Bajãnebema nezocaba Mariaa acʉɗe wãna

Mariara awẽrã ɓasida. Idjira ɓabadjia Nazare puruɗe, Galileaɗe. Idjira Elisabe cuariara basia. Mariara mĩã cãĩ basida Joseme. Josera trajabadjida carpintero. Elisabe sei jeɗeco ɓiogoa ɓeɗacare, maʉ̃ne angel Gabriel idjia unubisida Maria. Idjia jarasida: “¿Bʉa sãwã ɓʉ? Jeowaba bʉra bia ununa bẽrã mãwãbʉrʉ ne bia diaida”. Mariaba cawaẽ́ basida cãrẽnebemada Gabrielba beɗea ɓasida idjía. Maʉ̃ne Gabrielba idjía jarasida: “Bʉra ɓiogoa ɓeida idjaɓa warra eroɓaida. Idji trʉ̃ra jaradia Jesu. Idjira dji boro ɓaida idjaɓa dãrã ɓaida”.

Mariaba panusia: “Baribʉrʉ mʉ̃a umaquĩrã adua ɓʉda. ¿Sãwã mʉ̃ra poya ɓiogoa ɓeida?” Maʉ̃ne Gabrielba panusia: “Jeowaba jara ɓʉra jũma idjia poya oida. Ãcõrẽ jaure zeida jãʉ̃ warra tomãrẽã idjaɓa bʉ cuariara Elisabe idji siɗa ɓiogoa ɓʉda”. Maʉ̃ne Mariaba panusia: “Maʉ̃ne wãrãda mʉ̃a Ãcõrẽ Beɗea bio ĩjã ɓʉa. Idjia o quĩrĩã ɓʉra oibʉrʉ, mʉ̃a poya ĩjãida”.

Mariaba acʉɗe wãsida Elisabera. Maʉ̃ne Mariaba beɗeasia Elisabea. Elisabe ɓiteɗa ɓʉa warra zaquera, idjira domicasia. Elisabera bio capipiasida Maria unusiɗe. Maʉ̃ne Elisabeba jarasida: “Bʉa Jeowaba ne biada dia ɓʉra, jãʉ̃ra bio biara ɓʉda. Bia ɓʉaɗa zeɗa bẽrã”. Mariaba panusia: “Mʉ̃a bio ĩjã ɓʉda mʉ̃ soɗeba Jeowaɗebemara”. Idjira jeɗeco ũbea ɓesida Elisabeme. Tẽãbe baɗacarea idjira idji deɗaa zesida Nazare puruɗe.

Joseba cawapeɗa Mariara ɓiogoa ɓesida, idjira Mariame mĩã cãĩ ama ɓasida. Maʉ̃ne angelba cãĩmocaraɗeba beɗeasida Joseme. Idjia jarasida: “Bʉa poya mĩã cãĩda Mariame. Idjia ne cadjirua oẽ́ ɓʉ bẽrã”. Maʉ̃ carea Joseba mĩã cãĩnacarea Mariame, idjia ede wãsida idji deɗa.