BEƊEA 37
Ãcõrẽ Beɗeaba jara ɓʉra trajuɗebemada idjaɓa parataɗebemada
¿Ewari aɓaʉɗe bʉra sopuabarida traju neẽ́ ɓʉ bẽrã idjaɓa parata neẽ́ ɓaɗa bẽrã? Eɗauɗera zarea ɓʉda trajaira dadjia quĩrĩã ɓʉ eroɓai careara idjaɓa oida Jeowaba quĩrĩã ɓʉra dji idiɗi carea idjía. Ãcõrẽ Beɗeaba ʉ̃rãga biada dia ɓʉda jãʉ̃gʉ oɗi carea.
1. ¿Ãcõrẽ Beɗeaba cãrẽda jara ɓʉ trajuɗebemada?
Ãcõrẽba quĩrĩã ɓʉda dadjirã traja panʉne ɓʉsriɗa pananida. Maʉ̃ bʉrʉ Ãcõrẽ Beɗeaba jara ɓʉda “ẽberã carea ni aɓaʉda bio biara ɓʉda ne coɗida, doɗida idjaɓa trajaɗida dewara cãyãbara” (Eclesiastés 2:24). Jeowara bio zarea trajabarida. Idji quĩrãca dadjirãba bio traja panʉne oɗida idjia quĩrĩã ɓʉra idjaɓa dadjirãra ɓʉsriɗa senti panʉda.
Biara ɓʉda trajaira, baribʉrʉ jãʉ̃gʉ cãyãbara dadjirãmaarã bio biara ɓʉda bia beɗeaɗida idjaɓa dji idiɗida Jeowaa (Juaʉ̃ 6:27). Naãrã ɓʉɗibʉrʉ Ãcõrẽda idjia diaida dadjia quĩrĩãra jũma.
2. ¿Cãrẽda jara ɓʉda Ãcõrẽ Beɗea parataɗebema?
Ãcõrẽ Beɗeaba jara ɓʉmĩna “parataba poya carebaida”, idjaɓa jara ɓʉda paratabara capipia ɓaẽ́da (Eclesiastés 7:12). Maʉ̃ bẽrã Ãcõrẽ Beɗeaba jara ɓʉda parata awua ɓaẽ́da, idjaɓa naʉ̃gʉ beɗea biada jara ɓʉ: “Bãdjia eroɓeaba ɓʉsriɗa ɓeaɗadua” (Leadua Hebreo 13:5). Dadjirãra ɓʉsriɗa panʉbʉrʉ dadjirã eropanʉ bẽrã, sopua sentiɗaẽ́da idjaɓa paratara awua ɓeaɗaẽ́da. Idjaɓa debebara pananaẽ́da parataɗe (Proverbios 22:7). Jemenenaẽ́da parata jʉrʉɗi carea, jãʉ̃gʉra minijĩchia ɓʉ bẽrã idjaɓa crĩchaɗaẽ́da zocãrã paratara aɓeɗa eroɓeaɗida.
3. ¿Parataɗeba cãrẽda poya oɗida aɗuba diai carea dadji soɗeba?
Jeowaba ne aɗuba dia ɓʉda, idji quĩrãca poya oɗida Ãcõrẽ Beɗeaba jara ɓʉ quĩrãca, dadjia “eropanʉnebemada sobiaɗeba dewararãa diaɗi carea” (1 Timoteo 6:18). Parataɗeba poya carebaɗida congregacioʉ̃ gastabarida idjaɓa poya carebaɗida dadji djabarãra necesita ɓeara. Jeowaba unuẽ́da jũmasã parata dadjirãba dia panʉda, maʉ̃ cãyãbara idjia unu ɓʉda dadjirãba cãrẽ cãrẽã dia panʉda. Ne aɗuba dia panʉbʉrʉ dadji soɗeba, bio ɓʉsriɗa pananida idjaɓa capipiabibarida Jeowara (Leadua Hecho 20:35).
BIO CAWAƊIDA NAɄ̃ BEƊEAƊE
Acʉɗida cãrẽã biara ɓʉda trajaɗida ne jũma necesita panʉra eroɓeaɗi carea idjaɓa ɓʉsriɗa panʉda jãʉ̃ eropanʉba.
4. Bʉ trajuɗeba wayabidua Jeowara
Dji biarã pananibʉrʉ Jeowame, jãʉ̃gʉba careba ɓʉda bia trajaɗi carea. Acʉɗapeɗa dji VIDEODA, beɗeaɗadua:
¿Cãrẽda mãsa quĩrĩã ɓʉda Jasonba oɗara idji trajuɗe?
¿Idjia cãrẽda osida bia oi carea idji trajuɗe idjaɓa Ãcõrẽ itea?
Leaɗapeɗa Colosa 3:23, 24, beɗeaɗadua:
¿Cãrẽ cãrẽã bio biara ɓʉda “zoqueaɗeba” oɗida?
Dji trajura bio biara ɓʉda, baribʉrʉ idubuɗaẽ́da biara ɓaida Jeowa cãyãbara
5. Cãrẽã biara ɓʉda maʉ̃ eroɓʉba ɓʉsriɗa ɓaira
Zocãrã ẽberãrãba waga quĩrĩã panʉda parata, baribʉrʉ Ãcõrẽ Beɗeaba jara ɓʉda ne awara oɗida panʉa. Leaɗapeɗa 1 Timoteo 6:6-8, beɗeaɗadua:
¿Cãrẽ ʉ̃rãga biada Ãcõrẽ Beɗeaba jara ɓʉda?
Dadjirãra ɓʉsriɗa poya pananida parata maãrĩ eropanʉmĩna. Acʉɗapeɗa dji VIDEODA, beɗeaɗadua.
¿Cãrẽ cãrẽã jãʉ̃ cuariarã ɓʉsriɗa panʉda parata zocãrã neẽ́ panʉmĩna?
Parata eropanʉbʉrʉ baribʉrʉ parata quĩrĩã panʉda mãsa, ¿cãrẽda oɗidabara panʉ? Jesuba jaradiasida ejemploɗeba quĩrãcuita ɓeaɗida panʉa. Leaɗapeɗa Luca 12:15-21, beɗeaɗadua:
¿Bʉa cãrẽda cawasida Jesuba jaradiaɗara? (Acʉɗadua dji caibea 15).
Leaɗadua Proverbios 10:22 idjaɓa 1 Timoteo 6:10. Mãwãnacarea beɗeaɗadua:
Bʉmaarã cãrẽda biara ɓʉda, ¿dji biarã ɓaida Jeowame wa zocãrã parata eroɓaida? ¿Cãrẽã?
¿Cãrẽ ne cadjirua poya mãwãida zocãrã parata eroɓa quĩrĩã ɓʉbʉrʉ?
6. Jeowaba diaya jũma necesita panʉra
Ne cadjirua mãwã panʉne dadji traju carea idjaɓa parata neẽ́ panʉbʉrʉ, jãʉ̃gʉba poya carebaida bia ĩjãni carea Jeowaɗera. Acʉɗadua dji VIDEODA cawaɗi carea cãrẽda poya oida ne cadjirua mãwã ɓʉɗe. Mãwãnacarea beɗeaɗadua:
¿Cãrẽ ne cadjirua mãwãsida dadji djaba jãʉ̃ videoɗe ununa quĩrãca?
¿Idjia cãrẽda oibara ɓasida bia ɓai carea?
Leaɗapeɗa Mateo 6:25-34, beɗeaɗadua:
¿Jeowaba cãrẽda diaida ẽberãrãba idjida naãrã ɓʉɗibʉrʉ?
ẼBERÃRÃBA JARA PANɄRA: “Bio zarea trajaida ne jũma diai carea mʉ̃ cuariara. Maʉ̃ bʉrʉ domiaza ãbaa poya jʉreẽ́da”.
¿Cãrẽ texto Ãcõrẽ Beɗeaɗebemada poya carebaida bʉra cawai carea naãrã ɓʉibʉrʉ Jeowada bio biara ɓʉda dewara cãyãbara?
JŨMA BEƊEAƊA
Trajura idjaɓa paratara bio bia ɓʉda, baribʉrʉ quĩrãcuita ɓadua jãʉ̃gʉba igarabiẽ́da Jeowara.
Cawaɗara
¿Cãrẽba poya carebaida trajai carea eroɓeaɗamãrẽã jũma necesita panʉra idjaɓa ĩjãni carea Jeowaa?
¿Cãrẽ cãrẽã bio biara ɓʉda jãʉ̃ eropanʉ ɓʉsriɗa ɓai carea?
Jeowaba jara ɓʉbʉrʉ idjia poya diaida Ãcõrẽ ĩjã ɓeara jũma necesita panʉra, ¿bʉa sãwã unubi ɓʉda wãrãda ĩjã ɓʉda Jeowaɗera?
CAWADUA MÃSA
Cawadua Ãcõrẽ Beɗeaba jara ɓʉbʉrʉ paratara cadjirua ɓʉda.
“¿Parataɗeba jũma ne cadjiruara mãwã nũmʉda?” (Acʉdua internene)
Acʉdua ne dia panʉbʉrʉ Jeowara ɓʉsriɗa ɓaida.
“¿Ãcõrẽ Beɗeaba cãrẽda jara quĩrĩãmʉda ʉ̃rʉ̃ maʉ̃ diaira?” (Acʉdua internene)
Jemeneida parata eroɓeaɗi carea, ¿bia ɓʉda wa biaẽ́ ɓʉda?
“Bibliaba jara ɓʉra: Jemenenida parata eroɓeaɗi carea” (¡Despertad!, 2015, Marzo)
Leadua cãrẽba carebasida ẽberã aɓaʉda jemene ɓabadjimĩna parata eroɓai carea idjaɓa ne drʉabarimĩna ne awara oi carea.
“Mʉ̃a bio quĩrĩã ɓabadjida cawayo piraira” (Cartaba Jara ɓʉda, 2011, Noviembre 1)