Auɗu mõgara Jerusaleʉ̃ne

Jiruãbẽrã beɗeaɗida poa nabemanebemada. Nehemiara israelitaɗebema basida. Babadjida Susa puruɗe. Dji boro trʉ̃ jarabadjiɗaa Artajerje. Ewari aɓaʉɗe dji djaba Nehemianebemada jũẽne wãsia Judaɗeba. Maʉ̃ba nẽbʉrʉɗe wãsida. Idjia jarasida: “Dji israelitarãra bio pera panʉda Jerusaleʉ̃ puruɗe. Jãʉ̃ purura mõgaraba jũrã ɓʉẽ́da”. Maʉ̃ bʉrʉ Nehemiara bio sopua ɓesida. Maʉ̃ carea, Nehemiaba ʉ̃taa dji idisida dji boroba idu wãbimãrẽã.

Mãwãnacarea dji boroba unusida Nehemiara bio sopua basida. Dji boroba jarasida: “¿Bʉra bio sopua ɓʉca? ¿Cãrẽã sopua ɓʉda?”. Nehemiaba panusia: “Mʉ̃ purura Jerusaleʉ̃ jũma ãrĩ ɓʉa. Maʉ̃ carea mʉ̃ra bio sopua ɓʉda.” Maʉ̃ carea dji boroba jarasida: “¿Mʉ̃a bʉra sãwã poya carebaida?”. Maʉ̃ carea Nehemiaba chupea idjira ʉ̃taa dji idisida: “Quĩrã djuburiadua mʉ̃ra, mʉ̃ puru Jerusaleʉ̃ra ara oɗe wã quĩrĩã ɓʉa”. Dji boro Artajerjeba iduaribisida ara oɗe wãmãrẽã idjaɓa diasida carebai carea nezocarã. Idjaɓa ɓʉsida Nehemiada dji boro ɓai carea Juda puruɗe.

Nehemia jũẽne wãsida Jerusaleʉ̃ne. Maʉ̃bebʉrʉ, acʉɗe wãsida mõgaraba jũrã ɓʉ puru Jerusaleʉ̃ra. Mãwãnacarea ãbaa jʉresida sacerdoterãba idjaɓa dji bororã siɗa. Nehemiaba jarasida: “Ay, naʉ̃ra bio biẽ́ ɓʉda. Jũma ãrĩsiɗada. Nama bio zarea trajaɗida bara panʉa”. Idjaɓa ẽberãrãba ĩjãsiɗada. Maʉ̃ bʉrʉ ãdjirãra bio zarea trajasiɗada.

Ʉ̃cʉrʉ dji quĩrũrã Israelitaɗebemarã, jãʉ̃gʉrãba bio ipiɗabadjiɗada ãdjirãra. Ãdjirãba jarasiɗaa: “Jãʉ̃ mõgarada ãrĩ ɓaera, usa biɗa poya ãrĩda”. Mãwãmĩna ãdjirãra bio zarea traja panasiɗada. Maʉ̃ bʉrʉ maãrĩ maãrĩ ara osiɗada mõgarada.

Maʉ̃ne zocãrã dji quĩrũrãba cadjirua oɗe wãsiɗada Jerusaleʉ̃naa. Maʉ̃ bʉrʉ judiorãra bio pera panasiɗada. Baribʉrʉ Nehemiaba jarasida: “Perarãnadua. Jeowara daime ɓʉda”. Maʉ̃ carea Nehemiaba ɓʉsida dji sordaorãba bio wagaɗamãrẽã dji traja panʉrãda. Maʉ̃ bʉrʉ dji quĩrũrãba ne poya oɗaẽ́ basida.

Cawaɗaẽ́ne 52 ewari baɗacarea jũma ara osida. Maʉ̃ carea Nehemiaba enesida levitarãda Jerusaleʉ̃naa piesta oɗi carea. Nehemiaba ɓʉsida ẽberãrãda trʉ̃ãni carea. Nehemia wãsida dewara ẽberãrãme. Esdra siɗa wãsida dewara ẽberãrãme. Wãsiɗada mõgara ʉ̃rʉ̃. Ʉ̃cʉrʉ ẽberãrã dewara oɗe wãsiɗada. Ʉ̃cʉrʉ ẽberãrãra chiru za wãbʉrʉsiɗada. Dewararã trʉ̃ã basiɗada Jeowaɗeda. Mãwãnacarea ãbaa jʉresiɗada Ãcõrẽ deɗe. Umaquĩrãrã, wẽrãrã, caibearã, ãdjirãba ne baridua diasiɗada Jeowaa. Ɓʉsriɗa panana bẽrã osiɗada piesta waiɓʉada.