Danielera ɓʉda imama purrurãme nendeɗe

Dario medoperisa puruɗebema idjira dewaraʉ borora basida Babiloniane. Cawasida Danielba idjira ẽberã bia basi, mãʉ̃ bʉrʉ ɓʉsida idji ẽberãrãra maʉ̃za biara ɓeada dewaraʉ puruɗebema cãyãbara. Naʉ̃gʉ umaquĩrãrãba bio unu ama panasiɗada Daniel, quĩrĩã panasiɗada beaɗida idjira. Cawabasida Danielba dji idibadjida Jeowaa ewariza, barima ũbea, maʉ̃ carea jarasiɗada Dario: “Ay boro jʉrʉɗidabara panasiɗada aɓa leyba bʉ́a jũmarãba dji idiɗida aɓabe”.

Danielba cawasida djiwiɗi leyda, maʉ̃ bʉrʉ wãsida idji deda. Ẽberã quĩrãma panʉ Danielira jãʉgʉrãba unusiɗada dji idi ɓʉda chĩrãboroɗeba Jeowaa. Daniel jãʉ̃ra jãwã osida ventana ewapeɗa. Jãʉ̃gʉ umaquĩrã unu ama ɓaɗarãba unusiɗada Danielira, ara maʉ̃da pira wãsiɗada jaraɗe Darioa: “Danielba ĩjãẽ́ ɓʉda, ewari barima ũbea dji idibarida idji Ãcõrẽa”. Dario quĩrĩã basida Danielra, maʉ̃ bʉrʉ bea quĩrĩãẽ́ basi. Baribʉrʉ poyaẽ́ basida, poya ɓʉiẽ́ basida jãʉ̃gʉ leyra, aɓeɗa wãrãda ɓʉbʉda bẽrã. Maʉ̃ bʉrʉ quĩchasida idjia maʉ̃za poyaẽ́da awara oi carea Daniel, maʉ̃ bʉrʉ Danielira ɓatabuesida nende uriaɗe leónba coɗamãrẽã.

Jãʉ̃gʉ dimisi Dariora poya cãĩẽ́ basida Daniel carea, bio sopua basida. Diapeɗe eda wãsida acʉɗe nende uriaɗe, jãmaʉba jĩgua biasida: “¡¿Daniel bʉ́a ẽdrʉ edasida bʉ Ãcõrẽba?!”.

Dario ũrĩsida beɗea jĩguada, jãʉ̃ra Daniel basida. Panusida: “¡Angelba tapasida león itera, maʉ̃ bʉrʉ mʉ̃ra ne cadjirua mawaẽ́ basida!”. Dario bio ɓʉsriɗa basida, ara maʉ̃da ãĩ edasiɗada jãma ɓaɗara Daniel, ẽdrʉsida leonba orrebariɗa neẽ́ basi, mãwãnacarea dji boroba jarasida: “Bataɓueɗida jãʉ̃gʉra ẽberãrãra Daniel unu amana”. Ara maʉ̃da ɓatabuesiɗada ãdjirãra, leonba cocuasi Jũma.

Dario jarasida idji purua: “Jũmarãba wayaɗidabara Ãcõrẽ Danielɗera, idjia ẽdrʉ edada bẽrã leóne ɓaɗada”.

¿Bʉa biɗa dji idida Jeowaa jũma ewariɗe Daniel quĩrãca?