Djõya ɓʉ dji cau zaqueme

Siria puruɗe ɓasida wẽrã zaque Israelitaɗebemada. Dji boro Siriaɗebemaba ede wãsiɗada jãʉ̃ wẽrãcaura dji nezoca ɓamãrẽã dji quima boro Naamaʉ̃me. Wẽrãcauba bio ĩjã ɓabadjida Jeowaɗera baribʉrʉ dewararãba ĩjãnaca basiɗada Jeowaɗera.

Jãma dji boro trʉ̃ jarabada Naamaʉ̃. Idjira bio enferma ɓasida. Chãdaba entero bira basida cacuara. Maʉ̃ bʉrʉ wẽrãcauba careba quĩrĩã ɓasida. Naamaʉ̃ quimame beɗeasida. Jarasida: “Israel puruɗe ɓʉda aɓa propeta trʉ̃ jarabada Eliseo. Jãʉ̃gʉra Jeowaɗebemada, idjia poya carebaida”.

Naamaʉ̃ quimaba ũrĩsida wẽrã zaqueba nẽbʉrʉɗara, maʉ̃ bʉrʉ jarasi idji quimaa. Naamaʉ̃ idji cacuaɗebemara biabi quĩrĩã ɓasida. Maʉ̃ bʉrʉ jʉrʉɗe wãsida dji propeta Eliseo. Naamaʉ̃ba acʉɗe wãsida idji deda Eliseora. Baribʉrʉ idjira bio biya beɗeaẽ́ basia. Maʉ̃ cãyãbara ni ẽdrʉẽ́ basida. Eliseoba dji nezocaɗeba jarasida: “Barima siete cuidua do Jordaʉ̃ne. Mãwãra bʉra biara ɓeida”.

Dji boro Naamaʉ̃ bio quĩrũsida. Idjia ne o ɓʉra bio biara ɓʉda Eliseoba jaraɗara cãyãbara.

Maʉ̃ bʉrʉ dji nezocarãba jarasiɗaa: “Bʉa bio quĩrĩã ɓʉ, jãʉ̃ propeta Eliseoba jaraɗara odua. Cuiɗe wãdua. Mãwãra bʉra biasida”. Barima siete cuisida. Doeɗaʉba ẽdrʉpeɗa acʉsida idji cacuara chãda ɓaɗara neẽ́ ɓasida. Ɓʉsriɗasida. Ara maʉ̃da wãsida Eliseomaa jarai carea bia ɓʉaɗa ai carea. Naamaʉ̃ba jarasida: “Ʉ̃rãbʉrʉ cawasida Jeowara wãrã ara Ãcõrẽda”. ¿Sãwã sentisida wẽrãcau Israelitaɗebemaba jãʉ̃ unupeɗa? ¿Bʉa cãrẽda quĩcha ɓʉ?