BEƊEA 4
Bio quĩrũpeɗa idji djaba beaɗa
Adaʉ̃ba Evame ãyã wãnacarea ẽjũã quĩrãwãrẽã trʉ̃ jarabada Edeʉ̃, warra zocãrã unusiɗada. Dji warra nabema trʉ̃ jarabada Caiʉ̃, idjira ne úya basía. Dji warra umébema trʉ̃ jarabada Abel, idjira oveja daupẽya basía.
Ewari aɓaʉɗe Caiʉ̃ba Abel biɗa osiɗada ne bio biara ɓʉda Jeowa carea. ¿Cawa ɓasida cãrẽda diasida? Caiʉ̃ba ne bari diaɗara Jeowaba quĩrĩãẽ́ basída. Maʉ̃ cãyãbara, Abelba ne bari diaɗadrʉ quĩrĩãsida. Maʉ̃ carea, Caiʉ̃ra quĩrũsia. Maʉ̃ bʉrʉ Jeowaba jarasida Caiʉ̃a: “Jãʉ̃da jãwã quĩrũ ɓaibʉrʉ bʉra ne cadjirua oida”. Baribʉrʉ Caiʉ̃ba ĩjãẽ́ basída.
Maʉ̃ cãyãbara, Caiʉ̃ba jarasida Abelera: “Zeida bʉra nama”. Ãdjiɗuba panʉne Caiʉ̃ba beasida dji djabara. ¿Cãrẽda osida Jeowaba? Jãʉ̃gʉ jãwã oɗa bẽrã Caiʉ̃ra quĩrãmasida, maʉ̃ bʉrʉ tʉmʉ diabuesida dji cuariara ãyã jĩrũãbera zerãmãrẽã.
¿Cãrẽda cawasiɗada jãʉ̃gʉɗeda? Dadjia quĩrĩã ɓʉ quĩrãca mãwãẽ́bʉrʉ poya quĩrũnida. Baribʉrʉ bio quĩrũ ɓaibʉrʉ ne cadjirua poya mãwãida. Maʉ̃ cãyãbara necai beaɗida ne cadjirua o amaaba.
Abelba bio quĩrĩã ɓasida Jeowara. Maʉ̃ bʉrʉ idjira ibiya ɓabadjia Jeowame. Maʉ̃ bʉrʉ Jeowaba wãyã ʉ̃rẽbabida ẽjũã quĩrãwãrẽã obʉrʉɗe bamãrẽã.
“Ãtebʉrʉ dji babue diabada caita amepeɗa bʉ djaba ume ibiaɗe wãdua. Maʉ̃bebʉrʉ jẽda zepeɗa bʉ animarãra Ãcõrẽa babue diadua” (Mateo 5:24).