Jeowaba Josapa ẽdrʉbisia dji quĩrũrãme

Josapa dji boro Judaɗebema basida. Josapaba Baalɗebemada jũma quenasida idjaɓa ãcõrẽ sewaidaɗebemada jũma quenasida. Idjia quĩrĩã basida Jeowa Leyɗebemada cawaɗida ẽberãrãba. Josapaba diabuesida levitarãda idjaɓa principeda, jũmarã bara cawaɗamãrẽã Ãcõrẽ Leyɗebemada.

Puru caita ɓearãba waya panasiɗada Judame djõne wãnida. Ãdjirãba cawapanasiɗada jãʉ̃ purura Jeowaba carebaida. Regalo edesida Josapaba djõnarãmãrẽã. Baribʉrʉ Amoʉ̃, Moab, Seír puruɗebemame ãbaa panasiɗada Juda puruɗebemame djõne wãni carea. Josapaba cawa ɓasida Jeowaba carebaida ãdjirãra. Josapaba jʉrʉ eda ɓesida Jerusaleʉ̃ne ãbaa jʉreɗamãrẽã umaquĩrãrã siɗa, wẽrãrã siɗa, warra zaquerã siɗa. Josapaba ãdjirãa quĩrãpita, ʉ̃taa dji idisida Jeowaa: “Ay Jeowa. Bʉa daira carebadua. Daira djõne wã ɓʉda”.

Jeowaba jarasida: “Perarãnadua. Mʉ̃a bãrãra carebaya. Necai pananadua. Wayarãnadua. Mʉ̃a carebaya bãrãra djõne wãbʉrʉɗe”. ¿Jeowaba sãwã carebai basida ãdjirãra?

Josapaba ya nũrema jʉrʉ edasida ẽberã trʉ̃ãbadada ejercito mãwãnamãrẽã. Maʉ̃ne ãdjirã Jerusaleʉ̃neba Tecoa puruɗaa wãsiɗada jãma djõni carea.

Ẽberã trʉ̃ãbadada ʉɓʉa trʉ̃ã panasiɗada Jeowa carea. Jeowara djõsida ãdjirã carea. Jeowaba osida amoʉ̃nitarã idjaɓa moabitarã, ãdjirãya djõnamãrẽã. Jũma ãdjirãba beusiɗada. Baribʉrʉ Jeowaba bio wagasida idji purura idjaɓa sacerdotera siɗa. Jũma puru caita ɓearãba cawasiɗada Jeowaba bio careba ɓʉda idji purura. Ãdjia cawasiɗada Jeowaba wãrã arada careba ɓʉda idji purura. ¿Cãrẽneba Jeowaba carebabarida idji purura? Ne zocãrãneba carebabarida. Idjia nesta ɓʉẽ́da ẽberãba carebaɗira.