¿Ãcõrẽ Beɗeaba cãrẽda jara ɓʉ bajãnebema nezocaɗe?

Jeowaba quĩrĩã ɓʉda dadjirãba cawaɗida idji cuariara bajãnebema. Bajãnebema nezocarã idji cuariara, ãdjirãra “Ãcõrẽ [warrarã]” quĩrãca (Job 38:7). ¿Cãrẽda jaradia ɓʉda Bibliaba bajãnebema nezocaɗe? ¿Ãdjirãba cãrẽda obibadada ẽberãrãa? ¿Jũma bajãnebema nezocarã Ãcõrẽ cuariada?

1. ¿Cairãdrʉ bajãnebema nezocarã?

Jeowaba ẽjũãra oi naẽna idjia osia bajãnebema nezocarã. Idji quĩrãca, ãdjirãra jaureɗera poya ununacada idjaɓa bajãne panabadaa (Hebreo 1:14). Bio zocãrã panʉda bajãnebema nezocarã; aɓa aɓa awara panʉda (Apocalipsi 5:11). Ãdjirãba “[Jeowaba] jara ɓʉra obadaa idjaɓa ĩjã obadaa idjia quĩrĩã ɓʉra” (Salmo 103:20). Naẽnaena Jeowaba diabuesida bajãnebema nezocara ãdjirãneba beɗeai carea, dji purua carebai carea idjaɓa ẽdrʉbi carea ẽberãrãa. Iɗi ewariɗera, bajãnebema nezocarãba jipa edebada critianorãra jʉrʉɗi carea ẽberãrã cawa quĩrĩã ɓea Ãcõrẽ Beɗeaɗe.

2. ¿Cairãdrʉ Diaurura idjaɓa jairara?

Ʉ̃cʉrʉ bajãnebema nezocarãda igarasiɗaa Jeowaa. Dji nabema igarasida Ãcõrẽa “idji trʉ̃ra Diauru idjaɓa Satana abadaa. Idjia naʉ̃ ẽjũãne ɓeara jũma cũrũga eroɓʉa” (Apocalipsi 12:9). Satanara dji boro ɓa quĩrĩã ɓabadjida, maʉ̃ bʉrʉ cũrũgasida ẽberã nabemara idjime araare panani carea. Mãwãnacarea dewara bajãnebema nezocarãba idji quĩrãca osiɗaa. Jãʉ̃ bajãnebema nezocarã cadjirua ĩjãnaca ɓeara trʉ̃ jarabada jairada. Jeowaba ãdjirãra bajãneba jʉretacuasida, naʉ̃ ẽjũãnaa ɓatabuesida idjaɓa Jeowaba jõbiya ãdjirãra (Leadua Apocalipsi 12:9, 12).

3. ¿Diauruba jaira biɗa sãwã cũrũga quĩrĩã panʉda dadjirãa?

Diauruba jaira biɗa cũrũgabadaa ẽberãrãa jaiɗeba idjaɓa cadjiruaɗeba beɗeaɗi carea jaure cadjiruarãme. Maʉ̃ba jaraɗida, chĩdauɗeba cawa jarabadara, jãĩbanarã, daubararã, chicerorã idjaɓa tõguerorã. Ʉ̃cʉrʉ cacua biẽ́ ɓeabʉrʉ wãnida jãĩbanamaa. Dewararãba crĩchabadaa ẽberã beuɗarãme poya beɗeaɗida. Baribʉrʉ Jeowaba jara ɓʉ: “Jãĩbanara iwiɗirãnadua, daubarara jʉrʉrãnadua” (Levitico 19:31). Jeowaba bio waga quĩrĩã ɓʉda dadjirãa jairaɗebema idjaɓa Diauruɗebema. Ãdjirãra Ãcõrẽ quĩrũrã bẽrã ne cadjirua o quĩrĩã panʉda dadjirãa.

BIO CAWAƊIDA NAɄ̃ BEƊEAƊE

4. Bajãnebema nezocarãba biarã careba panʉda ẽberãrãa cawaɗamãrẽã Jeowaɗeda

Bajãnebema nezocarãba dadjía jaradia panʉẽ́da Ãcõrẽ Beɗeara quĩrãpita ununapeɗa. Maʉ̃ cãyãbara ãdjirãba jaradia panʉda djabarãneba. Ãdjirãba jipa edebadaa Ãcõrẽ purura ẽberãrãmaa cawa quĩrĩã ɓea Ãcõrẽ Beɗea. Leaɗapeɗa Apocalipsi 14:6, 7, beɗeaɗadua:

• ¿Cãrẽ cãrẽã necesita panʉ bajãnebema nezocarãba carebaɗida dadjirãba jaradia panʉne?

• ¿Bʉa ɓʉsriɗa ɓʉda bajãnebema nezocarãba jipa ede ɓʉda bʉra ẽberãrãa jaradiai carea? ¿Cãrẽã?

5. Igaraɗadua jaira

Satanara jaira biɗa Ãcõrẽ quĩrũrã. Maʉ̃ bʉrʉ ãdjirãra dji quĩrũda dadjirãme biɗa. Leaɗapeɗa Luca 9:38-42, beɗeaɗadua:

• ¿Jairaba sãwã o panʉda ẽberãrãra?

Jʉrʉ quĩrĩãnaẽ́da jairaba dadjirãra carebaɗamãrẽã. Leaɗapeɗa Deuteronomio 18:10-12, beɗeaɗadua:

• ¿Jairaba sãwã cũrũga quĩrĩã panʉda dadjirãa ãdjirãme beɗeaɗi carea idjaɓa ãdji jʉwaɗe panani carea? Bʉ ɓabarimae, ¿cãrẽ ne cadjirua jaiɗebema obada?

• Bʉmaarã, ¿biara ɓʉda Jeowaba jara ɓʉra jaiɗebema? ¿Cãrẽ cãrẽã?

Acʉɗapeɗa dji VIDEODA, beɗeaɗadua.

VIDEO: “Diaurura ĩjãrãnadua” (5:02)

• Bʉmaarã, ¿Palesa wãwãba ojia ta jʉ̃mʉra biẽ́ ɓʉda? ¿Cãrẽ cãrẽã?

• ¿Palesaba cãrẽda oibara ɓasi wagai carea jairaɗebema?

Critianorã wãrã araba idu cũrũgabiɗaẽ́ panʉ jairaba o panʉra. Leaɗapeɗa Hecho 19:19 idjaɓa 1 Corinto 10:21, beɗeaɗadua:

• ¿Cãrẽ cãrẽã bio biara ɓʉda ɓatabueida idjaɓa babueida dewaraʉba unurãnamãrẽã ne cadjirua Diauruɗera?

6. Poyadua Diaurura idjaɓa dji jaira siɗa

Diaurura jaira boroa. Baribʉrʉ dji droma Miguel abadada bajãnebema nezoca biarã boroa. Jesura idjaɓa trʉ̃badada Miguel. ¿Miguelra ʉɓʉa ɓʉ? Leaɗapeɗa Apocalipsi 12:7-9, beɗeaɗadua:

• Cairãdrʉ dji ʉɓʉa panʉda, ¿Miguel dji bajãnebema nezocarãme wa Diaurura dji jairame?

• Bʉmaarã, ¿Jesu ĩjãbadarãba wayaɗida panʉ Diaurura dji jaira siɗa?

Bʉa poya poyaida Diaurura jaira siɗa. Leaɗapeɗa Santiago 4:7, beɗeaɗadua:

• ¿Bʉa cãrẽda poya oida wagai carea Diauruɗebema idjaɓa jairaɗebemada?

JŨMA BEƊEAƊA

Bajãnebema nezocarã jipa ɓearãba careba panʉa dadjirãa. Diaurura jaira siɗa Jeowa dji quĩrũrã. Jaiɗeba ãdjirãba cũrũgabadaa ẽberãrãra.

Cawaɗara

• ¿Bajãnebema nezocarã jipa ɓearãba cãrẽda obada ẽberãrãba cawaɗamãrẽã Jeowara?

• ¿Cairãdrʉ Diauru idjaɓa cairãdrʉ jaira?

• ¿Cãrẽã bʉ carea biẽ́ ɓʉda jʉrʉɗida jaira?

CAWADUA MÃSA

Bio cawadua cãrẽ cãrẽã Jesura bajãnebema nezocarã dji droma Miguel.

“¿Caida bajãnebema nezocarã dji droma Miguel?” (Acʉdua internene)

Leadua cãrẽ cãrẽã Diaurura aɓabe ne cadjirua biaẽ́da.

“¿Diaurura wãrãda ɓʉda?” (Acʉdua internene)

Acʉdua wẽrã aɓaʉba cãrẽda osida igarai carea jairara.

“Cawasida cãrẽ cãrẽã zocai ɓasida” (Cartaba Jara ɓʉda, 1993, Julio 1)

Cawadua sãwã Diauruba cũrũga ɓʉda ẽberãrãa jaiɗeba.

“Wãrã arada ɓʉda jãĩbana, tõguero, idjaɓa chicero, jãʉ̃gʉraɗeba cũrũga panʉda” (Bʉa unusida dji ora bia ɓʉda dãrã ɓai carea, dji 5)