Jesu cũdra ɓasiɗe

Jose Mariara panabadjiɗada Nazareɗe Jesu siɗa idjaɓa dji warrara dewaraʉra siɗa. Josera traja ɓabadjida carpinterota dji cuariara necobi carea idjaɓa jaradia ɓabadjida Jeowaɗeda dji ley. Dji cuariarãme poagaza wãbadjiɗada sinagogada dji idiɗi carea Ãcõrẽa idjaɓa wãbadjiɗada Jerusaleʉ̃na oɗi carea dji piesta pascua jũma poaza.

Jesura ero ɓasida 12 poa, Jesu dji cuariara osiɗada wãni carea tʉmʉ Jerusaleʉ̃ra, jãʉ̃ purura bio bira basida ẽberãba idjaɓa obadjiɗada pascua, jõnacare jãʉ̃ piesta Jose Maria wãsiɗada ãdji deda, quĩchasiɗada Jesura wãbʉrʉda ãdjime idjaɓa dji cuariarã siɗa. Baribʉrʉ jʉrʉ ɓʉɗabara ãdji wãbʉdarãyã ununaẽ́ basida.

Mãwã jiruãbẽrãɗi carea Jerusaleʉ̃na, dãrãsiɗada ewari ũbea, jʉrʉ panʉda ãdji warra, maʉ̃ne unusiɗada Ãcõrẽ deɗe. Jãma basida Jesura. Idjira chũmasida ẽsãrica dewaraʉ carta cawa ɓearãya. Maetrorãba quĩrãcuita ũrĩsiɗada Jesuɗera idjaɓa idisiɗada idjia. Maʉ̃ carea ãdjirãba jarasiɗada Jesuba bio cawa ɓʉda jãʉ̃ ley.

Jose, Mariara bio sopua panasiɗada. Mariaba jarasida: “Warra ¿Sãma basi bʉra? Daiba jʉrʉ panasiɗada”. Jesuba panusia: “Cawaɗaẽ́ panasiɗaca mãrãba mʉ̃ra ɓaida mʉ̃ zeze deɗebʉru.

Jesura jiruãbẽrã zesida dji zezeme Nazarera. Jãma Joseba jaradiasida Jesua trajaida carpinterota. ¿Cãrẽda quĩcha ɓʉ? ¿Bʉmaarã sãwã basida Jesu wari wãsiɗe? Jesura maʉ̃za warisida quĩcha cawa, maʉ̃ bʉrʉ Jeowaba quĩrĩãsida idjaɓa ẽberãra biɗa quĩrĩãsiɗada maʉ̃za.