Davi Goliáme

Jeowaba jarasida Samuel: “Wãdua Jesé deɗa ʉ̃cʉrʉ warra Jesé deɗa dji boro ɓaida Israel puruɗe”. Maʉ̃ bʉrʉ Samuel wãsida, unusida dji warra nabema maʉ̃ bʉrʉ quĩchasida: “ Jãʉ̃gʉdrʉ dji boro ɓaida”. Maʉ̃ne Jeowaba jarasida Samuel: “Mʉ̃a idjira jʉrʉdaẽ́ basida israel boro ɓai carea,mʉ̃a unu ɓʉda ẽberãra sãwã ɓʉda dji so, dji cacua siɗa”.

Jeséba unubisida dewara dji warrara 6 panʉda Samuel. Baribʉrʉ Samuelba jarasida: “Jeowaba jʉrʉ edaẽ́ ɓʉda ni aɓaʉ jãʉ̃gʉ warrarã”, idjia idisida: “¿Maʉ̃za warrarã eroɓʉda?”. Jeséba panusida: “Waɗi aɓa zeẽ́ ɓʉa, Davi jẽdaarebema, ovejada acʉ ɓʉ”. Davi eda wãsida, maʉ̃ne Jeowaba jarasi: “¡Samuel naʉ̃gʉa!”. Maʉ̃ bʉrʉ Samuelba zowuabisida nedragada Davi boro ʉ̃rʉ̃. Jãʉ̃gʉba acʉbisida araarebema boro Israelɗebema.

Dãrã ɓaɗacare wãyã Israelitarãra djõsiɗada pilisteorãme, eropanasiɗada ãdjia dji djõbari bio mẽsrã ɓʉda, trʉ̃ jarabada Golia. Ewariza Goliara ipiɗa bãdjida israelitarã carea idjaɓa jĩgua ɓiabadjiɗaa: “Diabuedua aɓa umaquĩrã mʉ̃me djõi carea. Mãrãba poyasiɗara daira mãrãra nezocada pananida, mʉ̃a poyasira mãwãra mãrãra dai nezoca pananida”.

Davira wãsida sordaora duanʉmae. Edesida ne coɗida dji djabarãda sordao panana bẽrã. Jãma ũrĩsida Golia jaraɗara, maʉ̃ne Davi jarasi: “Mʉ̃ra djõida bʉme”. Maʉ̃ne panusida dji boro Saulba: “Baribʉrʉ bʉra aɓabe warra caibe ɓʉda”. Daviba jarasi: “Jeowaba mʉ̃ra carebaida”.

Maʉ̃ carea Saulba diasida idjia jʉ̃badara Davi djõmãrẽã. Daviba jarasi: “Naʉ̃ jʉ̃nʉba mʉ̃ra poya djõẽ́da”. Maʉ̃ba Daviba edasida jʉ̃carada, jãʉ̃ jʉ̃caraɗe jʉ̃sida mõgarada , jãʉ̃ mõgarara edasida do zaqueɗebema, juesuma wagasida idji bolsaɗe. Maʉbebʉrʉ pirasida idjira Goliamaa, maʉ̃ne Goliaba ɓiasida: “Zedua warra zaque mʉ̃ caita, cawaya sãwãbʉrʉ oida, bʉ̃ra necobiya ĩbana idjaɓa animarã mẽãɗe”. Daviba panusida: “Mʉ̃ra ne wayaẽ́ ɓʉa, bʉa eroɓʉda necoda idjaɓa mĩãsu, maʉ̃ne mʉ̃ra djõya Ãcõrẽ trʉ̃neba, bʉa quĩchabari daime djõ ɓʉda maʉ̃ cãyãbara djõ ɓʉda Jeowamebʉrʉ, jũmarãba ununida Jeowara bio zarea ɓʉda neco cãyãbara idjaɓa mĩãsu cãyãbara idjia poyaida Israelitarãra”.

Mãwãnacare Daviba ɓʉsida idji mõgarara dji jõcaraɗe, maʉ̃bebʉrʉ ta ɓarisida. Jeowaba carebasida, maʉ̃ bʉrʉ Golia beasi. Maʉ̃ carea pilisteorãra pira wãsiɗada bearãɗamãrẽã. ¿Bʉa ĩjã ɓʉɗa aɓari quĩrãca Jeowaɗera Daviba ĩjãbada quĩrãca?