Esterba ẽdrʉbisida idji purura

Ester awẽrã basida, judiaɗebema basi jãma ɓabadjida jãʉ̃ puruɗe trʉ̃ jarabada Susa, Persia druaɗe. Dji boro Nabucodonosorba ede wãsida dji cuaria Esterɗebemara Jerusaleʉ̃ra. Jãʉ̃gʉ wẽrã zaquera daupẽsiɗada dji djaba cau Mardoqueoba. Idjira trajasida dji boro Asuerome Persia puruɗe.

Dji boro Asueroba quĩrĩã ɓasida aɓa djiwiɗi boro quimada. Maʉ̃ bʉrʉ dji nezocarãba ede wãsiɗada wẽrãrãda mãsa mẽrã queɗeada ẽjũã enteroɗebemada. Jãʉ̃ eda ɓasida aɓa Ester. Jũma jãʉ̃ wẽrãrãra dji boroba jʉrʉ edasida Esterda aɓabe idjira bio merara ɓaera dji quima ɓai carea. Maʉ̃ bʉrʉ jarasida Mardoqueoba: “Jaraẽ́da bʉra judiara”.

Aɓa umaquĩrã bio dji cadjirua ɓasi dji trʉ̃ jarabada Amaʉ̃. Jãʉ̃gʉra dji boro jũmarã principeɗebema basida. Idjia quĩrĩã ɓasida jũmarãba chĩrãboroɗe copanenida idji quĩrãpita. Baribʉrʉ Mardoqueora chĩrãboroɗe coɓeẽ́ basida. Amaʉ̃ bio quĩrũ ɓasida maʉ̃ bʉrʉ aɓeɗa quena quĩrĩãsida. Amaʉ̃ba cawasida Mardoqueora judioɗebemada. Maʉ̃ bʉrʉ quĩchasida: Jũma quenaida judiorãra ẽjũã enteroɗebemara. Jarasida dji boroba: “Judiorãra bio ne cadjirua ɓeada mãwãmĩna quenanida jũma”. Asuero panusida: “Odua bʉmaarã biara ɓʉda”, jãʉ̃ra iduaribisida omãrẽã aɓa leyda. Jãʉ̃gʉ leyba jarasida: “Ewari 13 jeɗeco Adarɗe ẽberãrãra jũma quenaida judiorãra ẽjũã enterobemara”. Baribʉrʉ Jeowaba cawa ɓasida jũma.

Baribʉrʉ Esterba jãʉ̃ Leyɗebemada adua ɓasi. Maʉ̃ne Mardoqueoba jũma nẽbʉrʉsida Estera. Maʉ̃be Mardoqueoba jarasida: “Bʉra wãida dji boromaa beɗeaɗe”. Esterba panusida: “Mʉ̃ra idjia edecaẽ́ ɓʉda. Maʉ̃ba mʉ̃da wãibʉrʉ idjia mʉ̃ra bea quĩrĩã ɓʉda. Baribʉrʉ idjimaa wãida. Maʉ̃ne idji bardonaba mʉ̃maa waibʉrʉ mʉ̃ra zocai ɓaida. Baribʉrʉ mãwãẽ́bʉrʉ mʉ̃ra beuida”.

Estera wãsida dji boro ɓʉmae. Maʉ̃ne dji boroba idji unubʉrʉɗe idji jʉwaɗe eroɓʉba idjimaa waisi. Maʉ̃ba Ester caita wãsida. Dji boroba idisida: “¿Cãrẽda quĩrĩã ɓʉ Ester?”. Idjia panusia: “Mʉ̃a edeca quĩrĩã ɓʉda bʉra wãida Amaʉ̃me ãbaa ne coɗi carea. Mãwã o quĩrĩã ɓʉda bãrãme”. Ãbaa ne co panʉne Esterba jarasia: “Wãya ne coɗida”. Maʉ̃ unusida copeɗaɗacarea dji boroba idisia: “¿Bʉa cãrẽda quĩrĩã ɓʉ Ester?” idjia panusida: “Aɓa ɓʉ ẽberãba mʉ̃ra bea quĩrĩã ɓʉa idjaɓa jũma mʉ̃ pururaɗebema. Dai quĩrã djuburiada dai quenarãnamãrẽã”. Dji boroba idisia: “¿Caiba bea quĩrĩã ɓʉ?” Idjia panusia: “Za ɓʉ ẽberã cadjirua Amaʉ̃ba”. Maʉ̃ba dji boro Asuerora bio quĩrũsia. Ara maʉ̃da jarasida beaɗamãrẽã Amaʉ̃da.

Jãʉ̃ ewariɗe dji ley Amaʉ̃ba oɗara ni aɓaʉ ẽberãba ĩjãniẽ́ basia. Idjaɓa dji boroba biɗa poya ĩjãniẽ́ basi. Maʉ̃ bʉrʉ dji boroba Mardoqueoda jũmarã boroda ɓʉsia. Idjaɓa Mardoqueoba idu obisia ley djiwiɗida omãrẽã. Jãʉ̃ leyba jara basida judiorãba ãdji quenane zebʉdaɗe ãdjirãra djõnida panasiɗada. Jãʉ̃ ley ewari 13 jeɗeco Adarɗe poyasiɗada dji quĩrũrã. Poagaza quĩrãneba panasiɗada ãdji djõpeɗaɗaɗebema poyapeɗaɗa.