Quĩrãnebadua Lo quima mãwãnada

Lora ɓasida dji tío Abrahaʉ̃me dji ẽjũã Canaaʉ̃ne. Ãdji ume bio daupẽsiɗada animarãra. Maʉ̃ bʉrʉ jãma baido doɗi carea animarãba neẽ́ basida. Maʉ carea Abrahaũba jarasida Loa: “Nama waa poya pananaẽ́da. mʉ djuburia ɓʉa, jʉrʉdua sãmaare wãdua. Mʉra awara wãida” ¿Bʉmaarã Abrahaʉ̃ra bio sobia ɓasida?

Loba unusida aɓa ẽjũã bio biara ɓʉda. Ara caida basida Sodoma puru Gomorra puru siɗa. Jãma eroɓasida baido, chirua bia siɗa. Maʉ̃ bʉrʉ idjira wã quĩrĩãsida dji cuariarãme jãma.

Ẽberãra Sodoma puruɗebemarã Gomorra puruɗebema siɗa bio so cadjiruara basida. Maʉ̃ bʉrʉ Jeowaba aɓeɗa jõbisida jãʉgʉ puru umébemara. Jeowaba ẽdrʉbe quĩrĩã basida Lo cuariarãra. Ãcõrẽba jarasia: ¡Ãyã wãnadua jãʉ̃ puruɗebemada! Naʉ̃ purura jõbiɗida”. Ãcõrẽba diabuesida angelerã uméba carebasiɗada ãdjirã ẽdrʉ edamãrẽã.

Lora ara maʉ̃da wãnaẽ́ basída. Maʉ̃ carea angelerãba ãdji jʉwaɗe jidaɗapeɗa jarasiɗaa: “¡Isabe wãnadua, jẽda acʉrãnadua! Jẽda acʉɗibʉrʉ beudia”

Loba dji cuariarãme Zoar puruɗe jũẽnapeɗa, Jeowaba ʉ̃tʉ eɗaʉba bá, azupre siɗa zebisida Sodoma, Gomorra puruɗe. Maʉ̃ carea jãʉ̃ purura jõbisia. Lo quimaba ĩjãẽ́ basída Jeowa beɗea. Idjia jẽda acʉsida. Maʉ̃ carea muñeca oɗa tã quĩrãca ɓesida. Idjira ĩjãẽ́ basi bẽrã beusida. Maʉ̃ carea Loba dji caurãme bio sopua panesiɗada. Baribʉrʉ ãdjirãba Jeowa beɗea ĩjã ɓaɗa bẽrã necai panasiɗada.