Josue Gabaoʉ̃nebemame

Dewaraʉ puruɗebema Canaaʉ̃ne jãʉ̃gʉrãba cawasiɗada cãrẽda mãwãsida Jericoɗe. Dji bororã jãʉ̃gʉ puruɗebemarã quĩchasiɗada ãbaa wãnida djõni carea israelitarãme. Ẽberãrã Gabaoʉ̃nebemaba quĩchasiɗada ne oɗi carea. Ãdjirãba jʉ̃siɗada wua soresorea queɗeada. Maʉ̃be bʉrʉ wãsiɗada Josuemaa. Ãdjirãba jarasiɗada: “Zebʉdada ẽjũa tʉmʉneba. Ũrĩsiɗada bʉ Ãcõrẽba oɗada Egipto puruɗe, idjaɓa Moab puruɗe biɗa. Bʉa daia jaraida wãrãda, dairãra quenaẽ́da, dairãra panenida bʉ nezoca quĩrãca”.

Josueba ĩjãsida. Maʉ̃ bʉrʉ jarasida: “Mʉ̃a quenaẽ́da bãrãra”. Baribʉrʉ ewari ũbea baɗacarea, Josueba cawasida ãdjirãra tʉmʉbemaẽ́ basída. Maʉ̃ cãyãbara ãdjirãra Canaaʉ̃nebema ɓasida. Mãʉ̃ bʉrʉ Josueba idisida: “¿Cãrẽ cãrẽã bãrãba mʉ̃́a sewada jarasiɗada? Ãdjirãba panusiɗaa: “Ne waya panasiɗada. Cawa panʉda bʉ Jeowaba bio careba ɓʉda bãrãra. Dai djuburia, bearãdua dairãra”. Josueba jũma osida idjia jaraɗara.

Ʉ̃cʉrʉ ewariɗe juesuma dji bororãda Canaaʉ̃nebemarãda dji ejercitorãya wãsiɗada beaɗi carea dji Gabaoʉ̃nebemarã siɗa. Josue dji ejercitorãya wãsiɗada jãma carebaɗi carea Gabaoʉ̃nebemada. Djõsiɗada diapeɗeɗa. Maʉ̃ bʉrʉ dji Canaaʉ̃nebemara ara maʉ̃da ãyã mĩrũ wãsiɗada. Baribʉrʉ Jeowaba ɓaebisida ãdji ʉ̃rʉ̃ cue dromada mõgara quĩrãca. Maʉ̃ carea Josueba idisida Jeowa: “Piqui nũmʉdua ʉ̃mãdau”. Jãʉ̃ ʉ̃mãdaura piqui ɓacaa basída ¿Cãrẽ cãrẽã Josueba jãwã idisida? Josueba bio ĩjã ɓaɗa bẽrã Jeowaɗera. Maʉ̃ bʉrʉ jãʉ̃ ʉ̃mãdaura jãma piqui nũmebi jarasida. Jãʉ̃gʉ ewariɗe pãĩma nũmeẽ́ basída, israelitarãba poyasiɗada ãdji bororã idjaɓa ãdji ejercitorã siɗa.