¿Cai ɓasida Jora?

Uz puruɗe, jãma ɓabadjida aɓa umaquĩrã bio ĩjã ɓasida Jeowaɗera, trʉ̃ jarabadjiɗada Jo. Idjira bio parata bara ɓasi idjaɓa dji cuariarã waiɓʉada eroɓasida. Idjira bio sobia ɓasida, maʉ̃ bʉrʉ carebabadjida ẽberã parata ne neẽ́ queɗeara, pẽdra wẽrãrã idjaɓa warrarãda zeze ne neẽ́ queɗea. Joba ne biada bio obadjida. Idjira sobia basimĩna, ¿beɗea droma neẽ́ basida?

Joba adua ɓasida baribʉrʉ Diauruba idjira acʉ basida. Jeowaba jarasida Diaurua: “¿Bʉa acʉ ɓʉda Joba ĩjã ɓʉda mʉ̃ beɗeara? Ni aɓaʉda ɓʉẽ́da idji quĩrãca naʉ̃ ẽjũãne. Idjia bio ĩjã ɓʉda”. Diauruba panusida: “Mãẽ, idjia ĩjã ɓʉda, bʉa waga ɓʉ bẽrã idjaɓa ne biarã, zocãrã ẽjũãrã, animarã siɗa dia ɓʉ bẽrã. Jãʉ̃ra jũma jãrĩdua, mãwãra idjia bʉ beɗeara wa ĩjãẽ́da”. Jeowaba jarasia: “Ne quĩrãtanoa odua, baribʉrʉ bearãdua idjira”. Jeowaba iduaribisida Diauruba ne cadjirua omãrẽã. ¿Cãrẽ cãrẽã Jeowaba iduaribisida Diauruba ne cadjiruara omãrẽã Joa? Idjia cawa ɓasida ameẽ́da idjira.

¿Diauruba ne cadjirua obisida? Mãẽ. Naãrãbema ẽberãra Sabeo puruɗebemaba ne drʉasiɗaa idji pacarã, dji burro siɗa. Mãwãnacarea ovejarã jũma bá quenacuasida zocai queɗeada. Caldeorãba jũma ne drʉasiɗaa idji cameyorã idjaɓa quinisiɗaa idji trajabadarã. Baribʉrʉ mãwãnacarea ne cadjiruara mãwãsida. Warrarãra Jora jũma quinisiɗada. Dji djaba deɗe ne co panasiɗada maʉ̃ne dji dera ʉ̃rʉ̃ cora zesida. Jora bio sopua ɓasida baribʉrʉ idjia ameẽ́ basída Jeowara.

Satanaba quĩrĩã ɓasida Jora bio djuburia baida. Maʉ̃ careabʉrʉ osida idji cacua jũma aiɗaba. Jãʉ̃gʉra bio cacua pua ɓabadjida. Idjia cawaẽ́ basida cãrẽ carea jãʉ̃ cadjiruara bio mãwãsida. Mãwãmĩna idjia ameẽ́ basída Jeowara. Jeowara bio ɓʉrsiɗa sentisida Joba oɗa carea. Idjimaarã jãʉ̃ra bio biara ɓasida.

Mãwãnacarea Satanaba diabuesida umaquĩrãra ũbea sewada jaraɗamãrẽã. Ãdjirãba jarasiɗada: “Bʉra ne cadjirua osida, maʉ̃ careabʉrʉ bʉra bio djuburia ɓʉda idjaɓa quẽã ɓʉda Ãcõrẽba”. Joba panusida: “Mʉ̃a ocada ne cadjiruara”. Mãwãnacarea idjia quĩcha ɓasida: “Jeowaba mʉ̃ra ne cadjirua dia ɓʉda, maʉ̃ bʉrʉ Jeowaba mʉ̃me bia ɓʉẽ́da”.

Aɓa umaquĩrã cũdra trʉ̃ jarabada Elihú. Idjia ũrĩsida jãʉ̃ beɗea panʉne, baribʉrʉ chupea basida. Maʉ̃ bʉrʉ idjira jarasida: “Jũma bãrãba cawaɗaẽ́ panʉda. Jeowara bio biara ɓʉda dewara ɓea cãyãbara. Idjia ne cadjiruara ocada. Maʉ̃ cãyãbara idjia jũma unu ɓʉda idjaɓa careba ɓʉda ẽberãrãra beɗea droma eropanʉne.

Jeowara beɗeasida Jome. Idjia jarasida: “¿Bʉra sãma basi mʉ̃a osiɗe bajã ẽjũã siɗa? ¿Cãrẽ cãrẽã quĩchabarida mʉ̃a biẽ́ o ɓʉda bʉra? Bʉa adua ɓʉda cãrẽda mãwã nũmʉda”. Joba cawasida idjia jaraɗara jãʉ̃ra biẽ́ ɓʉɗa, maʉ̃ bʉrʉ jarasida: “Quĩrãdoaida mʉ̃a jaraɗara. Naẽna ũrĩsida bʉreɗebemada baribʉrʉ ara naʉ̃da cawasida bʉra. Mʉ̃a cawa ɓʉa bʉa jũma poya oida”.

Jũma jõnacarea ne cadjiruara, Jeowaba ne bia diasida Jora naẽnabema cãyãbara. Jora bio dãrã zocai ɓasida dji cuariarãme. Jeowaba carebasida Jora idjia bio ĩjã ɓaɗa bẽrã Jeowara, eɗauɗera bio zarea basimĩna. ¿Bʉra Jo quĩrãca ɓʉda? ¿Bʉa bio ĩjãbarida Jeowaɗera ne cadjirua mãwã ɓʉmĩna?.