Dji boro djiwiɗi idjaɓa wẽrã umé sozarra ɓasida

Josueba jipa ede ɓasida puru Ãcõrẽnebemara bio dãrã. Dãrã baɗacarea 110 poa eroɓasiɗe, beusida. Dji idi panesiɗada Jeowaa, Josue zocai basimĩsa. Baribʉrʉ beusida Josuera. Mãwãnacarea, ara maʉ̃da dji iwiɗi panesiɗada dji ẽberã Canaaʉ̃nebema quĩrãca. Israelitarãba wãya ĩjãnaẽ́ basida Jeowaɗera. Idjia amesida dji boro Canaaʉ̃nebema, Jabiʉ̃. Jãʉ̃gʉba bio beɗea dromara oida. Maʉ̃ carea puruba jarasiɗada Jeowaa carebaida. Mãwãra Jeowaba wãya diasida djiwiɗi dji boroda trʉ̃ jarabada Baraco. Idjia carebaida ẽberãrã ʉ̃taa idimãrẽã Jeowa.

Deborara wẽrã propeta basida. Maʉ̃ carea idjia trʉ̃sida Baracra beɗea bia jarai carea Barac. Deboraba Baracoa jarasida: “Jãʉ̃ do zaque trʉ̃ jarabada Cisoʉ̃ wãdua, 10.000 umaquĩrãrã djõni carea ejercitorã Jabiʉ̃nebemarame. Jãma poyaɗida Sisarara”. Idjira dji boro ejercitoɗebema ɓasida. Baracoba panusida Deboraa: “Mʉ̃ra wãida baribʉrʉ bʉda mʉ̃me wãida”. Idjia panusida: “Wãida bʉme, baribʉrʉ bʉ́a jaraida beaẽ́da Sisarara. Jeowaba jaraɗa quĩrãca wẽrãbʉrʉ aɓabe beaida”.

Deborara wãsida jãʉ̃ eyada trʉ̃ jarabada Tabor. Ãbaa Baracome idjaɓa dji ejercitorã siɗa, ara oɗi carea djõni carea. Cawasida Sisaraba ãbaa jʉresiɗada ãdji carro djõbadaɗebema idjaɓa ãdji ẽberãrã ẽjũã jeweɗaɗe. Deboraba jarasida Baracoa: “Iɗi Jeowaba diaida ne biada”. Maʉ̃ bʉrʉ Baracora idjaɓa 10.000 umaquĩrãrã zesiɗada eyaɗeba eɗaa beaɗi carea dji zareara ejercito Sisaraɗebemada.

Mãwãnacarea Jeowaba osida jãʉ̃ do zaquera trʉ̃ jarabada Cisoʉ̃ nãbua ũmasia. Uɗu jʉ̃drʉpeɗa maʉ̃ bʉrʉ ãdji carrora djõbadaɗebemara jou nũmesida. Sisara eɗa ɓadopeɗa pira wãsida. Baracoba idjaɓa dji sordaorã biɗa poyasiɗada ãdji ejercitorã Sisaɗera. Maʉ̃ bʉrʉ Sisarara mĩrũ wãsida wẽrã deɗaa. Jãʉ̃ wẽrã trʉ̃ jarabada Jael. Jãʉ̃gʉ wẽrãba dobisida paca juɓada idjaɓa idjía wuaba ãnẽɓari ɓʉsida. Dji ẽberã djõbarira ɓesida bio cãĩ ɓʉda. ¿Cãrẽã? Idjira sẽ ɓaɗa bẽrã. Maʉ̃ bʉrʉ Jael caida wãsida chupea susida mĩãsuba idji boroɗe. Maʉ̃ bʉrʉ beusida.

Mãwãnacarea jũẽne wãsida Baracoba jʉrʉ ɓʉda Sisarara. Jael audiaɓaripeɗa idji wua dedeba jarasida: “Eɗa wãdua, acʉbiya bʉa umaquĩrã jʉrʉ ɓʉra”. Baracora eɗa wãpeɗa unusida Sisasara ẽjũãne tabʉda beuɗada. Maʉ̃ bʉrʉ Baracoba idjaɓa Debora ara maʉ̃da trʉ̃ãsiɗada Jeowa carea, carebaɗa bẽrã ãdji dji quĩrũme. Dji ẽberãrã Israelɗebema panasiɗada necai dãrã jãma 40 poa.