Israel drua umé ɓeɗa

Salomoʉ̃ba bio ĩjã basiɗe Jeowaɗeda necai panabadjiɗada Israelɗe. Baribʉrʉ idjia mĩã cãĩsida dewara wẽrãrãme ĩjãnaca Ãcõrẽ Beɗeara. Maʉ̃ careabʉrʉ Jeowara bio quĩrũsida, jarasida: “Mʉ̃a jãrĩya bʉ cuariara boro Israelɗe panʉra. Umé ɓʉya purura. Mʉ̃a bʉ nezoca waiɓʉara ɓʉda diaya. Baribʉrʉ bʉ cuariara mʉ̃a zocãrãẽ́ ara diaya”.

Jeowaba jãwã osida cawaɗamãrẽã bio. Salomoʉ̃ nezoca trʉ̃ jarabada Jeroboaʉ̃. Idjira wã ɓasida maʉ̃ne unusida dji propeta Ahía. Dji propetaba wẽãsida idjia jʉ̃badara. Maʉ̃bebʉrʉ cõẽ cuasida doce wua zaquerã. Maʉ̃bebʉrʉ jarasida Jeroboaʉ̃a: “Jeowaba jãrĩda Salomoʉ̃ cuariara dji boro Israelɗebema siɗa. Maʉ̃ carea umé ɓʉida. Naʉ̃ wua zaquerã die juachaɗada edasia, bʉra dji boroda ɓei bẽrã naʉ̃gʉra ẽberãme”. Salomoʉ̃ba ũrĩsida jãʉ̃gʉra, mãwãbʉrʉ bea quĩrĩã basida Jeroboaʉ̃ra. Maʉ̃nebʉrʉ Jeroboaʉ̃ra mĩrũ wãsida Egiptoɗaa. Dãrã ɓaɗacarea beusida Salomoʉ̃ra, idji warra Roboaʉ̃da dji boroba ɓesida. Jeroboaʉ̃ba quĩchasida: “Ya waa ne cadjiruara neẽ́da. Maʉ̃nebʉrʉ wãyã jĩrũabera wãida Israelɗaa”.

Mãwãnacarea drõãrã Israelɗebemerãba jarasiɗada Roboaʉ̃a: “Bʉa biya oibʉrʉ puruɗebemada, mãwãra ãdjirã bia pananida”. Baribʉrʉ ʉ̃cʉrʉ cũdrarãba jarasiɗada: “Bʉa bio zarea trajabida jãʉ̃gʉ ẽberãrã puruɗebemara”. Roboaʉ̃ba osida dji biarãba jaraɗara. Mãwãbʉrʉ puruba ɓʉsida Jeroboaʉ̃ dji boro ɓamãrẽã die puruda trʉ̃ jarabada Israel. Umébema puruda trʉ̃ jarabada Juda. Jãʉ̃ puru umébemara bio jipa basida Roboaʉ̃. Idjira dji boro basida Jerusaleʉ̃ne. Jãwã awara awara osida 12 puru Israelɗebemara umé druaɗe ɓemãrẽã.

Jeroboaʉ̃ba quĩrĩãẽ́ basida idji puruɗebemaba dji idiɗe wãnira Jeowaa Jerusaleʉ̃na. ¿Cawa ɓasida cãrẽã? Waya ɓaɗa bẽrã idji ẽberãrãba igaraɗida idjira. Idjia quĩchasida idjia jara ɓʉra ĩjãnaẽ́da Roboaʉ̃nera. Jeroboaʉ̃ba paca zaquerã umé osida oroda, ẽberãrãba maʉ̃ ãdjia idiɗamãrẽã. “Jerusaleʉ̃ tʉmʉ ɓʉda. Maʉ̃ cãyãbara nama panenadua dji idiɗi carea jãʉ̃ paca zaque oroa”. Ẽberãrãba ĩjãsiɗada maʉ̃bebʉrʉ panesiɗada dji idiɗi carea. Mãwãbʉrʉ igarasiɗada Jeowara.