Juaʉ̃ra cawabiɗa cãĩmocaraɗa

Dji apóstol Juaʉ̃ba preso ɓasida pusa ẽsadra trʉ̃ jarabada Patmo. Jesuba acʉbisida 16 cãĩmocarada. Juaʉ̃ba jãʉ̃gʉ cãĩmocaraɗeba cawasida sãwãbʉrʉ jaraida Ãcõrẽ trʉ̃ra biya, Jeowa Borora zeida idjaɓa idjia quĩrĩã ɓʉ quĩrãca ara oɗida naʉ̃ ẽjũãne, bajãne biɗa.

Cãĩmocaraɗe Juaʉ̃ba unusida Jeowada idji ãbugue biya quiruɗe ɓʉda bajãne. Ãbugue auɗu ɓʉda 24 djabarã. Eropanʉda ãdji jʉ̃bada totroa quiruda idjaɓa boroɗe jũrã jʉ̃bada oroda. Ãbugueɗeba ẽdrʉbarida ʉ̃naada idjaɓa ũrĩbadada baa jĩgua. Dji 24 djabarãra chĩrãboroɗe copanesiɗada Ãcõrẽ quĩrãpita. Ara maʉ̃da dji idibadada. Dewara cãĩmocaraɗe, Juaʉ̃ba unusida zocãrã ẽberãrãda jũma puruzabemada idjaɓa beɗea dewaraɗebemada, ãdjirãba dji idibadada Jeowaa. Dji Oveja Zaque quĩrãca ɓʉra Jesuda. Jãʉ̃ba wagabari ẽberãrãra jipa edebarida. Mãwãnacareabʉrʉ dewaraʉ cãĩmocaɗeba unusida Jesura, ara maʉ̃da idjia mãsa ɓebarida dji bororame bajãne, ãbaa jãʉ̃ 24 djabarãme. Araarebema cãĩmocaraɗe Juaʉ̃ba unusida Jesura djõ ɓʉda Diaurume idjaɓa dji ẽpẽbadarãme. Jesuba ɓatabuesida bajãneba ẽjũãnaa.

Mãwãnacarea, Juaʉ̃ba unusida ne quĩrãwãrẽãda cãĩmocaraɗeba, unusida idjia Oveja Zaque maʉ̃ idjaɓa dji panani 144.000. Jãʉ̃gʉra piradrʉ panʉda eya Sioʉ̃ne. Idjaɓa unũmʉda angel aɓaʉba wãɓaribusida ẽjũã entero. Idjia jara ɓʉda: “¡Bio ĩjãnadua Ãcõrẽnera!”.

Dewaraʉ cãĩmocaraɗe unusida djõbada trʉ̃ jarabada Armagedoʉ̃. Jãʉ̃ djõ panʉne Jesuba dji ejercitorãya poyabicada dji cadjirua Diaurura. Jẽdaarebema cãĩmocaraɗe Juaʉ̃ba bajãneba naʉ̃ ẽjũãnaa unusida ãbaa necai panʉda idjaɓa jipa panʉda. Idjaɓa unusida jõbibʉrʉda Diaurura idjaɓa dji ẽpẽbadarã siɗa bajãne, ẽjũãne biɗa. Jũmarãba jarabadada dji trʉ̃ Jeowaɗeda, bio biara dji idiɗida aɓabe idjia.