Pedroba Jesura ununacada asia

Jesura basida waɗi dji nĩbabadarãme ʉ̃taarebema dejã neco panʉmae jẽdaarebema cenane, jarasi: “Jũma mãrãba mʉ̃ra igaraɗida jãʉgʉ dimisi”. Pedroba jarasida: “Mʉ̃a igaraẽ́a bʉra dewararãba igara ɓʉɗamĩna mʉ̃a igaraẽ́a”. Baribʉrʉ Jesua panusida Pedroa: “Eterre birui naẽna bʉa jaraida ɓarima ũbea bʉa mʉ̃a unucada”.

Djio sordaorãda edesiɗada Jesura Caipá deɗa, zocãrã dji nĩbabadara wãbʉrʉsiɗada. Ume wãsiɗada ãdjirãme. Aɓara Pedro basi. Idjira caita wãsida Caipá de. Jãma tʉbʉda cuasida jʉ̃wʉ̃rʉ̃ãi carea. Tʉbʉ uruaɗeba unusida dji nezocaba idji quĩrãra Pedroneda, jarasida: “Bʉra mʉ̃a unubari quĩrãca ɓʉda, bʉra wã basida Jesume”. Pedroba panusida: “Mãwãẽa, jãʉ̃ra wãrãẽ́da, ¿cãrẽda beɗea ɓʉ?. Idjira jĩgabe wãsida , maʉ̃ bʉrʉ dewaraʉ wẽrã trajabadaba unusida, jarasida dewaraʉra umaquĩrã: “Idjira Jesume nĩbasida”. Pedroba panusida: ¿Caita Jesuda? Idjaɓa umaquĩrãba ɓʉba jarasi: “Bʉda jãʉ̃gʉɗebema. Cawa panʉda jãʉ̃gʉ beɗea quĩrãca, beɗea ɓʉda”. Pedroba jarasida: “Wãrãda mʉ̃a adua ɓʉa”.

Ara maʉ̃da eterre umaquĩrã birusida. Pedroba unusida Jesura acʉ ɓʉda. Quĩrãne basida jarada Jesura, ara maʉ̃da ẽdrʉsida idjaɓa bio jĩãsida.

Maʉ̃misa Sanedrínba ãbaa jʉresida dji de Caipá de beɗeaɗi carea Jesuɗeda. Dji Sanedrínba bio dji boro basida ãcõrẽ sewaida ɓeaɗe, ãdjirãba quĩcha panasiɗada beaɗida, maʉ̃ careabʉrʉ jʉrʉ panasiɗada beɗea aɓa wãrã arada beai carea Jesua. Baribʉrʉ ununaẽ́ basida ni aɓaʉ beɗea quĩrãmani careara.

Jẽdaare baɗacare Caipába idisida Jesua: “¿Bʉra Ãcõrẽ warrada?”. Jesuba panusida: “Mae, mʉ̃da”. Maʉ̃ne Caipába jarasi: “Maʉ̃za cawaɗira neẽ́ panʉa, naʉra bio sewa cadjiruada”. Dewararãba jarasiɗada: “Naʉ̃ umaquĩrãra beuibara”. Ara maʉ̃da usiɗada quĩrãdarra, iɗosiɗada, quĩrã bʉrasiɗada, posiɗada. Maʉ̃ne jarasiɗada: “¿Bʉda propetabʉrʉ jaradua caiba bʉra posiɗaa?”.

Ʉ̃nadrʉɗacare, edesiɗada Jesura Sanedrín deɗe idisiɗada wãya: “¿Bʉra Ãcõrẽ warrada?”. Jesuba panusida: “Mae mãrãba panuda aɓari quĩrãca mʉda Ãcõrẽ warra”. Maʉ̃ne bio unu amasiɗada idjaɓa jarasiɗada sewaida ɓʉ quĩrãmasiɗada Ãcõrẽra. Ara maʉ̃da edesiɗada de droma deda boro romanonebema Poncio Pilato. ¿Cãrẽda mãwãsida? Acʉɗe wãni.