Jeowara beɗea ɓasida Samuelme

Dji sumo sacerdote Eli eroɓasida ume warra: Opni idjaɓa Pinea. Ãdjirãra sacerdotera basida, trajabadjiɗada Ãcõrẽ deɗe, baribʉrʉ ĩjãnaca basida dji ley Ãcõrẽne maʉ̃ cãyãbara biẽ́ obadjiɗada ẽberãrãra. Dji israelitarã edebadjiɗada ne baɗada Jeowa carea, Opni idjaɓa Pinea ãdjia edebadjiɗada dji djara bio biara ɓʉda ãdji carea. Eliba cawa basida dji warrarãba biẽ́ obadjiɗada ẽberãrãra, baribʉrʉ idjia beɗea bia diaẽ́ basida. ¿Jeowaba cãrẽda o basida?

Samuelra idjira bio caibeara basi Opni, Pinea cãyãbara, mãwãmĩna idjia oca basida ne cadjiruara ãdjirãba oɗa cãyãbara. Maʉ̃ bʉrʉ Jeowara bio ɓʉsriɗa basida idjime. Aɓa dimisiɗe Samuel cãĩ ɓʉɗe ũrĩsida jĩgua trʉ̃ jara ɓʉda, ara maʉ̃da piradrʉsida, acʉɗe wãsida Eli, idisida: “¿Bʉa mʉ̃ trʉ̃ jarasica?”. Baribʉrʉ Eliba panusida: “Mʉ̃a trʉ̃ jaraẽ́ ɓʉa, wãdua cãĩne”. Samuel wãya wãsida cãĩne. Maʉ̃ne wãya ũrĩsida Samuelba beɗea jĩguada, beɗea ũbea ũrĩsida aɓa ɓʉ beɗea, Eliba cawasida jãʉ̃ra Jeowaba trʉ̃ jara ɓʉɗa Samuelra. Eliba jarasida: “Wãya ũrĩsida jãʉ̃ beɗea jĩguada panudua: “Nama ɓʉa Jeowa ɓʉ ẽpeba ũrĩ ɓʉa”.

Samuel wãya idji cʉɗada wãsia, wãya ũrĩsia beɗea jĩguada: “Samuel, Samuel”. Idjia panusia: “Jaradua Jeowa ɓʉ ẽpeba ũrĩ ɓʉa”. Jeowaba jarasi: “Jaraida Elia mʉ̃a bʉra quẽãida bʉ cuariara siɗa. Idjia cawa basida dji warrarãba ne biaẽ́da o panʉda Ãcõrẽ deɗe, baribʉrʉ idjia quẽãẽ́ basi”. Nurẽma diapeɗe Samuelba ewasida puertada Ãcõrẽ deɗebemada, ne waya basida jaraida jãʉ̃ beɗea bia jarada Jeowaba dji sumo sacerdote. Baribʉrʉ Eliba trʉ̃sida, idisida: “Warra ¿cãrẽda jarasi Jeowaba?”. Maʉ̃ne Samuelba jũma nẽbʉrʉsida.

Samuelra warisida, Jeowa idu ɓʉẽ́ basida maʉ̃za dji biaba ɓesi. Israelitarãba cawa panasiɗada Jeowaba jʉrʉ edasida Samuelra dji propeta bamãrẽã idjaɓa dji Jue bamãrẽã.