Iɗiɗera mʉ̃a dewaraʉa poya carebaida

MɄ̃A NAẼNA O ƁASI:

Mʉ̃ra Acul puruɗe tosia, Guatemalaɗebema. Mʉ̃ cuariara ixileɗebema cultura mayaɗe, mʉ̃ra cãpũrĩã beɗea beɗea ɓʉda idjaɓa mʉ̃ beɗea. Mʉ̃ra warisia mʉ̃ puru djõbadaɗe jãʉ̃ djõbada 36 poaga basida. Jãʉ̃ djõbaɗeba zocãrã ẽberãrãba mʉ̃ puruɗe beusiɗaa.

Mʉ̃ra quĩmãrẽ poaga ɓasida idjaɓa mʉ̃ djaba 7 poa ɓasida, idjia jemene ɓasiɗe granadaɗeba, jãʉ̃ granada tojẽtasi, jãʉ̃ra mãwãpeɗa mʉ̃ra dauɓerrea ɓasida baribʉrʉ mʉ̃ djabarã beusida, jãʉ̃ra mãwãnacare dauɓerrea ɓea baramae warisia Ciudad Guatemalaɗe, jãma braille beɗeada cawasia. Mʉ̃a cawaca basida cãrẽ cãrẽã dewara warrara mʉ̃me poya beɗeaẽ́ basida. Ewariza mʉ̃djiduɓa ɓasi, mʉ̃djiduɓa beu quĩrĩã ɓasida, mʉ̃ nana jeɗeco umé ãbaa quĩrĩã basí idji deda idjia mʉ̃́a bio quĩrĩã ɓaɗa bẽrã. Baribʉrʉ mʉ̃a 10 poaga ɓasiɗe idjira beusida mʉ̃a bio sopua ɓasida, idjia aɓabe mʉ̃ra bio quĩrĩã ɓasida.

11 poaga ɓasiɗe mʉ̃ra jẽda zesida mʉ̃ puruɗea mʉ̃ djabamaa, idjia dji cuariarãme mʉ̃ra bio carebaɗamĩna mʉ̃ra bio so pua ɓasida, eɗauɗe mʉ̃ra idisida Ãcõrẽa “¿Cãrẽ cãrẽã mʉ̃ nanara beusida? ¿Cãrẽ cãrẽã mʉ̃ra dauɓerrea ɓesida?”. Ẽberãrãba jarasiɗada Ãcõrẽbʉrʉ mʉ̃ra jãwã ne cadjirua ɓʉsida, maʉ̃ bʉrʉ mʉ̃a quĩchasida, Ãcõrẽrã so cadjirua ɓasida. Mʉ̃djiduɓa beu quĩrĩã ɓasida.

Mʉ̃a dau unuca ɓaɗa bẽrã, ẽberãrãba mʉ̃́a cadjirua obadjiɗada, caibe ɓasiɗe ʉ̃rãtʉcuapeɗa ẽberãrãba mʉ̃́a ne cadjirua osiɗada ɓarima zocãrã, mʉ̃ra chupea ɓesida, ni aɓaʉba jãʉ̃ra jaraẽ́ basida, dewarame ɓa quĩrĩãẽ́ basida sopua ɓaɗa bẽrã.

ÃCÕRẼ BEƊEABA SÃWÃ CAREBASIDA MɄ̃RA:

13 poa ɓasida Beɗea ɓeara Jeowaɗebemarãba mʉ̃́a Ãcõrẽ Beɗea jaradiasiɗada ecuelaɗe, dji jaradiabariba jarada bẽrã mʉ̃ra bio sopua ɓasida, ãdjirãba mʉ̃ carea sopuasiɗada. Ãdjirãba mʉ̃́a jaradiasiɗada dauɓerrea ɓeara dau ununida wãya idjaɓa dadji beuɗara wãya zocai pananida (Isaías 35:⁠5; Juaʉ̃ 5:​28, 29). Ũrĩ quĩrĩã ɓasida dji beɗeada baribʉrʉ mʉ̃ra chupea basida, chupea ɓasimĩna ãdjirãba mʉ̃́a ibiya beɗeasiɗaa, tʉmʉ ɓasimĩna ãdjirãba eyaɗe wãsiɗada mʉ̃maa Ãcõrẽ Beɗea jaradiaɗi carea.

Mʉ̃ djababa jarasida ãdjirãba parata neẽ́ panʉmĩna ãdji jʉ̃nara bio mera quiru ɓasida mʉ̃ acʉɗe zesiɗaɗe. Ãdjirãba mʉ̃́a wãrãda quĩrĩãsiɗada nera diaɗa bẽrã, mʉ̃ra bio cawasia aɓabe bʉrʉ Ãcõrẽ wãrã ĩjã ɓeara jãʉ̃ ne bia oɗada.

Mʉ̃ braile beɗeaɗeba Ãcõrẽ Beɗea cawasida baribʉrʉ bio zarea ɓasida jãʉ̃ra ĩjãi carea. Ãcõrẽra mʉ̃ carea sopua ɓasida idjaɓa dewarara mʉ̃́a quĩrĩã ɓʉa Ãcõrẽ quĩrĩã ɓʉ quĩrãca. Mʉ̃a cawasia, cãrẽ cãrẽã nama naʉ̃ ẽjũãne ne cadjirua mãwã panʉda, baribʉrʉ waɗi ĩjãẽ́ basida Jeowaba zeze bia quĩrãca ɓasida.a

Pinca pinca Ãcõrẽ Beɗea cawapeɗa awara quĩcha cawasida, dadjirãba djuburia panʉne Ãcõrẽra bio sopua ɓʉda dadjirã carea idjia jara ɓʉda: “Wãrãda mʉ̃a unu ɓʉda mʉ̃ purura bio djuburia duanʉda, [...;] mʉ̃a bio cawa ɓʉa ãdjirãra mĩga djuburia panʉda” (Exodo 3:⁠7). Mʉ̃a cawasiɗe Jeowa idjia bio bia ɓʉda maʉ̃ bʉrʉ mʉ̃a idji beɗea o quĩrĩãsida. 1998ɗe mʉ̃ra borocuesida Beɗea ɓea Jeowaɗebema ɓai carea.

Poa aɓa baɗacare curso osida ẽberã dauɓerrea ɓea carea. Djaba wagabari congregacioʉ̃ne cawasida mʉ̃ carea bio zarea ɓasida ãbaa jʉrebadamae wãi carea tʉmʉ ɓaɗa bẽrã, idjia mʉ̃ carebasida, aɓa cuariaraɗeba ãbaa jʉre wãi carea, ãdji deda edasiɗada dji warra quĩrãca wagasiɗada.

Djabarãba mʉ̃́a wagaɗa bẽrã maʉ̃ne cawa ɓʉda Beɗea ɓeara Jeowaɗebemada wãrãda ĩjã panʉda Ãcõrẽ Beɗeada (Juaʉ̃ 13:​34, 35).

CÃRẼ NE BIA EROƁɄDA:

Mʉ̃ra bia senti ɓʉda ne bia jʉ̃ã ɓʉ bẽrã. Dauɓerrea ɓʉmĩna bio careba ɓʉda dewararã Ãcõrẽ Beɗea cawaɗamãrẽã, mʉ̃ra djaba wagabari ɓʉda idjaɓa bio jaradia ɓʉda congregacioʉ̃ne idjaɓa reunioʉ̃ dromane.

Poa 2010ɗe mʉ̃ra wãsia Ecuela djabarã carebabada carea (naʉ̃ ewariɗera dji trʉ̃da Ecuela minga jaradiaɗi carea Ãcõrẽ Boroda). Jãʉ̃ ecuelaɗeba mʉ̃a bio cawasida carebai carea djabarãa, idjaɓa bia ɓʉaɗa dia ɓʉda Jeowara idjia mʉ̃́a bio quĩrĩã ɓʉ bẽrã , Jeowara bio bia ɓʉda idjia quĩrĩã ɓʉra obi ɓʉda dadjirãneba.

Jesuba jarasia “Djãrãa ne dia ɓʉra Ãcõrẽ quĩrãpita biara ɓʉa djãrãneba ne eda ɓʉ cãyãbara” (Hecho 20:35). Mʉ̃ra wãrãda capipia ɓʉda dewara bio careba ɓʉ bẽrã.