2. ¿Cãrẽda oɗida ni aɓaʉ araare ɓaẽ́ carea?

Jesuba oɗa quĩrãca, daiba política oɗacada. Jesu naʉ̃ ẽjũãne ɓasiɗe idjia osida ne ununacada, maʉ̃ carea ẽberãrãba dji boroda ɓamãrẽã quĩrĩã panasiɗaa, baribʉrʉ Jesuba dji boro ɓa quĩrĩãẽ́ basída (Juaʉ̃ 6:15). ¿Idjia cãrẽã quĩrĩãẽ́ basida dji boro ɓai carea? Idjiabʉrʉ jarasida: “Mʉ̃ra ẽberãrã boromĩna mʉ̃ purura naʉ̃ ẽjũãnebemaẽ́a” (Juaʉ̃ 18:36). Jesu caiɗubemarãra ãdjia araareɗebemarãẽ́a. Ne jara ɓʉ quĩrãca, daiba djõne wãnaẽ́da (Leadua Miqueas 4:3). Dairãba wayabadada puru naʉ̃ ẽjũãnebema bandera, mãwã ɓʉmĩna daiba acʉɗacada jãʉ̃ bandera idjaɓa idiɗacada jãʉ̃ banderaa, dadjirãba ʉ̃taa dji idiɗaca panʉa jãʉ̃ banderaa (1 Juaʉ̃ 5:21). Política araare panʉẽ́da dairãba ĩjã oɗida Ãcõrẽ Boroabʉrʉ Jeowabʉrʉ ɓʉɗa bẽrã.

4. Ni aɓaʉ araare ɓʉẽ́da bʉ quĩchara idjaɓa bʉ soɗeba

Leaɗadua 1 Juaʉ̃ 5:21. Mãwãnacarea, acʉɗapeɗa dji VIDEODA, beɗeaɗadua.

VIDEO: Cãrẽ cãrẽã critiano wãrã ara so zarea ɓaida ɓʉa: Ni aɓaʉ araare ɓʉẽ́da (2:49)

• ¿Cãrẽ cãrẽã Ayengeba carebaẽ́ basida políticora? ¿Cãrẽ cãrẽã idjia dji idiẽ́ basida jãʉ̃ banderaa?

• Bʉmaarã, ¿idjia jãʉ̃ra bia osida?

¿Cãrẽ sãwãya dadjirã dewara araare ɓʉẽ́da? Acʉɗapeɗa dji VIDEODA, beɗeaɗadua.

VIDEO: “Cartaba jara ɓʉra” jaradia ɓʉra: Dadjirãra dewara araare pananaẽ́da naʉ̃ ẽjũãne aɓa aɓa ɓʉɗe (5:16)

• ¿Sãwã dadjirãba acʉbi panʉda jũma purura jãʉ̃ jemenebʉdaɗe wãrãda dadjirãra dewara araare panʉẽ́da?

• ¿Sãwã acʉbi panʉda dadjirãra dewara araare panʉẽ́da jãʉ̃ político obʉdaɗe dadjiduɓa biara ɓʉda wa biẽ́ ɓʉda?

• Noticieroba acʉbi panʉne idjaɓa beɗea panʉne ẽberãrãme naʉ̃ ẽjũãnebema mãwã panʉra, ¿sãwã acʉbiɗida dadjirã carebaẽ́da dewara araare pananaẽ́ carea?