2. ¿Naʉ̃ ẽjũãra sãwãbʉrʉ ɓʉda idjaɓa ẽberãrãba cãrẽda o panʉda poaga 1914 eɗa?

Jesu nĩbabadarãba iwiɗisiɗaa: “¿Cãrẽneba cawaɗi bʉra zeboɗoda? Idjaɓa ¿cãrẽneba cawaɗi naʉ̃ ewarira jõbʉrʉda?” (Mateo 24:3). Jesuba panusia cãrẽda mãwãi ɓasia idjia mandabʉrʉɗe Ãcõrẽ Boro bajãnebemada. Maʉ̃ne jaraɗida, idjia jarasida djõnida, jarrabada ɓai ɓasia, idjaɓa de uremiada ɓai ɓasia (Leadua Mateo 24:7). Idjaɓa Ãcõrẽ Beɗeaba jarasida “jĩrũarebema ewariɗe minijĩchiada zeya” maʉ̃ne jãʉ̃ ewarira zarea pananida (2 Timoteo 3:1-5). Poaga 1914 eɗa jũma beɗeara mãwã panʉda idjaɓa ebuɗa unu panʉda.

3. ¿Cãrẽã wetara cadjirua ɓasida Ãcõrẽ Boroba ʉ̃taare manda ɓʉɗe eɗa?

Jesu Boro ɓeɗacarea Ãcõrẽ Boroɗebemada, idjira Diaurume bajãne djõbucasiɗaa. Diauruba poyaẽ́ basida. Maʉ̃ba Ãcõrẽ Beɗeaba jara ɓʉ quĩrãca, Diaurura idjaɓa “jũma idjiare panʉ siɗa naʉ̃ ẽjũãnaa ɓatabuesiɗaa” (Apocalipsi 12:9, 10, 12). Satanara bio quĩrũ nũmʉda idjira dãrã ɓaẽ́da cawa ɓʉ bẽrã. Maʉ̃ bẽrã djuburiabi ɓʉda ẽberãrã idjaɓa ne jũma cadjirua dia ɓʉda naʉ̃ ẽjũãne. ¡Maʉ̃ carea naʉ̃ ẽjũãra bio cadjirua nũmʉda! Baribʉrʉ Ãcõrẽ Boroba ara oida jũma cadjiruara.