Acʉbidua bia ɓʉaɗa aida ɓʉ Jeowaba Jesu biɗa oɗa bʉ carea

¿Bʉa sãwã senti ɓʉda bʉ dji bia ne bari diaibʉrʉ? Wãrã arada bʉa bia senti ɓaida, maʉ̃ne acʉbi quĩrĩã ɓʉda bia ɓʉaɗa aida ɓʉa jãʉ̃ ne bari diaɗa carea. Jeowaba Jesu biɗa ne bari bio biara ɓʉda diasiɗaa ne awara cãyãbara: dji ẽdrʉ ɓʉida. Acʉɗida cãrẽda poya oɗida bia ɓʉaɗa aɗi carea ãdjirãba oɗa carea.

1. ¿Cãrẽda poya oɗida bia ɓʉaɗa aɗi carea Jeowaba Jesu biɗa oɗara dadjirã itea?

Ãcõrẽ Beɗeaba jara ɓʉda “jũma [Jesu] ĩjãbʉdara ewariza zocai” ɓeaɗida (Juaʉ̃ 3:16). ¿Sãwã acʉbiɗida ĩjã panʉda Jesuɗera? Ĩjã panʉmĩna Jesuɗera, dadjirãba ĩjãnida panʉa idjia jaraɗara idjaɓa ne bia oɗida panʉa (Santiago 2:17). Ne bia obʉdaɗe idjaɓa beɗea bia jarabʉdaɗe ãdjirãba quĩrĩã ɓaɗa quĩrãca, dji biarã pananida ãdjirãme (Leadua Juaʉ̃ 14:21).

2. ¿Cãrẽ ewariɗe poya acʉbiɗida bia ɓʉaɗa aɗida panʉa Jeowaba Jesu oɗa carea?

Dimisi beui naẽna, Jesuba jarasida dji caiɗubemarãra cãrẽda poya oɗida bia ɓʉaɗa aɗi carea idji beuɗa carea. Idjia ɓʉsida ewari droma bio biara ɓʉda, Ãcõrẽ Beɗeaba trʉ̃ jarabadaa “Crito quĩrãnebaɗi carea cobadara” wa dewararãba trʉ̃ jarabadada quĩrãnebaɗida Jesu beuɗara (1 Corinto 11:20). Jesuba quĩrĩã ɓasida dji nĩbabadarãba quĩrãnebaɗida idji beuɗa idjaɓa critianorã wãrã araba quĩrãnebaɗida idjira beusida jũma ẽberãrã carea. Maʉ̃ carea Jesuba jarasia: “Mʉ̃ quĩrãnebaɗi carea ara naʉ̃ quĩrãca o pananadua” (Luca 22:19). Bʉa wãibʉrʉ jãʉ̃ reunioʉ̃ bio biara ɓʉda quĩrãnebaɗi carea Jesu beuɗa, bia ɓʉaɗa acʉbi ɓʉda Jeowaa Jesu biɗa, ãdjirãba oɗa carea dadjirã itea bio quĩrĩã panʉ bẽrã ẽberãrãa.

BIO CAWAƊIDA NAɄ̃ BEƊEAƊE

3. Bia sentiɗibʉrʉ ãdjirãba oɗa carea, maʉ̃ carea oɗida ne biada

Quĩchadua bʉda jogabʉrʉda doɗe, ʉ̃cʉrʉba ẽdrʉ edaida. ¿Bʉa quĩrãdoaida jãʉ̃ ẽberãba oɗara bʉ carea? Wa ¿bia ɓʉaɗa aida ɓʉa idjia ẽdrʉ edaɗa bẽrã?

Dadjirãra zocai panʉda Jeowaɗeba. Leaɗapeɗa 1 Juaʉ̃ 4:8-10, beɗeaɗadua:

• ¿Cãrẽ ne aɓarida ɓʉ Jesu beuɗa ne bari diabari quĩrãca?

• ¿Bʉa sãwã senti ɓʉda quĩchabʉrʉɗe Jeowaba Jesu biɗa oɗara bʉ carea?

¿Cãrẽda poya oɗida bia ɓʉaɗa aɗi carea Jeowaba Jesu biɗa oɗara dadjirã carea? Leaɗadua 2 Corinto 5:15 idjaɓa 1 Juaʉ̃ 4:11; 5:3. Leaɗacarea aɓa aɓa texto beɗeaɗadua:

• ¿Sãwãbʉrʉ acʉbiɗida bia ɓʉaɗa aɗi carea?

4. Jesu quĩrãca o panʉda

Dadjirãba o panʉbʉrʉ Jesu quĩrãca, jãʉ̃gʉba acʉbi ɓʉda wãrã arada bia ɓʉaɗa senti panʉda idjia oɗa carea. Leaɗapeɗa 1 Pedro 2:21, beɗeaɗadua:

• ¿Bʉa cãrẽda poya oida Jesu quĩrãca oi carea?

5. Quĩrãneba panʉda Jesu beuɗa

Cawaɗi carea cãrẽda mãwãsida reunioʉ̃ nabema Crito quĩrãnebaɗi carea cobadara, leaɗadua Luca 22:14, 19, 20. Leaɗacarea beɗeaɗadua:

• ¿Cãrẽda mãwãsida na ãbaa jʉreɗa Crito quĩrãnebaɗi carea cobadara?

• ¿Cãrẽda jara quĩrĩã ɓʉ dji paʉ̃ uva ɓa siɗa? (Acʉɗadua dji caibea 19, 20 siɗa).

Jesuba quĩrĩãsida dji ẽpẽbadarãba quĩrãnebaɗida idji beuɗa poagaza, idji ewari beuɗaɗe. Maʉ̃ carea Beɗea ɓeara Jeowaɗebemarãba poagaza ãbaa jʉre panʉda quĩrãnebaɗi carea Jesu beuɗa. Dadjirãba obadaa idjia jaraɗa quĩrãca. Cawaɗi carea cãrẽda o panʉda ãbaa jʉre panʉne quĩrãnebaɗi carea Jesu beuɗa, acʉɗadua dji VIDEODA. Mãwãnacarea beɗeaɗadua.

VIDEO: Quĩrãnebaɗida Jesu beuɗa (1:41)

• ¿Cãrẽda o panʉ ãbaa jʉre panʉne quĩrãnebaɗi carea Jesu beuɗa?

Paʉ̃ jara quĩrĩã ɓʉ Jesu cacua ne cadjirua neẽ́ ɓʉ. Idjaɓa uva ɓa asea jara quĩrĩã ɓʉ idji oa, idjia diasida dadjirã carea

JŨMA BEƊEAƊA

Dadjirãba bia ɓʉaɗa poya aɗida Jesuba oɗa carea, wãrãda ĩjã panʉbʉrʉ idjiɗeda idjaɓa ãbaa jʉreɗe wãnibʉrʉ quĩrãnebaɗi carea Jesu beuɗa poagaza.

Cawaɗara

• ¿Sãwã poya acʉbiɗida wãrã arada ĩjã panʉda Jesuɗera?

• Bʉa bia ɓʉaɗa jara quĩrĩã ɓʉbʉrʉ Jeowaa Jesua biɗa ãdjirãba oɗa carea bʉ itea, ¿sãwã poya oida?

• ¿Cãrẽ cãrẽã bio biara ɓʉda bʉra ãbaa jʉreɗe wãida quĩrãnebaɗi carea Jesu beuɗara?

CAWADUA MÃSA

Ũrĩdua Jesu beuɗaba sãwã poya carebaida dadjirãra ne bia oɗamãrẽã

Jesuba wayasida Jeowaa idji cacuaɗeba (9:28)

Mãsa cawadua ĩjãi carea Jeowaɗera idjaɓa cawai carea cãrẽda poya oida acʉbi carea wãrãda ĩjã ɓʉda.

“Bio ĩjãnadua Jeowa beɗeara” (Cartaba Jara ɓʉda, 2016, Octubre)

Wẽrãba awara ɓesida idjia cawasiɗe Jesuba oɗara dadjirã carea. Leadua idji nẽbʉrʉɗara ɓʉ́ ɓʉda “Mʉ̃ra biya senti ɓʉda, necai ɓʉda idjaɓa zocai ɓʉda”.

“Bibliara cawaɗapeɗa awara panesiɗaa” (Cartaba Jara ɓʉda, 2011, Agosto 1)

Cawadua cãrẽã jũma ẽberãrãba nama ẽjũãne pananira coɗaẽ́da paʉ̃ra ni doɗaẽ́da uva ɓa asea ãbaa jʉre panʉne quĩrãnebaɗi carea Jesu beuɗa.

“¿Cãrẽ cãrẽã Beɗea ɓeara Jeowaɗebemarãba oɗaẽ́da dewara religioʉ̃ quĩrãca quĩrãnebaɗi carea Jesu beuɗa?” (Acʉdua internene)