quĩrãca, idjaɓa animarã caibeada, ejemploda: beguida, berõarada. ¿Baribʉrʉ bʉa sãʉ̃gʉ animarãda quĩrĩã ɓʉ?

Jeowaba nabema angelea jarasia: “Ẽberãrã oɗida”. Ẽberãra awara panʉda animarã cãyãbara. Ẽberãrãba ne obadada, ãdjirãya ibiya beɗeabadada, idjaɓa ʉ̃taa idibadada. Quĩrãcuita acʉɗida naʉ̃ ẽjũãra idjaɓa animarã siɗa. ¿Cai basida nabema umaquĩrãra? Ara maʉ̃da cawaɗida.