Jesuba ne ununacada osia

Jesura zesida naʉ̃ ẽjũãnaa jaradiai carea beɗea bio biara ɓʉda dji Boroɗebemada Ãcõrẽne. Mãsa Jeowaba diasida dji Jaureda omãrẽã ne ununacada idjaɓa acʉbimãrẽa maʉ̃ oɗa dji Borora. Ejemploda: Jesuba poyaida biabi baridua ẽberãra. Idjia wãbʉrʉza enferma queɗeaba idibadjiɗada ãdjirã carebamãrẽã. Idjia biabibadjida jũma dauɓerrea ɓea poya unui carea, cʉwʉrʉ qui ɓea biɗa ũrĩni carea, poya piradrʉca ɓʉ biɗa piradrʉ wãi carea. Aɓabe jidabʉrʉda cacua jʉ̃bari Jesuɗeda, jãʉ̃gʉba poya biaida. Jesuba ãyã jʉretabadjida diauru cacuaɗe ɓeara. Maʉ̃ bʉrʉ ẽberãrã ẽpẽbadjiɗada idjia wãbʉrʉza. Idjia igaraca basida idjiɗuba ɓa quĩrĩã ɓʉɗe biɗa.

Aɓaʉ ewariɗe, edesiɗada aɓa poya wãca ɓʉda idji ɓʉmae. Baribʉrʉ barasida ẽberãrã. Maʉ̃ bʉrʉ poya eɗa wãnaẽ́ basí. Maʉ̃ bʉrʉ osiɗada de ʉ̃rʉ̃ uria ɓesiɗada poya eɗa wãni carea Jesumaa. Maʉ̃ne Jesuba jarasida jãʉ̃ poya wãcara: “Piradrʉida”. Ara maʉ̃da wãsida idjira. Ẽberãrãmaa jãma ɓesida idjia bio quĩrãcuita unusida. Maʉ̃ carea jũmarãba cawa quĩchaɗaẽ́ basida.

Aɓaʉ ewariɗe, Jesura jũẽne wãsida puruda, die umaquĩrãrãme aiɗaɗe ɓeame jĩgua beɗeaɗamãrẽã tʉmʉba: “¡Jesu carebadua!”. Jãʉ̃gʉ ewariɗera wãbiɗaca basída ẽberã aiɗaɗe ɓeara ni caita biɗa wãnaca basída ẽberã aiɗaɗe ɓea. Ara maʉ̃da Jesuba umaquĩrãrã jarasia: “Wãnadua Ãcõrẽ de dromanaa”. Biaɗacarea dji Ley Jeowaɗeba jarasida ẽberãrã aiɗa ɓaɗa ɓeaɗara jãma wãnida panasiɗada. Wãbʉdamisa Ãcõrẽ de dromanaa dji aiɗaɗe ɓeara ara maʉ̃da biacuasia. Aɓa ẽberã aiɗada ɓaɗaba unusida idjira ya bia ɓasida. Maʉ̃ne wãya wãsida Jesumaa bia ɓʉaɗa ai carea. Aɓabe sãʉ̃gʉ ẽberã aiɗaɗe ɓaɗaba Ãcõrẽa bia ɓʉaɗa asia Jesua.

Aɓa wẽrã 12 poaga basida enferma ɓʉda idjira. Quĩrĩã ɓasida biaida. ¿Cãrẽã? Oamiaba jida ɓaɗa bẽrã droaẽ́ bacasida mãsa. Maʉ̃ bʉrʉ eɗa wãsida ẽberãrã tãẽna caita wãi carea Jesumaa. Ẽcarrareba tãne wãsida cacua jʉ̃bari Jesuɗeda. Ara maʉ̃da biasida. Maʉ̃ne Jesuba idisida: “¿Caiba mʉ̃́ra tãsi?” Dji wẽrãra bio pera basida. Baribʉrʉ caita wãpeɗa idjimae nẽbʉrʉsida jũma. Jesuba jarasida: “Necai wãdua”.

Aɓa judio dji dromada trʉ̃ jarabada Jairo jarasida Jesua: “Wãdua mʉ̃ deɗe. Mʉ̃ caura bio enferma ɓʉda”. Baribʉrʉ Jesura jũẽne wãi naẽna Jairo deɗaa, wẽrãcaura beubarisida. Jũẽne wãsida Jesura unusida zocãrã ẽberãrãra jĩã duanʉ dji cuariara siɗa. Jesuba jarasida: “Jĩãrãnadua. Aɓabe idjira cãĩ ɓʉa”. Ara maʉ̃da jidasida dji jʉwaɗe wẽrã zaquera. Jarasida: “Wẽrãcau ¡Piradrʉdua!” Dji wẽrã zaquera ara maʉ̃da piradrʉsida. Jesuba jarasida djibarirãa: “Diaɗadua ne bariduada comãrẽã”. ¡Quĩchaɗadua sãwã sentisiɗada djibarirã!