Anaba Jeowaa warrada idisida

Aɓa umaquĩrã trʉ̃ jarabada Elcana, jãʉ̃ra israelitaɗebema basida. Eroɓasida wẽrã umé dji wẽrã trʉ̃ jarabada Ana dewarabema trʉ̃ jarabada Penina. Baribʉrʉ bio cʉ̃ãga basida mãsa Anara. Penina zocãrã warrarã eroɓasida. Anara neẽ́ basida, ni aɓa biɗa. Maʉ̃ bʉrʉ Peninaba ipiɗabadjida Ana carea, warra neẽ́ ɓaera. Jũma poagaɗe Elcana edebadjida dji cuariarãra Siloɗaa jãma dji idiɗi carea Jeowa deɗe. Ewari aɓaʉɗe jãma panasiɗada. Elcana cawasida dji quimara Anara bio sopua ɓʉda. Mãʉ̃ bʉrʉ jarasida: “Mʉ djuburia jĩãrãdua Ana, bʉa mʉ̃da eroɓʉa. Mʉa bʉra bio cʉ̃ãga ɓʉ”.

Mãwãnacarea Anara wãsida idjiɗuba dji idiɗe, idjira bio jĩã ɓaɗa bẽrã. Mãʉ̃ bʉrʉ jarasida: “Jeowa bʉa mʉ̃́a warrada diaibʉrʉ, mʉa bʉ́a diaida jãʉ̃ warrarã bʉme traja ɓamãrẽã dãrã”.

Dji Sumo Sacerdote Eliba unusida Anaba chupea jĩã ɓʉda itotowa. Maʉ̃ bʉrʉ Eliba crĩchasida beu ɓʉda Anara. Mãʉ̃ bʉrʉ Anara jarasida: “Mãwãẽ́a, mʉ̃ra beu ɓʉẽ́da. Eroɓʉda beɗea dromada. Mãʉ̃ bʉrʉ beɗea ɓʉda Jeowame”. Eliba jarasida: “Quĩrãdoaida mʉ̃a jaraɗara. Mãʉ̃ cãyãbara crĩchada Jeowaba ɓʉ́a diaida bio biara ɓʉ”. Ana bio ɓʉsriɗa sentisida. Mãʉ̃ bʉrʉ idjira ãyã wãsida. Poa aɓaʉɗe Jeowaba diasida warrara. Trʉ̃ jarasida jãʉ̃ warra Samuel. ¿Bʉmaarã bio ɓʉsriɗa sentisida Anara?

Ana quĩrãdoaẽ́ basida idjia jaraɗara Jeowaa. Ara mãʉ̃ quĩrãca osida. Diasida dji warra Samuel trajamãrẽã Ãcõrẽ deɗe. Aɓeɗa dãrã Ãcõrẽme. Idjia jarasida Eliaa: “Dji idisida Jeowaa diamãrẽã mʉ̃́a warrada. Mãʉ̃ bʉrʉ diasida aɓeɗa warrara idjime ɓamãrẽã”. Elcana, Ana siɗa acʉɗe wãbadjiɗada Samuelira. Poaza edebadjiɗada ne baribemada jʉ̃mãrẽã bio biara ɓʉ. Mãwãnacarea Anaba wãya warra ũbea edasida, ume wẽrã cauda. Mãʉ̃ bʉrʉ jarasida: “Bia ɓʉaɗa Jeowa”.