Jeowaba droa ɓasida Jonára

Asiria ẽjũãne ɓasida puru Ninive. Jãmabema ẽberãra bio cadjiruara ɓasida. Jeowaba diabuesida dji propeta Jona Niniveɗaa jaramãrẽã ẽberãrã ne cadjiruara amenida. Baribʉrʉ Jonára mĩrũ wãsida dewara puruda. Jãma jãba waiɓʉaɗe ɓado wãsida.

Tʉmʉ barco pusaɗe ariquẽtra ũmebʉrʉɗe maʉ̃ne zesida nãũrãda bio zarea jãrãpuasida. Maʉ̃ bʉrʉ idisiɗada ãdji ãcõrẽa ãdjirãra carebamãrẽã. Ẽpẽ baɗacarea Jonába panusida: “Mʉ̃ra mĩrũ wãbʉrʉ bẽrã jãwã o ɓʉda. Oẽ́ ɓʉda Jeowaba jaraɗara. Maʉ̃ carea bãrãba mʉ̃ra daiɗu ɓatabueɗadua nãũrã taumãrẽã”. Jãba waiɓʉa djibarirãba ɓatabueɗa ama panasiɗada daiɗu Jonára. Maʉ̃ne idjia jarasida: “¡Ɓatabueɗadua mʉ̃ra daiɗu!”. Ara maʉ̃da daiɗu ɓatabuesiɗada. Maʉ̃bebʉrʉ tausida nãũrãra.

Joná bio sopuasida. Idjia quĩchasida : “Mʉ̃ra beuida nama”. Maʉ̃ bʉrʉ idjia dji idisida Jeowaa, idjira mãsa tʉmʉ ara wãbʉrʉ bẽrã pusaɗe. Maʉ̃ carea, ¿cãrẽda osida Jeowaba? Jeowaba diabuesida ɓeda waiɓʉada, jãʉ̃gʉ ɓeda waiɓʉaba mĩsida Jonara. Ɓeda ɓiteɗa ɓeɗacarea, Jonába dji idisida: “¡Jeowa, carebadua!”. Jeowaba zocai ɓʉsida Jonára ɓeda ɓiteɗa ewari ũbea. Mãwãnacareabʉrʉ ɓedaba idu we ɓʉesida ĩbʉɗe.

Jeowaba Jonára ẽdrʉ edasida. Baribʉrʉ Jeowaba jarasida: “Wãya wãida Ninive puruɗaa”. Baribʉrʉ Jonába jarasida: “Ara naʉ̃da mʉ̃a ĩjãya Jeowaɗera”. Ara maʉ̃da wãsida Jonára puru Niniveɗaa. Maʉ̃ne ẽberãrã bio cadjirua ɓeada. Baribʉrʉ jarasida: “Jeowaba jõbiya 40 ewari zebʉrʉɗe”. Jãʉ̃ jãwã ũrĩsiɗaɗe ẽberãrãba ara maʉ̃da igarasiɗada ne cadjiruara. Dji boro Niniveɗebemaba jarasida: “Dji idiɗadua Jeowara. Mãwãna Jeowaba quenaẽ́da”. Jeowaba unusida ẽberãrã Niniveɗebemaba igarasiɗada ne cadjiruara. Maʉ̃ bʉrʉ Jeowaba quenaẽ́ basida.

Maʉ̃ carea Jonara bio quĩrũsida Jeowaba jõbiɗaẽ́ bẽrã Ninive purura. Quĩchadua jãʉ̃da: Jeowaba mĩã djuburia unusida Jonáa. Baribʉrʉ Jonába mĩã djuburia unuẽ́ basida puru Niniveɗebemara. Maʉ̃ careabʉrʉ Jonára puru ãĩ wãpeɗa nũmane wãsida bacuru erica. Mamaʉba idjia bio quĩrã cadjirua acʉɗe. Maʉ̃ne bacurura purrubasida. Maʉ̃ bʉrʉ Jonára mãsa quĩrũsida. Maʉ̃ careabʉrʉ Jeowaba jarasida: “Bʉmaarã, ¿biara ɓʉda jãʉ̃ bacuruda dji ẽberãrã Niniveɗebemada cãyãbara? Mʉ̃a quĩrãdoasida ãdjia ne cadjirua oɗara. Mĩã djuburia unusida ãdjirãra. Maʉbebʉrʉ ẽdrʉsiɗada”. ¿Cãrẽda quĩrĩã ɓasida Jeowaba jaradiaida Jonáa? Ẽberãrã Niniveɗebemara biara ɓʉda jãʉ̃gʉ bacuru cãyãbara.