Jesu wẽrãme beɗeaɗa baido juebada uriaɗe

Pascua mãwãnacarea, Jesura idji caiɗubema siɗa wãya jẽda wãsiɗada Galileaɗaa. Ãdjirãra oɗe wãsiɗaɗe Samariaɗe panasiɗada. Jãma caita puru trʉ̃ jarabada Sicar. Jãma ɓasida uriada baido juebadada Jacoboba querasiɗeda. Jesura ɓesida jãma chũmesida ʉ̃nãũ ɓai carea idji caiɗubemarã siɗa. ãdjirãra wãsiɗada puruda ne nẽdoɗi carea coɗi carea.

Aɓa wẽrãda zesida uriada baido juei carea. Jesuba jarasida: “Diadua baido doi carea”. Jãʉ̃ wẽrãba panusi: “¿Cãrẽã mʉ̃́a beɗea ɓʉ? Mʉ̃ra samaritana wẽrã. Judiorãbara beɗeaɗaca samaritanorã”. Jesuba jarasia: “Bʉa cawa ɓʉbara caita mʉ̃́a, bʉa diai basida baido domãrẽã idjaɓa mʉ̃a diai basida baido zocai ɓai carea”. Jãʉ̃ wẽrãba panusida: “¿Cãrẽda jara quĩrĩã ɓʉ? Bʉa neẽ́ ɓʉa cãrẽba baidora jueida”. Jesuba jarasi: “Naʉ̃ baido dobʉrʉa mʉ̃a diaɗara jãʉ̃gʉra opichia eroɓaẽ́da”. Dji wẽrãba jarasia: “Diadua jãʉ̃gʉ baido”.

Mãwãnacarea Jesuba jarasida: “Jaraida bʉ quima zeida”. Dji wẽrãba panusia: “Mãwãẽ́a. Quima neẽ́ ɓʉda”. Jesuba jarasia: “Wãrãda. Barima juesuma mĩã cãĩ ɓasida. Baribʉrʉ ara naʉ̃da bʉra mĩã cãĩẽ́ ɓʉda jãʉ̃gʉ umaquĩrãme”. Dji wẽrãba panusida: “Mʉ̃a unu ɓʉda bʉra propetada. Ẽberãra mʉ̃ puruɗebema quĩchabadada poya dji idiɗida Ãcõrẽa jãʉ̃gʉ eyaɗe. Baribʉrʉ dji judiorãba jarabadada poya dji idida Ãcõrẽa aɓabe Jerusaleʉ̃ne deɗe. Mʉ̃maarã idji Mesia jũẽcarea, idjia cawa jaradiaida sãwãbʉrʉ dji idiɗiɗa Ãcõrẽa”. Maʉ̃ne Jesuba jarasia naẽna jaraẽ́ ɓaɗada ni aɓaʉa: “Mʉ̃drʉ Mesia”.

Dji wẽrãra ara maʉ̃da pira wãsida puruɗaa jaraɗe wãsida samaritanorãa: “Mʉ̃maarã unusida Mesiada. Idjia cawa ɓʉda jũma mʉ̃ cacuaɗebemara. Maʉ̃ carea zeɗadua”. Ara maʉ̃da wãbʉrʉsiɗada jãʉ̃ wẽrãme baido juebadamae ũrĩnicarea jaradia ɓʉda Jesuba.

Ara maʉ̃da dji samaritanorãba idisiɗada Jesua: “Bʉ̃ra ɓeida daime”. Jesuba ewari umé jaradia ɓesida jãʉ̃ puruɗe idjaɓa zocãrãrãba ĩjãsiɗada bio Jesuɗera. Jẽdari ɓaɗacarea jarasiɗada samaritana wẽrãa bio ũrĩnida naʉ̃ umaquĩrãba jaradia ɓʉra: “Naʉ̃drʉ wãrã arada dadji Ẽdrʉ̃ Edabari naʉ̃ ẽjũãne”.