Jeowaɗeba Sansoʉ̃ra bio juerza bara ɓabadjia

Zocãrã israelitarãba wãya ĩjã panesiɗada ãcõrẽ sewaida ɓea. Maʉ̃ careabʉrʉ Jeowaba jarasida ẽberãra piliteorãɗebema poyaɗida israelitaɗebema. Baribʉrʉ ʉ̃cʉrʉ israelitarãba ĩjã panesiɗada Jeowaɗe, ejemplo Manóah.Idji dji quimame neẽ́ panesiɗada warra. Ewari aɓaʉɗe Jeowaba diabuesida angel, jãʉ̃gʉ angelba Manóah quima jarasida : “Bʉra warra eroɓaida, jãʉ̃gʉ warraba poya jarida israelitaɗebema pilisteorãba cadjirua obada. Idjira nazareo baida”. ¿Cawasia caira basida nazareora? Jãʉ̃gʉra ẽberãra bio ĩjã badjiɗada, ãdjia quĩrĩã panʉ quĩrãca Jeowaɗeda. Ãdjirãra poya buɗara tʉdiẽ́ panasiɗada.

Dãrã ɓaɗacare tosida warra Manóah, trʉ̃ jarasida Sansoʉ̃ra, idjira warisida, Jeowaba diasida bio mẽsrã. Poya beasida león aɓabe idji jʉwaba. Ewari aɓaʉɗe beasida 30 pilisteorãda, ni aɓaʉda carebaɗaẽ́ basiɗada. Maʉ̃ bʉrʉ pilisteorãba beada quĩrĩãsiɗada. Dimisi aɓa Sansoʉ̃ cãĩ basida Gaza puruɗe. Maʉ̃ne dji quĩrũrãba wãnapeɗa puertaɗe jũẽnapeɗa jãma beaɗa quĩrĩãsiɗada diapeɗeɗa. Baribʉrʉ dimisi ariquẽtra piradrʉsia Sansoʉ̃, maa pebʉrʉ wãpeɗa puru auɗu mõgara jidapeɗa ãrĩsi.

Mãwãnacare pilisterorãra wãsiɗada beɗeaɗe Dalilaa, Dalilara quima cabada Sansoʉ̃, idjaɓa jarasiɗada: “Nẽbʉa pagaɗida bʉá cawaibʉrʉ cãrẽba idjira mẽsrã ɓʉda Sansoʉ̃ra”. Jidaɗa quĩrĩã panʉda carceɗe ɓʉɗi carea. Dalilaba quĩrĩã basida paratara maʉ̃ bʉrʉ ĩjãsida jãʉ̃ jaraɗara. Naãrã Sansoʉ̃ba jara quĩrĩãẽ́ basida Dalilaa sãmaʉba ze ɓʉda jãʉ̃ mẽsrãra. Baribʉrʉ idjira bio quĩrũsida idjime, maʉ̃ bʉrʉ Samsoʉ̃ba nẽbʉrʉsida idjia cãrẽneba ida basida jãʉ̃ mẽsrã. Jarasida: “ Ni aɓaʉba mʉ̃ buɗara tʉdacada mʉ̃ra nazareo bẽrã, buɗada tʉɗibʉrʉ mʉ̃ mẽsrã ɓaɗara aduaida”. Jãʉ̃ra biẽ́ basida Samsoʉ̃ba jarasida Dalilaa.

Ara maʉ̃da Dalila jarasida pilisteora: “Ya cawasida cãrẽneba mãwã mẽsrã ɓʉda Sansoʉ̃ra”. Caĩbisida Samsora idji macara ʉ̃rʉ̃, ara maʉ̃da idjia trʉ̃sida dewara ẽberãda tʉmãrẽã Sansoʉ̃ buɗara. Maʉ̃ne Dalilara ɓiasida: “Sansoʉ̃ pilisteorãra nama panʉa”, ara maʉ̃da ʉ̃rʉ̃mapeɗa cawasida idji mẽsrã neẽ́ ɓʉa, pilisteorãra jidaɗapeɗa dauɓerrea osiɗada idjaɓa edesiɗada carceɗaa.

Ewari aɓaʉɗe zocãrã pilisteorãra ãbaa jʉresiɗada ãdji ãcõrẽ Dagón deɗe. Ãdjia bio jĩgua badjiɗada: “Dadji ãcõrẽba diasiɗada Samsoʉ̃ra. Maʉ̃ carea edesiɗada idjira ãdjia ipiɗaɗi carea”. Samsoʉ̃ba jarasida jĩgua: “Jeowa mʉ̃ djuburia diadua mẽsrã maʉ̃za”, idji buɗara wãya drasoa eroɓasia, maʉ̃ bʉrʉ Samsoʉ̃ba mẽsrã eroɓapeɗa arĩsida dji puru auɗu mõgara jũrãbaɗara. Maʉ̃ bʉrʉ de dromane ɓaɗara jũma quinisiɗada zocãrã idjaɓa beusida Samsoʉ̃ra jãma.