7. Dji ley Ãcõrẽ Boroɗebemada biara ɓʉda ẽberãrã ley cãyãbara

Naʉ̃ ẽjũãnebema bororã leyrãba obadada dadjirãra wagaɗi carea idjaɓa carebaɗi carea ẽberãrãra. Ara maʉ̃gʉ quĩrãca Ãcõrẽ Boro leyra eroɓʉda dji ẽberãrãba oɗamãrẽã. Leaɗapeɗa 1 Corinto 6:9-11, beɗeaɗadua:

• Bʉmaarã, ¿sãwã pananida ẽberãrãba ĩjãbʉdaɗe Ãcõrẽ leyra?a

• Jeowaba quĩrĩã ɓʉda ẽberãrã Ãcõrẽ Boroɗebemarãba ĩjãnida jãʉ̃ leyra. Bʉmaarã, ¿bia ɓʉca? ¿Cãrẽ cãrẽã mãwã panu ɓʉda?

• ¿Cãrẽ cãrẽã cawa panʉda ẽberãrãba ĩjãnaca ɓeara jãʉ̃ leyba awara poya oɗida? (Acʉɗadua dji caibea 11)

Zocãrã ẽberãra pera sentibadada jãʉ̃ beɗeada umaquĩrã wẽrã o panʉne. Baribʉrʉ Ãcõrẽ Beɗeaba jipa jarabarida umaquĩrãba wẽrã obadara. Naʉ̃ beɗeaɗe jara ɓʉra bio bia ɓʉda cawai carea. Bibliaba jara ɓʉda Jeowaɗebema bẽrã idjaɓa Jeowaba dadjirã oɗa bẽrã, idjia maʉ̃gʉbʉrʉ dadjia poya jaraida ɓʉda sãʉ̃gʉda dadjirã cãrẽã biara ɓʉda idjaɓa sãʉ̃gʉda biẽ́ ɓʉda. Ãcõrẽba jara ɓʉda sãwãbʉrʉ dadjirãba poya bio sobia sentibiɗida idjía dadjia o ɓʉɗara. Idjaɓa jara ɓʉda Jeowaba dadjirãra iduaribida bia dãrã pananamãrẽã.

1. ¿Jeowaba sãwã acʉ ɓʉda umaquĩrã wẽrãme cãĩmʉra?

Jeowaba diasida jãʉ̃ra ãdji umaquĩrã wẽrãme cãĩnamãrẽã. Jeowaba quĩrĩã ɓʉda aɓabe bʉrʉ umaquĩrã quima edaɗame ãdjia bio biya panana quĩrĩã panʉda. Jeowaba iduaribi ɓʉda umaquĩrã mĩã cãĩna dji quimame warra eropanani carea idjaɓa dji quima bẽrã bio quĩrĩã panʉda ara ãdjiduɓa. Maʉ̃ carea Ãcõrẽ Beɗeaba jara ɓʉ: “Bio ɓʉsriɗa ɓaida bʉ quimame” (Proverbios 5:18, 19). Jeowaba quĩrĩã ɓʉda critianorã quima edaɗara jipa panani quĩrĩã panʉda. Maʉ̃ bʉrʉ critiano quima edaɗara idjira dewara wẽrãme cãĩẽ́da (Leadua Hebreo 13:4).

2. ¿Cãrẽda maʉ̃ cacua cadjirua obarira?

Bibliaba jaradia ɓʉda “naʉ̃ cacuaba cadjirua obarira ebuɗa ɓʉa [...] Ãcõrẽ puruɗe ɓeaɗaẽ́a” (1 Corinto 6:9, 10). Naʉ̃ beɗea Griegoɗe ɓʉsiɗada ẽberãrãba naʉ̃ Bibliaɗeba jarasiɗada ne cadjiruara oɗa cacuaba jarabadada idjia aɓari pornéia. Jãʉ̃gʉba ne zocãrã jara quĩrĩã ɓʉ 1) ʉ̃cʉrʉ ẽberãrãba ne obadadaa waɗi ãdji quima edaɗaẽ́ panʉ naẽna, 2) umaquĩrã aɓari umaquĩrãme cãĩ ɓeabarida, wa wẽrã siɗa aɓari wẽrãme cãĩ panʉda 3) ẽberãrãba idjia aɓari obadada animarãme. Ne cacua cadjirua oɗaẽ́ panʉra, dadjirãba bio sobiabibabada Jeowara, idjia aɓari Jeowaba dadjía bio bia ne biada diabari (1 Tesalonica 4:3).

BIO CAWAƊIDA NAɄ̃ BEƊEAƊE

3. Dadji cacua cadjirua waiɓʉara orãnadua

Acõrẽ Beɗeaɗe jarabadada Jose idjia zarea ɓasi idji cacua jipa eroɓai carea. Leaɗapeɗa Genesi 39:1-12, beɗeaɗadua:

• ¿Cãrẽã Josera idjira ãyã wãsidar? (Acʉɗadua dji caibea 9).

• ¿Bʉa quĩcha ɓʉca Joseba jipa osida? ¿Cãrẽ sãwãya?

VIDEO: Ne cadjirua waiɓʉada orãdua (5:06)

Jeowaba quĩrĩã ɓʉda jãʉ̃ cacua cadjiruara oɗaẽ́da. Leaɗapeɗa 1 Corinto 6:18, beɗeaɗadua:

• ¿Cãrẽneba aɓaʉba jãʉ̃ ne cacua cadjiruara oida ɓʉ?

• ¿Bʉa cãrẽda oida ɓʉ jãʉ̃ cacua cadjirua oẽ́ carea?

4. Bʉa oẽ́da jãʉ̃ ne cadjiruara

VIDEO: Biblia lea panʉbʉrʉ ne cadjirua oɗaẽ́da (3:02)

• Djababa videoɗe acʉpeɗa cawasida idji quĩchara idjia aɓari o ɓʉra jipaẽ́ basida idji quimame, ¿cãrẽda osida?

Critianorãba ãdji Jeowame jipa panʉmĩna ãdjia poya zarea panʉda quĩcha jipa eropanani carea. ¿Cãrẽda poya bʉa oida ɓʉda quĩcha cadjirua quĩrãdoai carea? Leaɗapeɗa Pilipo 4:8, beɗeaɗadua:

• ¿Cãrẽdrʉ quĩchaɗidabara panʉ?

• Bʉmaarã, ¿lea panʉbʉrʉ Bibliada idjaɓa Jeowaɗebemada o panʉbʉrʉ jãʉ̃ba poya carebaida ne cadjirua oɗaẽ́ carea? ¿Cãrẽã?

5. Jeowa beɗeaba dadjirãra poya careba ɓʉda

VIDEO: Quĩcha jipa neẽ́ ɓʉra biẽ́ wãbaria (9:31)

• ¿Cãrẽda osida jãʉ̃ cũdrara idji biẽ́ wãi carea? (Acʉɗadua Proverbios 7:8, 9).

• Proverbios 7:23, 26 siɗa jara ɓʉ quĩrãca, jãʉ̃ ne cacua cadjiruara obadara ãdjirã biẽ́ wãbadada. ¿Sãwã pananida ne cadjirua oɗaẽ́bʉrʉ?

• ¿Dadji cacua jipa eropanʉbʉrʉ sãwã careba ɓʉda dãrã panani carea?

Ʉ̃cʉrʉrãba quĩchabadada Bibliaba jara ɓʉra umaquĩrã aɓari umaquĩrãme cãĩ quĩrĩã ɓʉra biẽ́ ɓʉda. Baribʉrʉ Jeowaba bio quĩrĩã ɓʉda ẽberãrãa, maʉ̃gʉbʉrʉ idjia quĩrĩã ɓʉda jũma poya dãrã panani naʉ̃ ẽjũãne. Naʉ̃ ẽjũãne dãrã panani carea dadjirãba ĩjãnida panʉ idji beɗea jara ɓʉra. Leaɗapeɗa 1 Corinto 6:9-11, beɗeaɗadua:

• Ãcõrẽba acʉ ɓʉ quĩrãca, ¿umaquĩrã aɓari umaquĩrãme cãĩ quĩrĩã ɓʉda aɓabe bʉrʉ jãʉ̃ra biẽ́ ɓʉda?

Ãcõrẽra ɓʉsriɗa ɓei carea, dadjirãba ne biada oɗida panʉda. Ne cadjirua o panʉ ameibʉrʉ, ¿bia pananica? Leaɗapeɗa Salmo 19:8, 11, beɗeaɗadua:

• Bʉmaarã, ¿Jeowaɗeda ĩjãibʉrʉ jãʉ̃ra bio biara ɓʉda? ¿Cãrẽ sãwãya jãwã quĩcha ɓʉda?

JŨMA BEƊEAƊA

Jeowaba quĩrĩã ɓʉda quima edaɗara ãdjia aɓabe bʉrʉ poya cãĩnida. Jãʉ̃ra Jeowaba ne bari diaɗa quĩrãca ɓʉda.

Cawaɗara

• ¿Cãrẽ ne cadjiruada obarida cacuaɗe?

• ¿Cãrẽba poya carebaida dadjirãa ne cacua cadjiruada oɗaẽ́ carea?

• ¿Sãwã pananida Jeowa beɗeada jũma ĩjãnibʉrʉ?

CAWADUA MÃSA

Cawadua cãrẽã Ãcõrẽba quĩrĩã ɓʉda umaquĩrã wẽrãme mĩã cãĩra idjia bia unumãrẽã.

“¿Ãcõrẽ Beɗeaba cãrẽda jara ɓʉ ẽberã mĩã cãĩnaẽ́ panʉnebemada?” (Acʉdua internene)

Cawadua cãrẽã Bibliaba jara ɓʉda jãʉ̃ umaquĩrã aɓari umaquĩrãme cãĩ quĩrĩã ɓʉda dadjirãba poya quĩrãmanaẽ́da idjaɓa biẽ́ quĩchaɗaẽ́da.

“¿Umaquĩrãda wẽrã quĩrãca ɓa quĩrĩã ɓʉbʉrʉ jãʉ̃ra biẽ́ ɓʉda?” (Acʉdua internene)

Cawadua jãʉ̃ careba ɓʉda Ãcõrẽ Beɗeaba umaquĩrã wẽrãme ãbaa cãĩnira.

“¿Bia ɓʉca umaquĩrã obada iteɗeba jãʉ̃ra jipa ɓʉda?” (Acʉdua internene)

Cãrẽba carebasida jãʉ̃ umaquĩrã wẽrã quĩrãca o ɓasiɗe idjaɓa cãrẽda osida Ãcõrẽme jipa ɓai carea. Leadua nẽbʉrʉɗada “Mʉ̃́a bio bia tratasiɗada”.

“Bibliara cawaɗapeɗa awara panesiɗaa” (Cartaba Jara ɓʉda, 2011, Abril 1)

Naʉ̃ ẽjũãne ẽberãrãba awara awara quĩchabadada chichaɗebema. Ʉ̃cʉrʉba eɗauɗe dobadada dji biarãme. Dewararãba itua doɗacada, idjaɓa dewarara itua asea dobadada ãdji beu nũpeneni carea. ¿Ãcõrẽ Beɗeaba cãrẽda jara ɓʉda chicha aseaɗebemada?

1. ¿Ne asea doida biẽ́ ɓʉda?

Ãcõrẽ Beɗeaba jaraẽ́ ɓʉda itua doira cadjirua ɓʉda. Maʉ̃ cãyãbara Ãcõrẽ Beɗeaba jara ɓʉda “uva ɓa aseaba capipiabi ɓʉa ẽberã sora” (Salmo 104:14, 15). Jeowabʉrʉ diasida itua aseara baribʉrʉ jãʉ̃ra Jeowa ne bari diaɗaɗebemada. Idjaɓa Ãcõrẽ Beɗeaba jara ɓʉda ʉ̃cʉrʉ umaquĩrãrã wẽrãrã siɗa ĩjã ɓaɗamĩna Ãcõrẽa ne asea dosiɗada (1 Timoteo 5:23).

2. ¿Ãcõrẽ Beɗeaba cãrẽda jarasida ẽberãrãa ne asea do quĩrĩã panʉbʉrʉ?

Jeowaba biẽ́ unu ɓʉda beu nĩbabadarãa idjaɓa ẽberã zocãrã dobadara (Galata 5:21). Maʉ̃ carea Ãcõrẽ Beɗeaba jara ɓʉ: “Poya ɓaẽ́da chicha waiɓʉa dobadame” (Proverbios 23:20). Bʉa chicha asea waiɓʉa dobadame ɓaibʉrʉ, bʉra bia quĩcha ɓaẽ́da idjaɓa bʉa ne bia oi ɓaɗara õẽ́da. Idjaɓa cawaẽ́da cãrẽda bʉ́a jara panʉda, maʉ̃ carea biaẽ́ ɓʉda chichara waiɓʉa do ɓaira. Dadjirãba chicha waiɓʉa do pananibʉrʉ poya dadji cacua caya ɓaida. Maʉ̃ bʉrʉ, bʉra maãrĩ doẽ́bʉrʉ biara ɓʉda bʉa ni maãrĩ biɗa doẽ́da.

3. ¿Sãwã acʉbi panʉda bio waya panʉda dewararãba quĩcha panʉra?

Aɓa aɓa jaraida ɓʉa ne aseara doibʉrʉ wa doẽ́bʉrʉ. Aɓaʉba chicha aseada maãrĩ do quĩrĩã ɓʉbʉrʉ, maʉ̃ carea dadjia poya biẽ́ quĩchaɗaẽ́da idjaɓa poya jaraɗaẽ́da aɓaʉda doida ɓʉa idjia quĩrĩãẽ́ ɓʉbʉrʉ (Romano 14:10). Maʉ̃ cãyãbara dadjirãmaarã ne aseara maãrĩ doɗi carea biara ɓʉmĩna, doɗaẽ́da dewaraʉba biẽ́ senti ɓʉbʉrʉ (Leadua Romano 14:21). Dadjirãba ĩjã panʉda Ãcõrẽ Beɗeaba jarabʉrʉɗe “ni aɓaʉba ara idji bia ɓaira jʉrʉ ɓaiẽ́ ɓʉa, ãtebʉrʉ dewararãda bia ɓeaɗamãrẽã jʉrʉ ɓaida ɓʉa” (Leadua 1 Corinto 10:23, 24).

BIO CAWAƊIDA NAɄ̃ BEƊEAƊE

4. Quĩchadua ne asea do quĩrĩã ɓʉbʉrʉ wa do quĩrĩãẽ́ ɓʉbʉrʉ

¿Jesuba cãrẽda quĩcha ɓasida ne asearaɗebema? Cawai carea idjia quĩcha ɓaɗara quĩrãcuita acʉɗida ne ununacaa nabema idjia oɗara. Leaɗapeɗa Juaʉ̃ 2:1-11, beɗeaɗadua:

• Naʉ̃gʉ beɗeada, ¿cãrẽda poya cawaɗida dadjirãra Jesuba quĩcha ɓaɗara ne asea dobadaɗebemada?

• Jesuba jaraẽ́ basida itua doida biẽ́ ɓʉda, maʉ̃ bẽrã critiano ĩjã ɓearãba, ¿cãrẽda quĩchaɗida panʉ unubʉdaɗe dewaraʉba ne aseara doibʉrʉ?

Aɓaʉ critiano quĩcha ɓʉmĩna ne aseara doida bia ɓʉda, jãʉ̃ra jaraẽ́da ewariza jãʉ̃ra do ɓaida. Leaɗapeɗa Proverbios 22:3, beɗeaɗadua sãʉ̃be ne aseara poya doida wa poya doẽ́da:

• Bʉa carroda wa máquinada manejaibʉrʉ.

• Bʉra dji wẽrã biogoa ɓʉbʉrʉ.

• Dji nẽãrã diabadarãba bʉ́a jaraibʉrʉ chicha asea doiẽ́ ɓʉda.

• Bʉmaarã zarea ɓʉbʉrʉ maãrĩ doida.

• Leyrãba bʉ́a jaraibʉrʉ chicha asea doẽ́da.

• Bʉa aɓaʉme ãbaa ɓʉbʉrʉ baribʉrʉ jãʉ̃ ẽberã bio waiɓʉa chicha do ɓasida.

Bʉa piesta obʉrʉɗe wa bʉ dji biarãme ɓʉbʉrʉ capipiabimãrẽã, ¿ne aseara diaibara ɓʉda? Cawaɗi carea bʉa cãrẽda poya oida, acʉɗadua dji VIDEODA.

VIDEO: ¿Diaibara ɓʉda ne aseara? (2:41)

Leaɗadua Romano 13:13 idjaɓa 1 Corinto 10:31, 32. Leaɗacare aɓa aɓa texto beɗeaɗadua:

• ¿Naʉ̃ beɗeaba bʉra sãwã poya carebaida ne bia oi carea capipia ɓamãrẽã Jeowaa?

5. Quĩchaida jũmasã doida

Bʉa ne asea do quĩrĩã ɓʉbʉrʉ, quĩrãnebadua, Jeowamaarã biẽ́ ɓʉmĩna chicha asea doida idjia jara ɓʉda zocãrã ne aseara doɗacada. ¿Cãrẽã? Leaɗapeɗa Oseas 4:11, 18, beɗeaɗadua:

• ¿Cãrẽda poya mãwãida ẽberãba chicha asea zocãrã doibʉrʉ?

¿Cãrẽba poya carebaida dadjirãra zocãrã chicha aseara dorãnamãrẽã? Dadjirãba cawaɗida panʉa jũmasãwã poya doɗida. Leaɗapeɗa Proverbios 11:2, beɗeaɗadua:

• ¿Cãrẽ cãrẽã bio biara bʉda doi naẽna quĩchaida jũmasãwã doida?

6. Bʉa poya idu ɓʉida chicha asea waiɓʉa dobarira

VIDEO: “Mʉ̃a bio quĩrãma ɓasida mʉ̃a obadjira” (6:32)

• ¿Dimitriba ne aseara waiɓʉa dobadjiɗe cãrẽda obadjida?

• ¿Idjia isabe idu ɓʉsida chicha asea waiɓʉa doira?

• ¿Idjia cãrẽda osida chicha asea waiɓʉa do amaaba?

Leaɗapeɗa 1 Corinto 6:10, 11, beɗeaɗadua:

• ¿Cadjirua ɓʉda beu nũ ɓaera? ¿Cãrẽ cãrẽã?

• ¿Sãwã cawa panʉda ẽberãmaarã zarea ɓʉmĩna chicha asea waiɓʉa doi igaraida wãrãda poya awara ɓeida?

Leaɗapeɗa Mateo 5:30, beɗeaɗadua:

• Jesuba jara ɓasiɗe bʉ jʉwara ɓʉá tutapeɗa ɓatabuedua, jara quĩrĩã ɓasida esfuerzo oɗida panʉa Ãcõrẽba bia unumãrẽã dadjirãba o panʉra. ¿Bʉa chicha asea waiɓʉa dobarira idu ɓʉ quĩrĩã ɓʉbʉrʉ cãrẽda poya oida?a

Leaɗapeɗa 1 Corinto 15:33, beɗeaɗadua:

• ¿Cãrẽã biaẽ́ ɓʉda nĩbaida chicha waiɓʉa asea dobadame?

JŨMA BEƊEAƊA

Jeowaba diasida ne aseara capipia pananamãrẽã. Idjia quĩrĩãcada ẽberãra beu nũ pananira idjaɓa quĩrĩãcada waiɓʉa do pananira chicha.

Cawaɗara

• ¿Ãcõrẽ Beɗeaba cãrẽda jara ɓʉda chicha aseaɗebemada?

• ¿Cãrẽ cãrẽã biaẽ́ ɓʉda chicha asea waiɓʉa doida?

• ¿Sãwã acʉbi panʉda bio waya panʉda dewararã quĩcha panʉra chichaɗebemada?

CAWADUA MÃSA

Cũdrarãba, ¿cãrẽda quĩchaɗida panʉa ne aseara doɗi naẽna?

Bio itua dorãdua bia wãmãrẽã (2:31)

Acʉdua cãrẽda poya oida igarai carea chicha asea waiɓʉa doi.

“Jũmasãwã chicha aseara doida” (Cartaba Jara ɓʉda, 2010, Enero 1)

¿Jãʉ̃ piestaɗe pananibʉrʉ critianorãba jãʉ̃ vasuaba poya chocaɗida?

“Leabadarãba idi panʉra” (Cartaba Jara ɓʉda, 2007, Febrero 15)

Leadua aɓa umaquĩrãba cãrẽda osida ne aseara igarai carea, idji nẽbʉrʉɗada trʉ̃ jarabada “Mʉ̃a zocãrã chicha dobadjida”.

“Bibliara cawaɗapeɗa awara panesiɗaa” (Cartaba Jara ɓʉda, 2012, Mayo 1)

Bʉa bio quĩrĩã ɓʉmĩna Jeowara idjaɓa ĩjã quĩrĩã ɓʉ idjira, eɗauɗe ne cadjirua poya oida. Zocãrã cadjiruara ɓʉda, aɓa ɓʉmĩna jãʉ̃ cãyãbara biara cadjiruara ɓʉda (1 Corinto 6:9, 10). Quĩrãnebadua, bʉa cadjirua oɗamĩna Jeowaba waɗi quĩrĩã ɓʉda; idjia careba quĩrĩã ɓʉda idjaɓa poya quĩrãdoaida bʉ ne cadjirua oɗaba.

1. ¿Cãrẽda oɗida panʉ Jeowaba quĩrãdoamãrẽã dadji ne cadjirua?

Ẽberãba quĩrĩã ɓʉbʉrʉ Jeowara, ne cadjirua oibʉrʉ bio sopuabarida. Maʉ̃ba idjia careba quĩrĩã ɓʉda, maʉ̃ carea Jeowaba idji purua jarasia: “Bãrã ne cadjiruara purea ɓʉmĩna, torroa ɓaida nieve quĩrãca” (Isaías 1:18). Ẽberãba bio sopua ɓʉbʉrʉ idji ne cadjirua oɗa carea, Jeowaba poya quĩrãdoaida jãʉ̃ ne cadjirua. ¿Cãrẽda jara quĩrĩã ɓʉda ne cadjirua oɗa carea sopua ɓaida? Jãʉ̃ra jãwã jara quĩrĩã ɓʉda bio sopua ɓʉda ne cadjirua oɗa carea, waa oẽ́da ne cadjirua oɗara idjaɓa ʉ̃taa dji idida Jeowa quĩrãdoamãrẽã jãʉ̃ ne cadjirua. Maʉ̃ bʉrʉ esfuerzo oɗida panʉa dadji crĩcha awara oi carea idjaɓa ne cadjiruara igarai carea, maʉ̃ cãyãbara ĩjã oɗida Jeowaba jara ɓʉra (Leadua Isaías 55:6, 7).

2. ¿Dadjirãba ne cadjirua o panʉbʉrʉ Jeowaba sãwã careba ɓʉda djabarã wagabadarãneba?

Aɓaʉba ne cadjirua oibʉrʉ, Jeowaba jara ɓʉda cãrẽda oida ɓʉ, idjia jara ɓʉda “djabarã wagabadarãda trʉ̃ida ɓʉa” (Leadua Santiago 5:14, 15). Jeowaba ɓʉsida djabarã wagabadarãra Ãcõrẽ jaureɗeba. Maʉ̃ bẽrã ãdjirãba poya carebaɗida dadjirãba ne cadjirua oɗibʉrʉ wãya ara caita pananamãrẽã Jeowame (Galata 6:1).

¿Djabarã wagabadarãba sãwã poya carebaɗida dadjirãra ne cadjirua waiɓʉa oɗibʉrʉ? Umé wa ũbea ãdjirãnebemada carebaɗida dadjirãra Ãcõrẽ Beɗeaɗeba cawaɗamãrẽã cãrẽ cãrẽã dadjirãba oɗara bio biẽ́ ɓasida. Ãdjirãba sobiabibarida idjaɓa beɗea bia jaraɗida ẽberãba ne cadjiruara oɗa amaaba. Baribʉrʉ ẽberãba ne cadjirua oɗaba idjia sopua crĩchaẽ́bʉrʉ idjia oɗa carea, dadji djabarã wagabadarãba idjira jaraɗida ãbaa jʉreẽ́da congregacioʉ̃nebemame, wagaɗi carea dewara djabarãra.

BIO CAWAƊIDA NAɄ̃ BEƊEAƊE

3. Dadjirãba jara panʉbʉrʉ dai ne cadjirua oɗaba poya carebaida dadjirãa

Ne baridua cadjirua dadjirãba o panʉra sobiabiẽ́ ɓʉda Jeowara, maʉ̃ bʉrʉ dadjirãba ne cadjiruada osiɗabʉrʉ jaraɗida panʉa. Leaɗapeɗa Salmo 32:1-5, beɗeaɗadua:

• ¿Cãrẽ cãrẽã bio biara ɓʉda jaraɗida Jeowaa dadjirãba ne cadjirua o panʉra idjaɓa cãrẽã biaẽ́ ɓʉda ne cadjirua mẽrãida?

VIDEO: “Jeowaba quẽã ɓʉda ẽberãrã quĩrĩã ɓʉ bẽrã” (3:01)

• Naʉ̃ videoɗe ununa quĩrãca, ¿sãwã carebasiɗada djabarã wagabadarãba Canonba wãya zesiɗe Jeowamaa?

Dadjirãba beɗea panʉne djabarã wagabadarãme bio biara ɓʉda jũma wãrãda jaraɗida, ãdjirãba poya carebaɗi carea. Leaɗapeɗa Santiago 5:16, beɗeaɗadua:

• Bʉmaarã, ¿dadjirãba wãrãda jara panʉbʉrʉ djabarã wagabadarãa ãdjirãba poya carebaɗida? ¿Cãrẽã?

4. Jeowara quĩrã djuburiabaria ne cadjirua opeɗaɗarãa

Aɓaʉ djababa congregacioʉ̃nebemada ne cadjirua waiɓʉada oɗabʉrʉ idjaɓa Jeowa beɗea ĩjã quĩrĩãẽ́bʉrʉ poya ãbaa jʉreẽ́da congregacioʉ̃ne. Maʉ̃ bẽrã jãʉ̃ ẽberãme ãbaa poya ɓaẽ́da. Leaɗapeɗa 1 Corinto 5:6, 11 beɗeaɗadua:

• Jãma jara ɓʉ quĩrãca harina ẽsãbibari maãrĩ ɓʉba harinara jũma ẽsãbibarida, mãwãmĩna congregacioʉ̃nebema ẽberãba ne cadjirua oɗada, idjia sopua crĩchaẽ́bʉrʉ, ¿cãrẽã biara ɓʉda jãʉ̃ ẽberãme ãbaa jʉreẽ́da?

Ne cadjirua opeɗaɗara congregacioʉ̃ne ãbaa jʉre panʉẽ́mĩna, Jeowaba bio careba ɓʉda. ¿Jãʉ̃ba jara quĩrĩã ɓʉda Jeowara quĩrã djuburiabaria? ¿Cãrẽã bʉa jãʉ̃ jãwã jara ɓʉda?

5. Dadjirãba sopua pananibʉrʉ Jeowaba quĩrãdoaida dadji ne cadjiruara

Jesuba ne jara ɓʉɗeba jaradiasida sãmasa Jeowaba crĩcha ɓʉda ẽberã cadjirua oɗada sopua ɓʉɗe. Leaɗapeɗa Luca 15:1-7, beɗeaɗadua:

• Za ɓʉ nẽbʉrʉɗada, ¿cãrẽda cawabi ɓʉda Jeowaɗebemada?

Leaɗapeɗa Ezequiel 33:11, beɗeaɗadua:

• ¿Cãrẽda oɗida panʉ acʉbiɗi carea wãrã arada dadji soɗeba sopua panʉda ne cadjirua oɗa carea?

JŨMA BEƊEAƊA

Dadjirãba ne cadjirua waiɓʉa o panʉmĩna, sopua pananibʉrʉ idjaɓa waa oɗaẽ́bʉrʉ, Jeowaba quĩrãdoaida dadji ne cadjiruara.

Cawaɗara

• Dadjirãba ne cadjirua osiɗabʉrʉ, ¿cãrẽã jaraɗida panʉda Jeowaa?

• ¿Cãrẽda oɗida panʉ Jeowaba quĩrãdoamãrẽã dadji ne cadjirua?

• Ne cadjirua waiɓʉa osiɗabʉrʉ, ¿cãrẽ cãrẽã beɗeaɗida panʉ djabarã wagabadarãme?

CAWADUA MÃSA

Acʉdua umaquĩrãba cãrẽda osida Ãcõrẽba quĩrãdoamãrẽã dji ne cadjirua, Ãcõrẽ Beɗeaba jara ɓʉ quĩrãca Isaías 1:18​ɗe.

Quĩcharãdua Jeowaba poya quĩrãdoaẽ́da bʉ ne cadjirua (5:02)

¿Djabarã wagabadarãba sãwã careba panʉda ne cadjirua opeɗaɗarãa?

“Sãwã djabarãba quĩrĩã unubipanʉda ẽberãba ne cadjirua obumina” (Cartaba Jara ɓʉda, Agosto 2024ɗe)

Cawadua djabarãba quĩrĩãneba careba panʉda ne cadjirua obadarãa, idjaɓa quĩrã djuburia panʉda.

“Careba panʉda ne cadjirua opeɗaɗarãa, congregacioʉ̃ne ãbaa panʉẽ́mĩna (Acʉdua Cartaba jara ɓʉda, Agosto 2024ɗe)

Dji nẽbʉrʉɗada “Mʉ̃a quĩrĩã ɓasida wãya wãi carea Jeowamaa”, jãma poya cawaida umaquĩrãba sãwã senti ɓasida jẽda wãsiɗe congregacioʉ̃ra.

“Bibliara cawaɗapeɗa awara panesiɗaa” (Cartaba Jara ɓʉda, 2012, Abril 1)