Cũdrarã quĩmãrẽba Jeowaɗera ĩjã panasiɗaa

Nabucodonosorba jʉrʉpe edasida principe Juda puruɗebemada. Idjaɓa acʉbisida ẽberã Aspena abada. Jarasida Aspenaa jʉrʉɗe wãi cũdrarã boro bio biara ɓeada. Jãʉ̃ cũdrarãba cawaɗi basída Babilonia puruɗebemada, leaɗi basída ãdjirã beɗearaɗebemada idjaɓa ɓʉɗi basída. Mãʉ̃ careabʉrʉ jãʉ̃ cũdrarãba ne coɗi basída dji boro quĩrãca. Ãdji trʉ̃ra jarabadjiɗada Daniel, Ananía, Misael idjaɓa Azaría. Baribʉrʉ Aspenaba ɓʉsida dewara trʉ̃da Babilonia puruɗebemada: Belsazar, Sadrac, Mesac idjaɓa Abednego. ¿Bʉa quĩcha ɓʉca ãdjirãba jãʉ̃ oɗa bẽrã quĩrãdoaɗi basída Jeowara?

Jãʉ̃ quĩmãrẽ cũdrarãba ĩjãna quĩrĩã panasiɗada Jeowa Beɗeara. Maʉ̃ bʉrʉ coɗaẽ́ basída dji boroba cobarira. Ãdjirãba cawa panana bẽrã jãʉ̃ ne cobadara Jeowaba quĩrĩãca bẽrã. Baribʉrʉ Aspenaba jarasida: “Bãrãba jãʉ̃ ne cobadada coɗaẽ́bʉrʉ mʉ̃ dji borora quĩrũpeɗa mʉ̃ra beaida”.

Mãwãnacarea Danielba Aspenaa jarasida: “Quĩrã djuburiada aɓabe bʉrʉ daira diaida baido doɗi carea idjaɓa neta cobada coɗi carea: Tomate, zanahoria, pepino, manzana, domia aɓa jãʉ̃ra oɗida. Tẽãbe bʉa daia jaraida dai cacuara sãwã unuida dewara warrarãba ne cobada co panʉ dji boroɗebema cãyãbara”.

Domia aɓa baɗacarea Daniel idjaɓa dji biarã ũbeaɗebemara biɗa bio bia panasiɗada ãdji cacuara dewaraʉ warrarã cãyãbara. Maʉ̃ carea Jeowara bio ɓʉsriɗa basida ãdjirã carea, ãdjirãba bio ĩjãna bẽrã Ãcõrẽ Beɗeara. Jeowaba quĩcha biara diasida Daniel, cãĩmocaraɗeba jarai carea.

Poaga ũbea baɗacarea Aspenaba ede wãsida cũdrarãra Nabucodonosor quĩrãpita acʉmãrẽã. Dji borora beɗeasida ãdjirãme. Idjia cawasida Daniel, Ananía, Misael idjaɓa Azaría siɗa bio quĩcha cawa panasiɗada dewaraʉ cũdrarã cãyãbara. Maʉ̃ bʉrʉ dji boroba ãdjirã quĩmãrẽ edasida idjime trajaɗamãrẽã idjaɓa consejo bia idi carea. Mãwãnacarea Jeowaba bio quĩcha cawaɗara diasida ãdjirã dewaraʉ ẽberãra cãyãbara.

Daniel, Ananía, Misael idjaɓa Azaría ãdjira puruɗe pananaẽ́mĩna ãdjia cawa panasiɗada wãrãda Ãcõrẽ puruɗe waɗi panʉda. Bʉra bʉ djibarirãba panʉẽ́mĩna, ¿Ãcõrẽme ɓaida?